នារសៀលថ្ងៃអង្គារ​ ០២រោច​ ខែបុស្ស​ ឆ្នាំច​ សំរិទ្ធិស័ក​ ព.ស២៥៦២​ ត្រូវនឹងថ្ងៃទី២២ ខែមករា ឆ្នាំ២០១៩ លោក ពៅ​ ពិសិដ្ឋ អភិបាលរងខេត្តសៀមរាប តំណាងដ៏ខ្ពង់ខ្ពស់ឯកឧត្តម ទៀ​ សីហា​ អភិបាលខេត្តសៀមរាប​ បានអញ្ជើញជាអធិបតីក្នុងពិធីប្រកាសចូលកាន់មុខតំណែង​​លោកស្រី ទី យិតហាន ជាអភិបាលរងស្រុក​ជីក្រែង។

      ពិធីប្រកាសនេះ លោក ពៅ​ ពិសិដ្ឋ​ ក៏បានលើកឡើងថា ការប្រកាសតែងតាំងចូលកាន់មុខតំណែងនេះ វា​ជា​បែបបទនីតិវិធីបានកំណត់ក្នុងច្បាប់ ហើយត្រូវបានយកមកអនុវត្តក្នុងប្រព័ន្ធរដ្ឋបាល សំដៅធ្វើយ៉ាង​ណា​ឲ្យ​ការ​គ្រប់គ្រង ដឹកនាំរដ្ឋបាលកាន់តែមានប្រសិទ្ធភាព ក្នុងការឆ្លើយតបនឹងតម្រូវការនៅមូលដ្ឋាន។

      លោក ពៅ​ ពិសិដ្ឋ ក៏បានលើកឡើងថា នេះជាប្រពៃណីរបស់ថ្នាក់ដឹកនាំមន្ត្រីរាជការនៃរាជរដ្ឋាភិបាល ពុំ​មាន​អ្វីដែលថ្មី និងប្លែកនោះទេ តែសំខាន់នោះ គឺចរន្តនៃការងាររដ្ឋបាលពុំមានការប្រែប្រួល ដោយ​រដ្ឋបាល​ស្រុក ត្រូវតែបន្តនិរន្តរភាពការងារបន្តទៀត ដោយប្រមូលផ្តុំកម្លាំងសរុបសំដៅជម្រុញ  បង្កើននូវ​ប្រសិទ្ធភាព​ការងារដឹកនាំ គ្រប់គ្រងរដ្ឋបាលស្រុកឲ្យកាន់តែមានប្រសិទ្ធភាព ក្នុងការបម្រើនូវសេវា​សាធារណៈជូន​ដល់​ប្រជាពល​រដ្ឋ៕ រតនា

ប្រភព៖ រដ្ឋបាលខេត្តសៀមរាប