នាព្រឹកថ្ងៃសៅរ៍ ទី២៨ ខែតុលា ឆ្នាំ២០២៣នេះ ឯកឧត្តម ជុំ  ហាត ប្រធាន ក្រុមប្រឹក្សាខេត្ត  និងឯកឧត្តម  ប៉េង  ពោធិ៍សា  អភិបាល នៃគណៈអភិបាលខេត្ត ស្វាយរៀង បានអញ្ជើ​ញចូល​រួមក្នុងពិធីសម្ពោធដាក់ឲ្យប្រើប្រាស់ជាផ្លូវការនូវសមិទ្ធផលនានាក្នុងវត្តតាស្អាង ស្ថិតនៅភូមិតាស្អាង ឃុំកំពង់ចំឡង ស្រុកស្វាយជ្រំ ក្រោមអធិបតីភាពដ៏ខ្ពង់ខ្ពស់ឯកឧត្តមបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្រ្តី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ និងជាប្រធានគណៈកម្មាធិការ​ជាតិជំរុញចលនាភូមិមួយ ផលិតផលមួយ។

ពិធីនេះក៏មានការអញ្ជើញចូលរួមពីឯកឧត្តមសមាជិកព្រឹទ្ធសភា សមាជិករដ្ឋសភា គណៈប្រតិភូក្រុមប្រឹ​ក្សា​ស្តា​រអភិវឌ្ឍន៍វិស័យកសិកម្ម និងជនបទ និងគណៈកម្មាធិការជាតិជំរុញចលនាភូមិមួយ ផលិតផល​មួយ ឯកឧត្តម លោកជំទាវជាក្រុមការងារចុះជួយស្រុក ឃុំ តំណាងកម្លាំងទាំង៣ ប្រធានមន្ទីរ-អង្គភាព​ក្នុងខេត្ត ក្រុមប្រឹក្សាស្រុក គណៈអភិបាលស្រុក មេឃុំ នាយប៉ុស្តិ៍នគរបាលរដ្ឋបាលឃុំ កងកម្លាំង មន្ត្រីរា​ជការ សប្បុរសជន មេភូមិ ប្រជាការពារភូមិ យាយជី តាជី លោកគ្រូ អ្នកគ្រូ យុវជនស.ស.យ.ក យុវជនកាកបាទក្រហម សិស្សានុសិស្ស ព្រមទាំងបងប្អូនប្រជាពលរដ្ឋសរុប ៨៥៩នាក់។

មានប្រសាសន៍ទៅកាន់ពិធីនេះឯកឧត្ត ម ប៉េង ពោធិ៍សា អភិបាលខេត្ត បានថ្លែងនូវក្តីរំភើ​បរីករាយ​ដោ​យបា​នឃើ​​ញនូវសមិទ្ធផលជាច្រើនបានកើ​តឡើងនូវវត្តតាស្អាងនេះ  ក្នុងនោះក៏សូមថ្លែងអំណរ​ព្រះ​គុណចំ​ពោះព្រះតេជគុណ  ព្រះចៅអធិការ  គណៈកម្មាធិការអាចារ្យវត្ត  ក៏ដូចជាពុទ្ធបរិស័ទ និងសប្បុរ​សជនទាំងអស់  ជាពិសេសឯកឧត្តមទេសរដ្ឋមន្ត្រី  និងក្រុមគ្រួសារដែលបាន បរិច្ចាគនូវធនធាន​ផ្ទាល់ខ្លួនជាច្រើន​ ផ្តល់ជូននូវសមិទ្ធផលនានានៅក្នុងវត្តតាស្អាង  ក៏ដូចជាក្នុងឃុំកំពង់ចំឡងនេះ។

ឯកឧត្តមបន្តថា  សមិទ្ធផលទាំងអស់កើ​តឡើងបានក៏ ព្រោះតែស្ថានភាពនៃប្រទេសជា​តិយើង​ទទួលបានផ្លែផ្កានៃសុខសន្តិភាព  និងការអភិវឌ្ឍជាតិលើគ្រប់វិស័យ  ដែលបានផ្តល់ឱកាសឲ្យប្រ​ជាពលរដ្ឋយើងមានជីវភាពល្អប្រសើរ ពីមួយថ្ងៃទៅមួយថ្ងៃ  និងមានលទ្ធភាពកាន់តែខ្ពស់នៅក្នុ​ងការចូ​ល​រួមចំ​ណែកក៏សាងសមិទ្ធផលនានាទាំងក្នុងវិស័យពុទ្ធចក្រ  និងអាណាចក្រ ។ កត្តាសន្តិភាព  និងស្ថិរភាពដែលជាមនុញ្ញផលនៃគោលនយោបាយឈ្នះ  ឈ្នះ  គួបផ្សំនិងនយោបាយដ៏ត្រឹ​មត្រូវរប​ស់ប្រមុ​ខរា​ជរដ្ឋាភិបាល  ក្នុងការប្រែក្លាយតំបន់អតីតសមរភូមិ  និងតំបន់ព្រំដែនទៅជាតំបន់សន្តិភាព  មិត្តភាព  សហប្រតិបត្តិការ  ទីផ្សារ  និងតំបន់អភិវឌ្ឍន៍បានបង្កភាពអនុគ្រោះ  និងលក្ខណៈអំណោយផលយ៉ាងធំធេងសម្រាប់ប្រទេសជាតិទាំងមូល ។

