លោក Ernesto Braam ទីប្រឹក្សាយុទ្ធសាស្រ្តតំបន់អាស៊ីអាគ្នេយ៍ នៃស្ថានទូតហូឡង់ ប្រចាំប្រទេសសឹង្ហបុរី បានចូល​ជួបសំដែងការគួរសម ជាមួយលោក ឈិន សេងងួន អភិបាលខេត្តស្តីទី នៃគណៈអភិបាល​ខេត្តព្រះ​សីហនុ ក្នុងគោលបំណងពិភាក្សាការងារ ស្ដីពីការងារវិនិយោគ អភិវឌ្ឍន៍ក្នុងខេត្តព្រះសីហនុ និងព័ត៌មាន​ពាក់ព័ន្ធអំពីការអភិវឌ្ឍតំបន់សេដ្ឋកិច្ចពិសេសក្រុងព្រះសីហនុ កាលពីថ្ងៃព្រហស្បតិ៍ ១រោច ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៥ ខែតុលា ឆ្នាំ២០១៨ ។

    លោក ឈិន សេងងួន អភិបាលខេត្តស្តីទី មានប្រសាសន៍ថា សក្កដានុពលរបស់ខេត្តព្រះសីហនុ មាន​កំពង់​ផែទឹកជ្រៅ មានកុងតឺន័រឆ្លងកាត់ប្រមាណ ៧០ភាគរយ ជាតំបន់ឧស្សាហ៍កម្ម កសិកម្ម សេដ្ឋកិច្ច និងទេសចរណ៍ ដែលរាជរដ្ឋាភិបាលកម្ពុជា ចាត់ទុកខេត្តព្រះសីហនុ ជាបំពង់ករសេដ្ឋកិច្ច និងជាតំបន់សេដ្ឋកិច្ច​គំរូពហុបំណង​ធំជាងគេក្នុងព្រះរាជាណាចក្រកម្ពុជា។

   បច្ចុប្បន្នខេត្តព្រះសីហនុ មានតំបន់សេដ្ឋកិច្ចពិសេសចំនួន៤ រូមមាន៖១.តំបន់សេដ្ឋកិច្ចពិសេស​កំពង់ផែ​ស្វយ័ត​ក្រុងព្រះសីហនុ, ២.តំបន់សេដ្ឋកិច្ចពិសេស Adwood នៅស្រុកស្ទឹងហាវ, ៣.តំបន់សេដ្ឋកិច្ចពិសេស​ក្រុងព្រះសីហនុនៅឃុំបិតត្រាំង ស្រុកព្រៃនប់, និងទី៤.តំបន់សេដ្ឋកិច្ចពិសេស នៅស្រុកព្រៃនប់ ។ ក្នុងនោះតំបន់សេដ្ឋកិច្ចពិសេសក្រុងព្រះសីហនុ មានរោងចក្រ ជាង១០០ ស្រូបយកកម្លាំងពលកម្មជិត ៣ម៉ឺននាក់ កំពុងបំរើការងារសព្វថ្ងៃនេះ ។ លោកបានបន្តថា នៅខេត្ដព្រះសីហនុមានគម្រោង​វិនិយោគសរុប​ចំនួន ១៣៧គម្រោង មានទុនវិនិយោគសរុបប្រមាណ ៩,៤០៤លានដុល្លាអាមេរិក បច្ចុប្បន្នកំពុងដំណើរការ ៩៥គម្រោង មានទុនវិនិយោគ៦,៧៤៤លានដុល្លាអាមេរិក មិនដំណើរការ ៤២គម្រោង ទុនវិនិយោគសរុប ២,៥៧៤លានដុល្លាអាមេរិក និងលុបចេញ ៣គម្រោង ទុនវិនិយោគ ៨៥.៩៧លានដុល្លាអាមេរិក។

    លោក Ernesto Braam បានកោតសរសើរថ្នាក់ដឹកនាំខេត្តព្រះសីហនុ ខិតខំបំពេញការងារ ពិសេស​ការទាក់ទាញអ្នកវិនិយោគគិន មកធ្វើការវិនិយោគនៅខេត្តព្រះសីហនុ យ៉ាងគំហ៊ុករយៈពេល ២ឆ្នាំ ចុងក្រោយនេះ ធ្វើឱ្យកំណើនសេដ្ឋកិច្ច និងជីវភាពរស់នៅរបស់ប្រជាពលរដ្ឋកាន់ តែល្អប្រសើរឡើង។ លោកសង្ឃឹមថា នៅពេលខាងមុខ ខេត្តព្រះសីហនុ នឹងក្លាយជាគោលដៅទេសចរណ៍ វិនិយោគយ៉ាង​មមាញឹកធ្វើឱ្យមានការចាប់អារម្មណ៍សម្រាប់អ្នកវិនិយោគ និងទេសចរមកកាន់ខេត្តព្រះសីហនុ បន្ថែម​ទៀតជាក់ជាមិនខាន៕សិដ្ឋ

ប្រភព៖ រដ្ឋបាលខេត្តព្រះសីហនុ