លោកជំទាវ ហ៊ុន ចាន់ដានី អនុរដ្ឋលេខាធិការ ក្រសួងទេសចរណ៍ និង លោក លី សារ៉ារិទ្ធ អភិបាលរងខេត្ត តំណាងដ៏ខ្ពង់ខ្ពស់ឯកឧត្តម អ៊ុន ចាន់ដា អភិបាលខេត្ត អញ្ជើញអធិបតីក្នុងវគ្គបណ្ដុះបណ្ដាល និងផ្សព្វផ្សាយអនុសាសន៍ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រម្ពុជា និងការបញ្ជ្រាបយេនឌ័រក្នុងវិស័យទេសចរណ៍នៅក្នុងខេត្តព្រះវិហារ នៅទីរួមខេត្តព្រះវិហារ ។
លោក លី សារ៉ារិទ្ធ អភិបាលរងខេត្ត នាព្រឹកថ្ងៃ០៧រោច ខែផល្គុន ឆ្នាំច សំរិទ្ធិស័ក ពស ២៥៦២ ត្រូវនឹងថ្ងៃទី២៧ ខែ មីនា ឆ្នាំ២០១៩ បានមានប្រសាសន៍ស្តីពីផែនការយុទ្ធសាស្រ្ដអភិវឌ្ឍទេសចរណ៍ ៥ ឆ្នាំ (២០១៩-២០២៣)របស់រដ្ឋបាលខេត្តព្រះវិហារ ផ្ដោតទៅលើការពង្រីក និងកាពង្រឹង ការអភិវឌ្ឍនូវផលិតផលទេសចរណ៍ ពង្រឹងគុណភាពសេវាកម្មទេសចរណ៍, ការអភិវឌ្ឍធនធានមនុស្ស ការផ្សព្វផ្សាយទេសចរណ៍ លើសពីនោះទៀតផែនការអភិវឌ្ឍបានរំលេចផងដែរនូវការលើកកម្ពស់ការបញ្ជ្រាបការងារយេនឌ័រនៅក្នុងវិស័យទេសចរណ៍ផងដែរ ។ លើសពីនោះទៅទៀត លោកអភិបាលរង អំពាវនាវឲ្យមានការចូលរួមររក្សានូវអនាម័យបរិស្ថាន រៀបចំសណ្ដាប់ធ្នាប់ របៀបរៀបរយឱ្យបានល្អ ដើម្បីទីក្រុងស្អាត ទីក្រុងបៃតង ផ្ដល់ភាពកក់ក្ដៅ និងទាក់ទាញទេសចរឱ្យមកកាន់តែច្រើនឡើងថែមទៀត ។
សូមបញ្ជាក់ផងដែរថា យោងតាមរបាយការណ៍របស់មន្ទីរទេសចរណ៍ខេត្ត បានបង្ហាញថាក្នុងឆ្នាំ២០១៨ កន្លងទៅខេត្តទទួលភ្ញៀវទេសចរសរុបចំនួន ៤៦៩,៨៣៦ នាក់ ធៀបទៅនឹងឆ្នាំ២០១៧ កើនឡើង ៥.២៤% ក្នុងនោះ ៖
ភ្ញៀវទេសចរជាតិ មានចំនួន ៤០៤,៣៥៨ នាក់ កើនឡើង ៥.០៣% ភ្ញៀវទេសចរអន្តរជាតិ មានចំនួន ៦៥,៤៧៨ នាក់ កើនឡើង ៦.៥៣% ។ ភ្ញៀវទេសចរដែលបានស្នាក់នៅក្នុងខេត្តសរុបមានចំនួន ១៥០,៨៥៩ នាក់ ក្នុងនោះ ភ្ញៀវទេសចរជាតិមានចំនួន ១៤១,៩៩៦ នាក់ កើនឡើង ៣៧.១១% និងភ្ញៀវទេសចរអន្តរជាតិ មានចំនួន ៨,៨៦៣ នាក់ កើនឡើង ៣២.៤៨%៕ មុនីរម្យ
ប្រភព៖ រដ្ឋបាលខេត្តព្រះវិហារ
