នារសៀលថ្ងៃសុក្រ ទី២៣ ខែសីហា ឆ្នាំ២០១៩នេះ នៅសាលប្រជុំសាលាខេត្តស្វាយរៀង មានរៀប​ចំពិធីបិ​ទ​វគ្គបណ្ដុះបណ្ដាលរំលឹកឡើងវិញ ស្ដីពីរបៀបកត់ត្រាការងារអត្រានុកូលដ្ឋាន និងរបៀបប្រើប្រាស់សៀវ​ភៅស្រង់​ស្ថិតិ​កំណើត អាពាហ៍ពិពាហ៍ មរណភាព និងលិខិតបទដ្ឋានគតិយុត្តថ្មីៗ ក្រោមអធិបតីភាពឯកឧត្តម យឹម សំអុល អនុប្រធាននាយកដ្ឋានអត្តសញ្ញាណកម្មក្រសួងមហាផ្ទៃ និងឯកឧត្តម រស់ ផារិទ្ធ អភិបាលរងខេត្តស្វាយ​រៀង តំណាងឯកឧត្តម ម៉ែន វិបុល អភិបាលខេត្ត ព្រមទាំងមានការចូលរួមពីលោក លោកស្រី មន្ត្រីទទួលបន្ទុក​ការ​ងារ​អត្រានុកូលដ្ឋាន សរុបចំនួន១៦៩នាក់។
     ​ឯកឧត្តម យឹម សំអុល អនុប្រធាននាយកដ្ឋានអត្តសញ្ញាណកម្មក្រសួងមហាផ្ទៃ បានផ្តាំផ្ញើនូវចំណុច​សំខាន់ៗ​មួ​យចំនួនទៅដល់ថ្នាក់ក្រុង-ស្រុក និងថ្នាក់ឃុំសង្កាត់មានដូចតទៅ៖

អំពីក្រុង-ស្រុក៖
- ត្រូវត្រៀមលក្ខណៈជានិច្ច ពេលឃុំ សង្កាត់ស្នើសុំសៀវភៅអត្រានុកូលដ្ឋាន
- សៀវភៅអត្រានុកូលដ្ឋានត្រូវគ្រប់គ្រងឲ្យបានច្បាស់លាស់ទៅតាមសៀវភៅ និងទៅតាមឆ្នាំនីមួយៗ
- ត្រូវមានផែនការចុះត្រួតពិនិត្យតាមដានការអនុវត្តការងារ និងត្រូវមានឆេកលីសនៅ​តាមឃុំ-សង្កាត់​អំពីបែបបទនៃការចុះបញ្ជី
- ត្រូវធ្វើរបាយការណ៍តាមខែនីមួយៗឲ្យបានទៀងទាត់ពីស្រុកទៅឃុំ-សង្កាត់ថ្ងៃណា ហើយពីឃុំទៅក្រុង ស្រុក ថ្ងៃណា

