នៅថ្ងៃទី១១ ខែសីហា ឆ្នាំ២០២៣ រដ្ឋបាលខេត្តសៀមរាប រៀបចំកិច្ចប្រជុំគណៈកម្មាធិការជំរុញចលនាភូមិ១ ផលិតផល១ ខេត្តសៀមរាប និង សមាជិកភូមិ១ ផលិតផល១ ទាំង៤២មុខ និងសមាជិកត្រៀមបម្រុង ដើម្បីពិភាក្សាក្នុងការរៀបចំវេទិកាផ្គូផ្គង ភូមិ១ ផលិតផល១ ក្រោមអធិបតីភាព លោក យុន លីនណេ អភិបាលរង នៃគណៈអភិបាលខេត្តសៀមរាប តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប។ សូមបញ្ជាក់ផងដែរថា រដ្ឋបាលខេត្តនឹងគ្រោងរៀបចំវេទិកាផ្គូផ្គងផលិតផលភូមិមួយ ផលិតផលមួយ ខេត្តសៀមរាប នៅថ្ងៃទី២៥ ខែសីហា ឆ្នាំ២០២៣ រយៈពេល ០១ថ្ងៃ និងអនុញ្ញាតឱ្យសមាជិកភូមិ១ ផលិត១ អាចដាក់តាំង បង្ហាញផលិតផលរយៈពេល ០២ថ្ងៃ បន្តទៀត បន្ទាប់ពីថ្ងៃផ្គូផ្គងផលិតផល។ ជាមួយគ្នានេះ គណៈកម្មាធិការជាតិជំរុញភូមិ១ ផលិតផល១ នៃទីស្តីការគណៈរដ្ឋមន្ត្រី នឹងរៀបចំពិព័រណ៍ផលិតផលភូមិ១ ផលិតផល១ នៅសួនច្បារខាងជើងស្ពានថ្មព្រះរាជដំណាក់ ដែលនឹងប្រព្រឹត្តទៅនាថ្ងៃទី២៩ ខែសីហា ដល់ថ្ងៃទី២ ខែកញ្ញា ឆ្នាំ២០២៣ខាងមុខនេះ សូមបងប្អូនចូលរួមឱ្យបានច្រើនកុះករ ដើម្បីគាំទ្រផលិតផលខ្មែរយើង៕ ប្រភព៖ រដ្ឋបាលខេត្តសៀមរាប