នាថ្ងៃទី ២៧ ខែ កញ្ញា ឆ្នាំ ២០១៨ ឯកឧត្តម បណ្ឌិត ម៉ៅ ភិរុណ អភិបាលខេត្តកណ្តាល រួមជាមួយលោក​អភិ​បាល​ក្រុង-ស្រុក និងមន្ទីរជំនាញពាក់ព័ន្ធ នៅសាលប្រជុំសាលាខេត្ត បានរៀបចំកិច្ចប្រជុំត្រួតពិនិត្យ​ពង្រាង​គំរោង​វិនិ​យោគ​អភិវឌ្ឍន៏ខេត្តកណ្តាលសម្រាប់ឆ្នាំ ២០១៩-២០២១ ដែលមាន ចំនួន ១៥៣ គំរោង។

ឯកឧត្តមបណ្ឌិត ម៉ៅ ភិរុណ បានបញ្ជាក់នៅក្នុងកិច្ចប្រជុំថា ដោយពិនិត្យឃើញស្ថានភាពជាក់ស្តែងនៃភូមិ​សាស្រ្ត​របស់ខេត្ត និងផ្អែកតាមសំណូមពររបស់ស្រុក-ក្រុង ពិសេស សំណូមពររបស់ប្រជាពលរដ្ឋគំរោងវិនិយោគ​អភិវឌ្ឍន៏ខេត្តកណ្តាលឆ្នាំ ២០១៩-២០២១ភាគច្រើនគឺការជួសជុលផ្លូវបេតុង ជួសជុលជើងទេច្រាំង ព្រែកត្នោត ការដាក់ភ្លើងស្តុប តម្លើងបង្គោលភ្លើង រៀបការ៉ូឡា គូសគំនូសសញ្ញាចរាចរណ៏ រៀបសួនកុមារ សាងសង់អគារ​សិក្សា សាងសង់សាលាឃុំ ស្តារប្រឡាយ ដាក់លូរំដោះទឹក សាងសង់អគាររដ្ឋបាលស្រុកដែលមានតម្លៃ​ប៉ានស្មាន​ក្នុងឆ្នាំ ២០១៩ ប្រមាណ ២,៣៧៩,៥៧៦លានរៀល (ពីរលានបីរយចិតសិបប្រាំបួនពាន់លានប្រាំរយចិត​សិប​ប្រាំ​មួយពាន់រៀល។ ឯកឧត្តមបានក្រើនរំលឹកដល់រដ្ឋបាល ក្រុង-ស្រុក និងមន្ទីរពាក់ព័ន្ធត្រូវជំរុញ និងអនុវត្តន៏គំរោង​ឆ្នាំ ២០១៩អោយទទួលបានលទ្ធផលល្អ បន្ទាប់ពីការអនុម័តពីក្រុមប្រឹក្សាខេត្តរួចហើយ។ ចំពោះមុខមន្ទីរ ស ដ ក ខេត្តត្រូវជួសជុលផ្លូវសំបុកមាន់ក្នុងក្រុងតាខ្មៅ សង្កាត់ទាំង០៦របស់ក្រុងត្រូវយកចិត្តទុកដាក់ជួសជុលគំរបលូ​ដែលខូចខាត ដោយប្រើប្រាស់ថវិការបស់ក្រុង និងសង្កាត់ផ្ទាល់ ព្រោះនេះជាការខូចខាតមានទំហំតូចហើយ​មិនចាំបាច់​អោយរដ្ឋបាលខេត្ត ឧបត្ថម្ភនោះទេ។ ឯកឧត្តមបានសំណូមពរដល់លោកអភិបាលក្រុង ស្រុក និងមន្ទីរ​ជំនាញត្រូវពិនិត្យ ផ្ទៀងផ្ទាត់ឡើងវិញ នូវគំរោងណាដែលមិនមែនជាគំរោងអាទិភាពសំរាប់ការអភិវឌ្ឍន៏មូលដ្ឋាន គួរដកចេញចៀសវាងការចំណាយរបស់យើងកើនឡើង។

សូមបញ្ជាក់ថា គំរោងវិនិយោគអភិវឌ្ឍន៏ខេត្តទាំង១៥៣​គំរោង​នោះ ក្នុងនោះរួម រដ្ឋបាលសាលាខេត្ត ៦គំរោង, ក្រុងតាខ្មៅ ៤៥គំរោង, ស្រុកស្អាង ២៣គំរោង, កោះធំ ១៥គំរោង, កណ្តាលស្ទឹង ១២គំរោង, កៀនស្វាយ៥គំរោង, អង្គស្នួល ១១គំរោង, ពញាឮ ១២គំរោង, លើកដែក០៦គំរោង, មុខកំពូល ១២គំរោង, ខ្សាច់កណ្តាល ០២គំរោង, និងស្រុកល្វាឯម០៤គំរោង៕