អំពីថ្នាក់ឃុំ-សង្កាត់៖

- មេឃុំ ចៅសង្កាត់មុនចេញសំបុត្រកំណើតត្រូវពិនិត្យឲ្យបានពេញលេញមុនចុះហត្ថលេខា
- ស្មៀនមានកាតព្វកិច្ចពិនិត្យ  និងទទួលខុសត្រូវរាល់ការផ្ទៀងផ្ទាត់ឲ្យបាន២ទៅ៣ដង​ហើយប្រាកដថា​ត្រឹម​ត្រូវមុន​ដាក់​ឲ្យមេឃុំ ចៅសង្កាត់ ចុះហត្ថលេខា
- ក្នុងដែនសមត្ថកិច្ចរបស់ឃុំ ឃុំត្រូវក្តាប់ឲ្យបាននូវពេលដែលប្រជាពលរដ្ឋមកទទួលសេវា ហើយត្រូវមាន​ការកត់​ត្រាឲ្យបានច្បាស់លាស់
-ត្រូវសហការជាមួយប៉ុស្តិ៍នគរបាលរដ្ឋបាល រាល់ការធ្វើឯកសារផ្សេងៗដែលមានការពាក់ព័ន្ធគ្នា
-ត្រូវធ្វើរបាយការណ៍អំពីការប្រើប្រាស់ចំនួនសៀវភៅឲ្យបានច្បាស់លាស់មកក្រុង-ស្រុក
     ឯកឧត្តម រស់ ផារិទ្ធ អភិបាលរងខេត្តបានមានប្រសាសន៍ ថ្លែងនូវឌ្ឍនភាពការងារ​អំពីការអភិវឌ្ឍន៍រីក​ចម្រើន​ក្រោមការខិតខំរបស់រដ្ឋបាលខេត្តស្វាយរៀង និងថ្លែងការអរគុណចំពោះអគ្គនាយកដ្ឋានអត្តសញ្ញាណ​កម្ម​ក្រសួងមហាផ្ទៃ និងលោក លោកស្រី ជាសិក្ខាកាមទាំងអស់ដែលបានយកចិត្តទុកដាក់ក្នុងការសិក្សា និងមាន​ចម្ងល់បានលើកជាសំនួរផ្សេងៗក្នុងវគ្គបណ្តុះបណ្តាលនេះ ហើយសង្ឃឹមថា នឹងយកទៅអនុវត្តឲ្យបានល្អប្រសើរ។ ឯកឧត្តមអភិបាលរងខេត្តក៏បានផ្តាំផ្ញើនូវចំណុចសំខាន់ៗដល់សិក្ខាកាមផងដែរដូចជា៖
-ត្រូវបំពេញតួនាទីភារកិច្ចជូនប្រជាពលរដ្ឋឲ្យបានល្អក្នុងការផ្តល់សេវាជូនពួកគាត់
-ត្រូវមានឆន្ទៈ ម្ចាស់ការ ភក្តីភាព មនសិការវិជ្ជាជីវៈ វប្បធម៌សេវាសាធារណៈ ធានាបម្រើសេវាទៅ​តាមតម្រូវការ​ឲ្យបានល្អជូនប្រជាពលរដ្ឋ
- ត្រូវខិតខំអនុវត្តគោលនយោបាយភូមិឃុំមានសុវត្ថិភាព
- បន្តចូលរួមទប់ស្កាត់ការជួញដូរ ការប្រើប្រាស់គ្រឿងញៀន
- បន្តសហការជំរុញ និងណែនាំប្រជាពលរដ្ឋគោរពច្បាប់ចរាចរណ៍ផ្លូវគោក ជំរុញផ្សព្វផ្សាយ​ដល់អ្នកបើក​បរ​រថយន្តដឹកកម្មករជាដើម
-ចូលរួមសហការ បង្ការ ទប់ស្តាត់ការគ្រោះថ្នាក់ចៃដន្យផ្សេងៗដែលកើត​ឡើងដោយ​សារអគ្គីភ័យដូចជា​ការត​ភ្ជាប់ចរន្តអគ្គីសនីដោយមិនមានបច្ចេកទេសជាដើម
-ត្រូវចាត់វិធានការ និងត្រៀមលក្ខណៈចំពោះគ្រោះមហន្តរាយផ្សេងៗដូចជាត្រៀមកន្លែងទីទួលសុវត្ថិភាព ក្នុងករណីមានទឹកជំនន់កើតឡើងនាពេលខាងមុខ
-ជំរុញនិងពិនិត្យមើលការបង្កបង្កើនផលរបស់ប្រជាពលរដ្ឋ និងដោះស្រាយបញ្ហាប្រឈមផ្សេងៗ
-រដ្ឋបាលឃុំសង្កាត់ត្រូវខិតខំផ្តល់សេវាតម្រូវការជូនប្រជាពលរដ្ឋឲ្យបានទាន់ពេលវេលាតាមច្បាប់កំណត់ ត្រូវធ្វើបាន ធ្វើអោយលឿន និងមានតម្លាភាព
-អភិបាលក្រុងស្រុក មេឃុំចៅសង្កាត់ត្រូវពិនិត្យនិងទប់ស្កាត់រាល់ការសាងសង់លំនៅ​ស្ថានណាដែលកៀក​និងផ្លូវសាធារណៈ៕ គឹមអាន

ប្រភព៖ រដ្ឋបាលខេត្តសៀមរាប