នៅសាលប្រជុំសាលាខេត្តស្វាយរៀង ឯកឧត្តម ម៉ែន វិបុល អភិបាលខេត្ត និងជាប្រធានគណៈបញ្ជាការ​ឯកភាព​រដ្ឋបាលខេត្តស្វាយរៀង បានដឹកនាំកិច្ចប្រជុំគណៈបញ្ជាការឯកភាពរដ្ឋខេត្ត ដើម្បីពិនិត្យ និងដាក់ចេញនូវ​ទិសដៅការងាររក្សាសន្តិសុខ សុវត្ថិភាព និងសណ្ដាប់ធ្នាប់សាធារណៈនៅក្នុងខេត្ត នារសៀលថ្ងៃពុធ ទី២៨ ខែ​សីហា ឆ្នាំ២០១៩ ដោយមានការចូលរួមពី អភិបាលរងខេត្ត នាយករដ្ឋបាលសាលាខេត្ត មេបញ្ជាការកង​រាជ​អាវុធ​ហត្ថ មេបញ្ជាការរងប្រតិបត្តិការសឹករងខេត្ត ស្នងការរងនគរបាលខេត្ត ប្រធានមន្ទីរ អង្គភាព និងមន្ត្រី​ពាក់ព័ន្ធ​មួយ​​ចំនួន។
     នៅក្នុងកិច្ចប្រជុំនេះ ឯកឧត្ដមអភិបាលខេត្ត បានដាក់ចេញនូវទិសដៅការងារបន្តសំខាន់ៗមួយចំនួនរួមមាន៖ ១.ត្រូវបង្កើនការដឹកនាំយុទ្ធនាការប្រយុទ្ធប្រឆាំងគ្រឿងញៀនឲ្យកាន់តែសកម្ម និងផុលផុស ដើម្បីបង្ការ ទប់ស្កាត់ និងបង្រ្កាបបទល្មើសឲ្យកាន់តែទទួលបានលទផលល្អប្រសើរថែមទៀត ព្រមទាំងត្រូវអនុវត្តវិធានការច្បាប់​ឲ្យបាន​តឹងរ៉ឹង ចំពោះឧក្រិដ្ឋជនគ្រឿងញៀន, ២.ត្រូវបង្កើនការពង្រឹង និងរឹតបន្តឹងការអនុវត្តច្បាប់ចរាចរណ៍​ផ្លូវគោកឲ្យ​បាន​តឹងរ៉ឹងបំផុតនៅគ្រប់មូលដ្ឋាន និងធ្វើការពិន័យដោយគ្មានលើកលែង  និងយោគយល់ចំពោះអ្នក​ដែលល្មើស​ច្បាប់, ៣.ត្រូវមានផែនការ និងវិធានការឲ្យបានច្បាស់លាស់ក្នុងកិច្ចការទប់ស្កាត់រាល់បាតុភាព​បដិវដ្តន៍ពណ៌​ដែល​កើតចេញពីក្រុមប្រឆាំងក្រៅច្បាប់, ៤.ថែរក្សាការពារសន្តិសុខ សុវត្ថិភាព និងសណ្តាប់ធ្នាប់សាធារណៈឲ្យបាន​ល្អប្រសើរជូនប្រជាពលរដ្ឋ និងអ្នកវិនិយោគនៅក្នុងខេត្ត៕ រតនា

ប្រភព៖ រដ្ឋបាលខេត្តស្វាយរៀង