ថ្ងៃចន្ទ ១០កើត ខែចេត្រ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២៦ ខែមីនា ឆ្នាំ២០១៨ ឯកឧត្តម គួច ចំរើ​ន អភិបាល នៃគណៈអភិបាលខេត្តកំពង់ចាម បានអញ្ជើញចុះត្រួតពិនិត្យ ការស្រុតច្រាំងទន្លេប្រវែង ៣៥០ ម៉ែត្រ នៅភូមិពង្រ ឃុំរកាគយ ស្រុកកងមាស ខេត្តកំពង់ចាម។ ក្រោយពីការត្រួតពិនិត្យរួចឯកឧត្តមអភិបាល បានជួបសំណេះ សំណាល និងបានពន្យល់អំពីស្ថានភាពនៃការបាក់ស្រុតច្រាំងទន្លេនេះយ៉ាងលំអិតជូនប្រជាពលរដ្ឋនៅភូមិពង្រ ថាការបាក់ច្រាំងទន្លេនេះ គឺបណ្តាលមកពីការករកើតកោះតូចនៅទុលមុខឃុំរការគយដែលដុះឡើងដោយធម្មជាតិ និងមួយផ្នែកទៀតគឺដោយសារស្ថានភាពផ្ទៃដីខាងក្រោមមានសំណើមដែលរងពីបណ្តាញទឹកបឹងជ្រាបមកធ្វើអោយដីទាន់ស្រុត។ ម្យ៉ាងវិញទៀតដោយសារការព្រួយបារម្ភ និងការសំណូមពររបស់ប្រជាពលរដ្ឋ ឯកឧត្តម គួច ចំរើន បានសម្រេចផ្អាកអាជីវកម្មបូមខ្សាច់ជាបណ្តោះអាសន្ននៅទីតាំងទន្លេចំណុចនេះ និងបានពន្យល់ថែមថា ការអនុញ្ញាតឱ្យមានអាជីវកម្មបូមខ្សាច់ គឺបានឆ្លងកាត់ការសិក្សាយ៉ាងច្បាស់លាស់ពីក្រសួងស្ថាប័ន​ពាក់ព័ន្ធ មុនចេញលិខិតអនុញ្ញាត ហើយការអនុញ្ញាតនេះទៀតសោត គឺក្នុងគោលបំណងស្ថារចរន្តផ្លូវទឹក ដែលគោករាកដោយសារខ្សាច់ដុះច្រើន ឱ្យបានជ្រៅឡើងវិញ ដើម្បីបញ្ជៀសចរន្តទឹកហូរបុកច្រាំងទន្លេ។ លើសពីនេះទៀត ឯកឧត្តមអភិបាលខេត្តបានស្នើសុំឱ្យ​បង​ប្អូនប្រជាពលរដ្ឋចូលរួមជាមួយអ្នក​បច្ចេកទេស ចុះត្រួតពិនិត្យមើលជាក់ស្តែងពីស្ថានភាព​បាត​ទន្លេ​​ម្តុំបាក់ស្រុត តាមឧបករណ៍​បច្ចេក​ទេសដែលតំណាងក្រសួងរ៉ែ និងថាមពល ដើម្បីឱ្យយល់​ច្បាស់​ពិតប្រាកដ ។ គួររំលឹកផងដែរថា កាលពីថ្ងៃទី០៧ ខែមីនា ឆ្នាំ២០១៨ មានការបាក់ស្រុតច្រាំងទន្លេប្រមាណប្រវែង ៣៥០ ម៉ែត្រ​នៅភូមិពង្រ ឃុំរកាគយ ស្រុកកងមាស ខេត្តកំពង់ចាម តែមិនបានបំផ្លាញទ្រព្យសម្បត្តិ ​ និងគ្រោះថ្នាក់ដល់អាយុជីវិតរបស់ប្រជាពលរដ្ឋឡើយ។

ប្រភពព័ត៌មាន: រដ្ឋបាលខេត្តកំពង់ចាម (ថ្ងៃទី២៦ ខែមីនា ឆ្នាំ២០១៨)