ទន្ទឹមនេះខេត្តស្វាយរៀងនាពេលបច្ចុប្បន្នក៏មានការអភិវឌ្ឍខុសពីជាង៤០ឆ្នាំមុន  ដែលនេះជាគុណ​តម្លៃ​នៃសន្តិភាពដែលសម្តេចតេជោហ៊ុន សែន បានខិតខំរកបានដោយលំបាកសម្រាប់ប្រជាជន  និងប្រទេ​ស​ជាតិ បច្ចុប្បន្នបាននិងកំពុងបន្តថែរក្សាការពារ  និងអភិវឌ្ឍន៍ ក្រោមការដឹកនាំប្រកបដោ​យភាពឈ្លាសវៃ  ប៉ិនប្រសប់  និងស្វាហាប់ពីសំណាក់សម្តេចមហាបវរធិបតី  ហ៊ុន  ម៉ាណែត  នាយករដ្ឋមន្ត្រីនៃព្រះរាជាណាចក្រកម្ពុជា។

ក្នុងឱកាសនោះផងដែរ ឯកឧត្ដមណ្ឌិតសភាចារ្យ អ៊ុក រ៉ាប៊ុន បានបញ្ជាក់ថា ប្រទេសកម្ពុជា ជាប្រទេស​ដែលប្រកាន់យករបបរាជានិយម តាំងពីបរមបុរាណមកម្ល៉េះ សព្វថ្ងៃនេះ កម្ពុជាកំពុងអនុវត្តរបប​រាជា​និយមអាស្រ័យរដ្ឋធម្មនុញ្ញ ក្រោមបាវចនា ជាតិ សាសនា ព្រះមហាក្សត្រ ដែលយើងច្រើនតែនិយាយ​ថាស្ថាប័នជាតិ និងស្ថាប័ន ព្រះមហាក្សត្រស្ថិតនៅខាងអាណាចក្រ។ ចំណែកឯស្ថាប័នសាសនា ស្ថិតនៅខាងពុទ្ធចក្រព្រោះយើងកាន់សាសនាព្រះពុទ្ធ ឬពុទ្ធសាសនា ហើយឯកឧត្ដមរំលឹកបែបនេះ គឺចង់បញ្ជាក់ថារាល់ការស្ថាបនា និងការអភិវឌ្ឍខាងអាណាចក្រ គឺជាបន្ទុករបស់ថវិកាជាតិ។ ចំពោះការ​ស្ថាបនា និងការអភិវឌ្ឍខាងពុទ្ធចក្រវិញ នោះគឺជាបន្ទុករបស់ថវិកាឯកជនដែលបា​នមកដោយសារ​ការជួយឧបត្ថម្ភពីសំណាក់សប្បុរសជន ដែលជាពុទ្ធបរិស័ទជិតឆ្ងាយ។

ឯកឧត្ដមទេសរដ្ឋមន្ត្រី ក៏បានកោតសរសើរដល់វត្តតាស្អាង គឺការកសាងបាននូវបណ្តាសំណង់​សំខាន់ៗ​ប្រកបដោយសោភ័ណភាពដ៏ល្អតាមបែបស្ថាបត្យកម្មសម័យដើម ដែលចោលរាងសមសួន ហើយត្រូវ​បាន​​មតិមហាជនសរសើរ និងទទួល ស្គាល់ថាជាសំណង់មានលក្ខណៈត្រឹមត្រូ​វតាមរចនាបទខ្មែរបូរា​ណ​ពិតប្រាកដ។ ឯកឧត្ដមបណ្ឌិតសភាចារ្យ ក៏បានអំពាវនាវដល់គណៈកម្មការអាចារ្យវត្ត ព្រះសង្ឃ ប្រជា​ពលរដ្ឋ សូមចូលរួមជួយថែរក្សាជួសជុលការពារបណ្ដាសំណង់ក៏ដូចជាទីវត្តអារាមទាំងមូលដោយចាត់ទុកថាសេនាស​នភ័ណទាំងនេះ គឺជាទ្រព្យសម្បត្តិវប្បធម៌រួមរបស់មាតុភូមិកម្ពុជាយើងទាំងអស់គ្នា៕

ប្រភព៖ រដ្ឋបាលខេត្តស្វាយរៀង