អាជា្ញធរខេត្តព្រះវិហារ  និងខេត្តឧប៊ុនរាជធានី(ថៃ) ឯកភាពបង្កើតឲ្យមានក្រុមការងារចង្អៀត ដើម្បីបើក​ច្រកទ្វា​អន្តរជាតិ​កម្ពុជា-ថៃ (អានសេះ-អានម៉ា)
February 08, 2019 អ្នកទស្សនា :

  នាព្រឹកថ្ងៃសុក្រទី ០៤កើត ខែមាឃ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០៨ ខែកុម្ភៈ ឆ្នាំ​២០១៩ ឯកឧត្តម អ៊ុន ចាន់ដា អភិបាលខេត្តព្រះវិហារ ដឹកនាំក្រុមការងារចម្រុះ ជួបជាមួយអភិបាល​ខេត្ត ឧប៊ុនរាជធានីរបស់ព្រះរាជាណាចក្រថៃ ដើម្បីចុះត្រួតពិនិត្យ​ពិភាក្សាលើការរៀប​ចំដំណើរការរៀប​ចំ​បើក​​ច្រកទ្វារអន្តរជាតិអានសេះ ដោយមានការចូលរួមពីក្រុមការចម្រុះនៃខេត្តទាំងពីរ។

     ឯកឧត្តម អ៊ុន ចាន់ដា អភិបាលខេត្តព្រះវិហារ បានមានប្រសាសន៍ជម្រាបជូនភាគីថៃក្នុងកិច្ចប្រជុំ ចង្អៀតនោះថា ការដាក់ឲ្យដំណើរការច្រកទ្វាអន្តរជាតិនេះឡើង គឺមិនបះពាល់ដល់ការ​បោះបង្គោល​ព្រំ​ដែន​នៃប្រទេសទាំងពីរទេ ទុកឲ្យគណៈកម្មការបោះបង្គោលអនុវត្តនិតិវិធី ហើយចំពោះមូល​ហេតុ​សំខាន់ គឺដើម្បីផ្លាស់ប្តូរពាណិជ្ជកម្មរវាងគ្នាឲ្យកាន់តែប្រសើរឡើង ជាពិសេសសំដៅ​លើកកម្ពស់​ជីវ​ភាពរស់នៅរបស់ប្រជាជនប្រទេសទាំងពីរ ព្រមទាំងប្រែក្លាយតំបន់ព្រំដែនឲ្យជាព្រំដែនសន្តិភាព កិច្ច​សហប្រតិបត្តិការ និងការអភិវឌ្ឍរវាងខេត្តទាំងពីរផងដែរ។

     ឯកឧត្តមអភិបាល បានលើកឡើងទៅកាន់ភាគីថៃនូវចំនុចមួយចំនួនដូចខាងក្រោម៖ ១.ខេត្ត​ព្រះ​វិហារ បានត្រៀមបម្រុងទុករៀបចំជាស្នាក់ការច្រកទ្វាព្រំដែនអន្តរជាតិដែលមានទំហំ ៣.៤ហិក​តា​របស់​ខ្លួនរួចរាល់ហើយ, ២.ចំពោះការនាំចេញចូលទំនិញរបស់ប្រជាជនទាំងពីរ សូមឲ្យអនុវត្ត​រក្សា​ស្ថានភាពដើមដូចមុន, ៣.សុំឲ្យភាគីថៃឯកភាពបង្កើតក្រុមការងារ​ចម្រុះជាផ្លូវការដឹកនាំដោយ​អភិបាលខេត្តទាំងពីរ ក្នុងគោលបំណងដោះស្រាយបញ្ហាប្រឈម​នានាក្នុងកិច្ចដំណើរការបើកច្រក​ទ្វាអន្តរជាតិក៏ដូចជាពេលដំណើរការ ដោយត្រូវមានកិច្ចប្រជុំពិភាក្សា ក្នុងកំរិតខេត្ត និងខេត្ត ក្នុងករណី​មានបញ្ហាកើតឡើង។ 

      សូមបញ្ជាក់ដែរថា ខេត្តព្រះវិហារបានត្រៀមរួចរាល់នូវការចេញប័ណ្ណព្រំដែន ប៉ុន្តែភាគីថៃ ខេត្ត​ឧប៊ុនរាជធានី មិនទាន់ដំណើរការនៅឡើយ ព្រោះថាប័ណ្ណព្រំដែន ពិតជាមាន​សារៈសំខាន់​​ណាស់​ក្នុងការទប់ស្កាត់ ការលួចឆ្លងដែនខុសច្បាប់ បទល្មើសឆ្លងដែន និងរក្សាបាននូវសន្តិសុខ សណ្តាប់​ធ្នាប់ល្អ និងកិច្ចសហប្រតិបត្តិការកាន់តែប្រសើរឡើងថែមទៀត៕ រតនា

ប្រភព៖ រដ្ឋបាលខេត្តព្រះវិហារ

ព័ត៌មានទាក់ទង
ច្បាប់នឹងឯកសារថ្មីៗ
MINISTRY OF INTERIOR

ក្រសួងមហាផ្ទៃមានសមត្ថកិច្ច ដឹកនាំគ្រប់គ្រងរដ្ឋបាលដែនដី គ្រប់ថ្នាក់ លើវិស័យ រដ្ឋបាលដឹកនាំគ្រប់គ្រង នគរបាលជាតិ ការពារសន្តិសុខសណ្តាប់ធ្នាប់សាធារណៈ និងការពារសុវត្ថិភាព ជូនប្រជាពលរដ្ឋ ក្នុងព្រះរាជាណាចក្រកម្ពុជា។

ទាញយកកម្មវិធី ក្រសួងមហាផ្ទៃ​ទៅ​ក្នុង​ទូរស័ព្ទអ្នក
App Store  Play Store
023721905 023726052 023721190
#275 ផ្លូវព្រះនរោត្តម, ក្រុងភ្នំពេញ
ឆ្នាំ២០១៧ © រក្សាសិទ្ធិគ្រប់យ៉ាងដោយ ក្រសួងមហាផ្ទៃ