ទីស្ដីការក្រសួងមហាផ្ទៃ៖ នារសៀល​ ថ្ងៃពុធទី២១ ខែមករា ឆ្នាំ២០២៦ លោកជំទាវ ជូ ប៊ុនអេង រដ្ឋលេខាធិការ​ ក្រសួងមហាផ្ទៃ តំណាងដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយក​រដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញចូលរួមក្នុងពិធីចុះហត្ថលេខាលើ អនុស្សរណៈនៃការយោគយល់ រវាង ក្រសួងមហាផ្ទៃនៃព្រះរាជាណាចក្រកកម្ពុជា និង អង្គការបេសកកម្មយុត្តិធម៌អន្តរជាតិ (IJM) ដែលមានវត្តមានចូលរួមពី លោកជំទាវ ឯកឧត្តម លោក លោកស្រី តំណាង អគ្គលេខាធិការដ្ឋាន នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស ក្រុមប្រឹក្សានីតិកម្ម នៃក្រសួងមហាផ្ទៃ នាយកដ្ឋានប្រឆាំងការជួញដូរមនុស្សនិងការពារអនីតិជន នៃអគ្គស្នងការដ្ឋាននគរបាលជាតិ និងអង្គការបេសកកម្មយុត្តិធម៌អន្តរជាតិ សរុបចំនួន ២១រូប។

អនុស្សរណៈនេះគឺធ្វើឡើងក្នុងគោលបំណងដើម្បីកំណត់កិច្ចសហប្រតិបត្តិការនិងការសម្របសម្រួលគ្នារវាង ក្រសួងមហាផ្ទៃ និងអង្គការ IJM ក្នុងការប្រយុទ្ធប្រឆាំងអំពើជួញដូរមនុស្ស និងអំពើរត់ពន្ធមនុស្ស រួមមាន អំពើកេងប្រវ័ញ្ចកម្លាំងពលកម្មក្នុងវិស័យការងារ នេសាទ ស្ត្រីបម្រើតាមផ្ទះ សុំទាន កម្មករសំណង់ រោងចក្រ កសិកម្ម និងឧស្សាហកម្ម ព្រមទាំងអាពាហ៍ពិពាហ៍ ផ្ទុយពីឆន្ទៈផងដែរ។

ដោយ៖ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