ក្នុងឱកាសដែលអញ្ជើញចុះសំណេះសំណាល និងដោះស្រាយកង្វល់របស់ប្រជាពលរដ្ឋ ក្នុងឃុំព្រៃយុថ្កា ស្រុកកោះអណ្តែតនាព្រឹកថ្ងៃអង្គារ ១០កើត ខែពិសាខ ឆ្នាំច សំរឹទ្ធិស័ក ព.ស២៥៦១ ត្រូវនឹងថ្ងៃទី២៤ ខែមេសា ឆ្នាំ២០១៨ ឯកឧត្តម អ៊ូច ភា អភិបាលខេត្តតាកែវ បានបញ្ជាឱ្យអាជ្ញាស្រុក និងអាជ្ញាធរឃុំពេជសារ ឃុំក្រពុំឈូក និងឃុំព្រៃយុថ្កា សហការគ្នាទប់ស្កាត់ឱ្យបាននូវរថយន្តធុនធំដឹកទំនិញ ជាពិសេសរថយន្តដឹកស្កបើកបរតាមភូមិសាស្ត្រឃុំទាំង៣ ដើម្បីចុះទូកដឹកទៅប្រទេសវៀតណាម ដែលបណ្តាលឱ្យប៉ះពាល់ដល់ប្រជាពលរដ្ឋ ក៏ដូចជាផ្លូវលំនៅក្នុងភូមិឃុំ។

ឯកឧត្តមអភិបាលខេត្តបានមានប្រសាសន៍ថា បងប្អូនប្រជាពលរដ្ឋគាត់មានកង្វល់គឺជារឿងត្រឹមត្រូវពីព្រោះរថយន្តទាំងនោះធំពេក ក្នុងការបើកបរលើផ្លូវក្នុងភូមិឃុំរបស់យើង ដែលអាចបណ្តាលឱ្យប៉ះពាល់ដល់សុវត្ថិភាពបងប្អូនប្រជាពលរដ្ឋ ក៏ដូចជានាំឱ្យខូចខាតដល់ផ្លូវរបស់យើង។ ឯកឧត្តមបន្តថា យើងមិនហាមឃាត់គាត់ដឹកទំនិញទាំងនោះ ចុះតាមកំពង់ចំណតទូកនេះទេ ប៉ុន្តែសុំឱ្យគាត់រំលែកចាប់ពីផ្លូវជាតិមក ដឹកតាមរថយន្តតូចៗដែលមិនបង្កឱ្យប៉ះពាល់ដល់ផ្លូវលំតាមភូមិ តាមឃុំរបស់យើង។

ក្រោយពីស្តាប់នូវប្រសាសន៍របស់ឯកឧត្តមអភិបាលខេត្តរួចមក បងប្អូនប្រជាពលរដ្ឋបានសំដែងភាពសប្បាយរីករាយ និងថ្លែងអំណរគុណចំពោះឯកឧត្តមដែលបានជួយដោះស្រាយ និងមានវិធានការចំពោះបញ្ហានេះ។

ប្រភពព័ត៌មាន: រដ្ឋបាលខេត្តស្វាយរៀង (ថ្ងៃទី២៤ ខែមេសា ឆ្នាំ២០១៨)