នារសៀលថ្ងៃសៅរិ៍ ទី២៤ ខែសីហា ឆ្នាំ២០១៩ ប្រតិភូខេត្តសៀមរាបដឹកនាំដោយឯកឧត្តម ទៀ សីហា អភិបាល នៃគណៈអភិបាលខេត្តបានជួបសម្តែងការគួរសម និងពិភាក្សាការងារជាមួយលោក Tang Liangzhi អភិបាលក្រុងឆុងឈីង(Chongqing) នៃសាធារណរដ្ឋប្រជាមានិតចិន ដើម្បីពង្រឹងកិច្ចសហប្រតិបត្តការ​ការងារ​រវាងរដ្ឋបាលខេត្តសៀមរាបជាមួយក្រុងឆុងឈីង(Chongqing) នៃសាធារណរដ្ឋប្រជាមានិតចិន នៅក្រុង​ឆុងឈីង នៃសាធារណរដ្ឋប្រជាមានិតចិន។
     ក្នុងជំនួបនេះដែរ ក៏ជាការពង្រឹងកិច្ចសហប្រតិបត្តការរវាងស្រុកវ៉ានចូវ(Wenzhou) ក្រុងឆុង​ឈីង​(Chongqing) និងក្រុងសៀមរាប ខេត្តសៀមរាប ជាមួយនឹងការពង្រឹងកិច្ចសហប្រតិបត្តការរវាង​ស្រុកវ៉ាន​ចូវនិងក្រុងសៀមរាបនេះនឹងមានពិធីចុះហត្ថលេខាក្នុងលិខិតផ្តួចផ្តើមជាមួយគ្នានាថ្ងៃទី២៦ ខែសីហា ឆ្នាំ២០១៩​ខាងមុខនេះ។ ការចុះហត្ថលេខាក្នុងលិខិតផ្តួចផ្តើមជាមួយគ្នានេះ ក្នុងគោលបំណងចងសម្ព័ន្ធមេត្រីភាព ទំនាក់​ទំនងមិត្តភាព និងកិច្ចសហប្រតិបត្តការលើវិស័យវប្បធម៌ សេដ្ឋកិច្ច អប់រំ បរិស្ថាន និងទេសចរណ៍ដែល​ស្របតាម​គោលនយោបាយរបស់ប្រទេសទាំងពីរ(កម្ពុជា-ចិន)។
     ជាមួយគ្នានេះដែរ លោក អភិបាលក្រុងឆុងឈីងក៏បានថ្លែងនូវអំណរគុណយ៉ាងជ្រាលជ្រៅចំពោះឯកឧត្តម ទៀ សីហា អភិបាល នៃគណៈអភិបាលខេត្តសៀមរាបដែល​បានដឹកនាំគណៈប្រតិភូអញ្ជើញចូល​រួមក្នុងកម្មវិធីនា​ពេលនេះ ក៏ដូចជាកម្មវិធី 2019 Smart China Expo ដែលនឹងប្រព្រឹត្តទៅនាថ្ងៃទី២៦ ខែសីហា ឆ្នាំ២០១៩​ខាងមុខនេះ៕គឹមអាន

ប្រភព៖ រដ្ឋបាលខេត្តសៀមរាប