(ក្រចេះ) ៖ ព្រឹកថ្ងៃអង្គារ ៨រោច ខែបុស្ស នព្វស័ក ព.ស២៥៦១ត្រូវនឹងថ្ងៃទី០៩ ខែមករា ឆ្នាំ២០១៨ នេះ រដ្ឋបាលស្រុកព្រែកប្រសព្វ ខេត្តក្រចេះ បានរៀបចំប្រារព្ធពិធីប្រកាសតែងតាំង និងផ្ទេរភារៈកិច្ចអភិបាលរងស្រុកព្រែកប្រសព្វ ចំនួន០៣រូប ក្រោមអធិបតីភាពឯកឧត្ដម ខ័ណ្ឌ ចំណាន អភិបាលរងខេត្តក្រចេះ ។ រាជរដ្ឋាភិបាលចេញប្រកាសលេខ៧១៨១ប្រក ស្តីពីការផ្ទេរភារកិច្ច និងតែងតាំងមន្ត្រីរាជការ ជាអភិបាលរងស្រុកព្រែកប្រសព្វ ១-លោកស្រី ម៉ែន សុផល ឋានន្តរស័កិ្តនាយក្រមការ ថ្នាក់លេខ២ ពីអភិបាលរងស្រុកឆ្លូង ទៅកាន់មុខតំណែងជាអភិបាលរងស្រុកព្រែកប្រសព្វ។ ២-លោក សន សុីដែន ឋានន្តរស័កិ្តនាយក្រមការ ថ្នាក់លេខ៦ ឲ្យកាន់មុខតំណែងជាអភិបាលរងស្រុកព្រែកប្រសព្វ។ ៣-លោក កែម ហៀង ឋានន្តរស័កិ្តនាយក្រមការ ថ្នាក់លេខ៣ ពីអភិបាលរងស្រុកព្រែកប្រសព្វឲ្យទៅបម្រើការងារនៅសាលាខេត្តក្រចេះ។ ក្នុងពិធីនេះឯកឧត្តមអភិបាលរងខេត្ត ក៏បានណែនាំ និងផ្តាំផ្ញើដល់ លោកអភិបាលស្រុក និងអភិបាលរងស្រុក ដែលទើបផ្ទេរភារកិច្ចថ្មី ក្នុងដែនសមត្ថកិច្ច រួមទាំងក្រុមប្រឹក្សា គណៈអភិបាលស្រុក មន្រ្តីរាជការ កងកម្លាំងប្រដាប់អាវុធ និងកម្លាំងមានសមត្ថកិច្ចគ្រប់លំដាប់ថ្នាក់ នៃស្រុកព្រែកប្រសព្វ ត្រូវរួមសហការគ្នាអនុវត្តការងារសំខាន់ៗ ជាអាទិភាព រួមមាន ៖ -ត្រូវបន្តរួមគ្នាថែរក្សាការពារសន្តិភាព ស្ថិរភាពនយោបាយ ស្ថិរភាពសង្គម ឲ្យបានល្អប្រសើរ ។ -បន្តខិតខំលើកកម្ពស់ការរក្សាសន្តិសុខ សណ្តាប់ធ្នាប់សាធារណៈទូទាំងក្រុងក្រចេះ ដោយជម្រុញការផ្សព្វផ្សាយនូវលក្ខណៈសម្បត្តិទាំង០៩នៃគោលនយោបាយភូមិ ឃុំមានសុវត្ថិភាព ឲ្យបានសស្រាក់សស្រាំទូទាំងស្រុក ។ -មន្រ្តីអនុវត្តច្បាប់ទាំងអស់ត្រូវខិតខំលើកកម្ពស់សមត្ថភាព ជំនាញ និងសីលធម៌វិជ្ជាជីវៈ ត្រូវមានភាពស្អាតស្អំ និងខិតខំបម្រើប្រជាពលរដ្ឋដោយ ស្មោះត្រង់ និងស្មើភាព។ -ត្រូវបន្តជំរុញការអភិវឌ្ឍសេដ្ឋកិច្ចសង្គមលើគ្រប់វិស័យ និងខិតខំលើកកម្ពស់ជីវភាពរស់នៅរបស់ប្រជាជន តាមរយៈការផ្តល់សេវាសាធារណៈ និងជំរុញកិច្ចអភិវឌ្ឍមូលដ្ឋាន ព្រមទាំងខិតខំសម្របសម្រួលដោះស្រាយបញ្ហាប្រឈមនានា ដែលនៅសេសសល់ សំដៅរួមគ្នាធានាឲ្យបាននូវប្រក្រតីភាព នៃការងារគ្រប់វិស័យទូទាំងស្រុកទាំងមូល ។ -បន្តជំរុញអនុវត្តកម្មវិធីកំណែទម្រង់នានា របស់រាជរដ្ឋាភិបាល ដោយឡែកចំពោះកំណែទម្រង់វិមជ្ឈការ និងវិសហមជ្ឈការ ក្រុមប្រឹក្សា គណៈអភិបាលស្រុក មន្រ្តីជំនាញនានា មន្រ្តីសាលាស្រុក ក្រុមប្រឹក្សាឃុំ ។ -បន្តយកចិត្តទុកដាក់រៀបចំសោភ័ណភាព សណ្តាប់ធ្នាប់ អនាម័យការប្រើប្រាស់ផ្លូវ ចិញ្ចើមផ្លូវសាធារណៈ ការគ្រប់គ្រងការសាងសង់សំណង់នានា និងសុវត្ថិភាពអោយកាន់តែល្អប្រសើរថែមទៀត។ -ពង្រឹងឡើងវិញអំពីការអនុវត្តតួនាទី ភារកិច្ច របស់ការិយាល័យនានាចំណុះសាលាស្រុក ឲ្យមន្រ្តីរាជការមានវត្តមានគ្រប់ៗរូប ដើម្បីរួមគ្នាបំពេញការងារឲ្យបានកាន់តែមានប្រសិទ្ធភាពថែមទៀត ។ ត្រូវបន្តយកចិត្តទុកដាក់សហការជាមួយទីចាត់ការនានាចំណុះសាលាខេត្ត ដើម្បីធ្វើការបណ្តុះបណ្តាល មន្រ្តីរាជការសាលាស្រុកឲ្យមានសមត្ថភាពគ្រប់គ្រាន់ក្នុងការអនុវត្តតួនាទី ភារកិច្ចរបស់ខ្លួនបានកាន់តែល្អប្រសើរ ។ ប្រភពព័ត៌មាន: រដ្ឋបាលខេត្តក្រចេះ (ថ្ងៃទី០៩ ខែមករា ឆ្នាំ២០១៨)
