នៅថ្ងៃអង្គារ ទី១០ ខែមិថុនា ឆ្នាំ២០២៥ អគ្គនាយកដ្ឋានសវនកម្មផ្ទៃក្នុង បានរៀបចំកិច្ចប្រជុំពិនិត្យវឌ្ឍនភាពការងារប្រចាំខែឧសភានិងលើកទិសដៅការងារខែមិថុនា ឆ្នាំ២០២៥ ក្រោមអធិបតីភាពដ៏ខ្ពង់ខ្ពស់ ឯកឧត្តម រស់ វរុណ រដ្ឋលេខាធិការ ក្រសួងមហាផ្ទៃ ។

កិច្ចប្រជុំនេះប្រព្រឹត្តទៅនៅសាលប្រជុំ អគ្គនាយកដ្ឋានសវនកម្មផ្ទៃក្នុង ជាន់ទី៣ ទីស្ដីការក្រសួងមហាផ្ទៃ ដោយមានការអញ្ជើញចូលរួមពី ឯកឧត្តម ឧត្ដមសេនីយ៍ឯក ងួន ស្រេង អគ្គនាយក នៃអគ្គនាយកដ្ឋានសវនកម្មផ្ទៃក្នុង អគ្គនាយករង លោក លោកស្រីប្រធាននាយកដ្ឋានទាំង៤ និងមន្ត្រីពាក់ព័ន្ធចំណុះអគ្គនាយកដ្ឋានសវនកម្មផ្ទៃក្នុង ព្រមទាំងមានការចូលរួមពីថ្នាក់ដឹកនាំជាប្រធានគណៈប្រតិភូ ចុះបំពេញបេសកកម្មតាមបណ្តាខេត្ត តាមប្រព័ន្ធ Online Google meet ផងដែរ ។

ជាមួយគ្នានេះ ឯកឧត្តម ឧត្តមសេនីយ៍ឯក ងួន ស្រេង បានកោតសរសើរដល់ថ្នាក់ដឹកនាំជាគណៈប្រតិភូ ដែលបានចុះបំពេញបេសកកម្មធ្វើសវនកម្មតាមបណ្តារាជធានី ខេត្ត ដែលបានខិតខំយកពេលវេលា កម្លាំងកាយចិត្ត អនុវត្តការងារស្របតាមផែនការសកម្មភាពប្រចាំឆ្នាំ និងគោលការណ៍ចង្អុលបង្ហាញ ខ្ពង់ខ្ពស់របស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តីរដ្ឋមន្រ្តីក្រសួងមហាផ្ទៃ លើការពង្រឹង ត្រួតពិនិត្យ និងការគ្រប់គ្រងប្រព័ន្ធគ្រប់គ្រងផ្ទៃក្នុងឱ្យស៊ីជម្រៅបន្ថែមទៀត ។

បន្ថែមពីនេះ ឯកឧត្តម ឧត្តមសេនីយ៍ឯក បានជំរុញណែនាំដល់បណ្តាគណៈប្រតិភូទាំងអស់ ត្រូវមានការយកចិត្តទុកដាក់ខ្ពស់ពេលដែលកំពុងបំពេញតួនាទីភារកិច្ច ត្រូវមានក្រមសីលធម៌ មានវិជ្ជាជីវៈ គុណតម្លៃ កិត្តិយស សេចក្តីថ្លៃថ្នូរ ជាសវនករ។ ជាកិច្ចបញ្ចប់ឯកឧត្តម រដ្ឋលេខាធិការ បានវាយតម្លៃខ្ពស់ នូវការខិតខំអនុវត្តតួនាទីភារកិច្ចរបស់ថ្នាក់ដឹកនាំអគ្គនាយកដ្ឋានសវនកម្មផ្ទៃក្នុង និងបានផ្តល់អនុសាសន៍ណែនាំ និងផ្តាំផ្ញើ បន្តការខិតខំការងារនេះជូនអង្គភាពក៏ដូចជាមុខមាត់របស់ក្រសួង ពិសេសមានភាពសាមគ្គីភាពផ្ទៃក្នុង គោរពវិន័យ ដើម្បីពង្រឹងប្រសិទ្ធភាពនិងនិរន្តរភាព ។

ប្រភព៖  អគ្គនាយកដ្ឋានសវនកម្មផ្ទៃក្នុង