នាព្រឹកថ្ងៃសុក្រ ៤កើត ខែមាឃ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី ០៨ ខែកុម្ភៈ ឆ្នាំ២០១៩ ឯកឧត្តម ងួន រតនៈ អភិបាល នៃគណៈអភិបាលខេត្តបាត់ដំបង បានអញ្ជើញចូលរួមក្នុងពិធីសម្ពោធដាក់ឲ្យប្រើប្រាស់ជាផ្លូវការនូវអគារសិក្សាថ្មី១ខ្នងមាន៥បន្ទប់ និងអគារអន្តេវាសិកដ្ឋានសិស្សប្រុស១ខ្នង ក្រោមអធិបតីភាព ឯកឧត្តម បណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួង អប់រំ យុវជន និងកីឡា នៅវិទ្យាល័យស្រុកឯកភ្នំ ស្ថិតក្នុងភូមិព្រែកហ្លួង ឃុំព្រែកហ្លួង ស្រុកឯកភ្នំ ខេត្តបាត់ដំបង។
ពិធីនេះក៏មានការអញ្ជើញចូលរួមពី ឯកឧត្តម រដ្ឋលេខាធិការ អនុរដ្ឋលេខាធិការ គណៈប្រតិភូក្រសួង អប់រំ យុវជន និងកីឡា លោក ដានីញ៉ែល ម៉ាកូស៊ីកហ្វ្រ៊ីដ សហស្ថាបនិកសមាគមអង្គការសម្រេចសុបិន្តកុមារ មន្ត្រីរាជការ កងកម្លាំងប្រដាបអាវុធ លោកគ្រូ អ្នកគ្រូ សិស្សានុសិស្ស យុវជន យុវនារី និងប្រជាពលរដ្ឋក្នុងស្រុកឯកភ្នំ យ៉ាងច្រើនកុះករផងដែរ។
សូមជម្រាបថា អគារសិក្សា និងអន្តេវាសិកដ្ឋាននេះ ជាអំណោយរបស់អង្គការសមាគមសម្រេចសុបិន្តកុមារ ដែលមាន៥បន្ទប់ ដែលបំពាក់ដោយគ្រឿងសង្ហារឹម និងបង្គន់អនាម័យចំនួន៥ លើផ្ទៃដីទំហំ ៣៦០ម៉ែ្រតការ៉េ ដោយចាប់ផ្តើមកសាង កាលពីថ្ងៃទី ០១ កញ្ញា ឆ្នាំ២០១៨ រួចរាល់ជាស្ថាពរនៅថ្ងៃទី ៥ ខែធ្នូ ឆ្នាំ២០១៨ ដែលចំណាយទឹកប្រាក់អស់ចំនួន ៥៣,៦០០ដុល្លា និងអគារអន្តេវាសិកដ្ឋាន សាងសង់លើផ្ទៃដីទំហំ ៥៦ម៉ែត្រការ៉េ ចំណាចទឹកប្រាក់អស់ចំនួន ៤៣,០០០ ដុល្លា៕ រតនា
ប្រភព៖ រដ្ឋបាលខេត្តបាត់ដំបង