ឯកឧត្ដម វ៉ា ថន អភិបាលនៃគណៈអភិបាលខេត្តក្រចេះ និងជាប្រធានសហភាពសហព័ន្ធយុវជនកម្ពុជាខេត្ត បានអញ្ជើញជាអធិបតីក្នុងកិច្ចប្រជុំផ្សព្វផ្សាយលទ្ធផលមហាសន្និបាតតំណាងទូទាំងប្រទេស លើកទី៤ របស់សហភាពសហព័ន្ធយុវជនកម្ពុជា និងបូកសរុបលទ្ធផលការងារ របស់គណៈកម្មាធិការ(សសយក)ខេត្តក្រចេះឆ្នាំ២០១៨ និងលើកទិសដៅការងារឆ្នាំ២០១៩ នាព្រឹកអាទិត្យ ១៥កើត ខែបុស្ស ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២០ ខែមករា ឆ្នាំ២០១៩។
យុវជនទាំងអស់ត្រូវស្វែងយល់ និងយល់ដឹងឲ្យបានជ្រួតជ្រាបអំពីសេចក្តីសម្រេចចិត្តនៃលទ្ធផលមហាសន្និបាត ប្រធានបទសំខាន់ៗនៃកិច្ចពិភាក្សា ផែនការយុទ្ធសាស្ត្រដែលគ្រប់យន្តការចំណុះត្រូវបន្តខិតខំអនុវត្តសម្រេចឲ្យបាន រាប់ទាំងអនុសាសន៍ មេរៀនដកពិសោធ និងចក្ខុវិស័យនៃការដឹកនាំជាតិ មាតុភូមិ ប្រជាជន យុវជន និងមហាជនរបស់ថ្នាក់ដឹកនាំ សម្រាប់ជាមូលដ្ឋានក្នុងការពង្រឹងពង្រីកសកម្មភាពការងារនៅតាមមូលដ្ឋានរបស់ខ្លួន លើកកម្ពស់ការយល់ដឹង ការអភិវឌ្ឍខ្លួនឯង និងការកសាងសុភមង្គលក្នុងក្រុមគ្រួសារ ព្រមទាំងចូលរួមចំណែកនៅក្នុងការកសាងមូលដ្ឋានទាំងក្នុងក្របខណ្ឌ សេដ្ឋកិច្ច សង្គម វប្បធម៌ នវានុវត្តន៍ និងការលើកកម្ពស់កិត្យានុភាពជាតិក្នុងសម័យឧស្សាហូបនីយម្ម ឌីជីថលភាវូបនីយកម្ម សំដៅរួមគ្នាធ្វើឲ្យអនាគតកម្ពុជាកាន់តែប្រសើរឡើង។
ឯកឧត្ដម បានបន្ថែមទៀតថាចំពោះយុវជន យុវនារីសហភាពសហព័ន្ធយុវជនកម្ពុជាខេត្តក្រចេះទាំងអស់ ដែលនាពេលកន្លងមកនេះ បានចូលរួមចំណែកយ៉ាងសកម្មជាមួយអាជ្ញាធរដែនដី និងអង្គភាពនានា ក្នុងបេសកកម្មសង្គមជួយដោះស្រាយ និងបម្រើឲ្យផលប្រយោជន៍ប្រជាពលរដ្ឋ និងយុវជន យុវនារី តួយ៉ាង ការបរិច្ចាគឈាម ការសហការចុះជួយពិនិត្យសុខភាពប្រជាពលរដ្ឋឥតគិតថ្លៃ ការចុះសួរសុខទុក្ខ និងការជួយសាងសង់ផ្ទះជូនប្រជាពលរដ្ឋដែលគ្រោះថ្នាក់ និងគ្រោះធម្មជាតិខ្យល់កន្ត្រាក់ ព្រមទាំងការរៀបចំការប្រកួតកីឡា ការចូលរួមរៀបចំបោះជំរុំ ក្នុងព្រឹត្តិការណ៍៤០ទៅកាន់ប្រវត្តិសាស្ត្រ ក្រោមវត្តមានឯកឧត្ដមហ៊ុន ម៉ានី ប្រធានសហភាពសហព័ន្ធយុវជនកម្ពុជា កាលពីដើមឆ្នាំនេះជាដើម។
ឯកឧត្ដម វ៉ា ថន បានបន្តថាទាំងអស់នេះ មិនត្រឹមតែជាការរួមចំណែកដោះស្រាយបញ្ហាប្រឈមនានានៅក្នុងដំណើរការអភិវឌ្ឍន៍សេដ្ឋកិច្ច-សង្គម និងប្រទេសជាតិប៉ុណ្ណោះទេ ប៉ុន្តែថែមទាំងជាឱកាសម្រាប់យុវជន យុវនារី ក្នុងការអភិវឌ្ឍសមត្ថភាព ដើម្បីក្លាយខ្លួនជាសសរទ្រូងដ៏រឹងមាំរបស់ប្រទេសជាតិ និងស័ក្តិសមជាទំពាំងស្នងឫស្សីដ៏ពិតប្រាកដថែមទៀតផង។
ជាចុងបញ្ចប់ ឯកឧត្ដមប្រធានសសយកខេត្ត បានផ្ដាំផ្ញើដល់ សមាជិក សមាជិកា សសយក ទាំងអស់ ត្រូវខិតខំពង្រឹងគុណតម្លៃ ពង្រីកសមាជិកភាព និងគុណភាពជាមួយរចនាសម្ព័ន្ធ ខេត្ត ក្រុង ស្រុក ដល់មូលដ្ឋានឃុំសង្កាត់ និងតាមបណ្ដោលវិទ្យាល័យនានាក្នុងខេត្ត ដែលជាកត្តាមូលដ្ឋាននៃការពង្រីកវិសាលភាពការងារ និងកិត្យានុភាពរបស់ សសយក និងត្រូវបន្តសកម្មភាពវប្បធម៌ ប្រពៃណី ការស្វែងយល់ពីប្រវត្តិសាស្ត្រ ការចូលរួមក្នុងវិស័យអប់រំ សង្គម មនុស្សធម៌ កីឡា សិល្បៈកំសាន្ត ដែលអាចទាក់ទាញយុវជនគ្រប់និន្នាការ និងទំនួលខុសត្រូវរបស់យុវជនចំពោះប្រទេសជាតិ តាមរយៈយុទ្ធនាការធ្វើល្អជាដើម៕មុនីរម្យ
ប្រភព៖រដ្ឋបាលខេត្តក្រចេះ
