ខេត្តបន្ទាយមានជ័យ ៖ នៅថ្ងៃទី២៣ ខែមិថុនា ឆ្នាំ២០២៣ ឯកឧត្ដម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ និងជាប្រធានកិត្តិយសសមាគមអតីតយុទ្ធជនកម្ពុជាខេត្ត បានអញ្ជើញជាអធិបតីក្នុងពិធីជួបសំណេះសំណាល និងបំពាក់គ្រឿងឥស្សរិយយស ជូនអតីតយុទ្ធជនកម្ពុជាចំនួន ៧៣៣នាក់ ក្នុងស្រុកមង្គលបូរី។

លោកវរសេនីយ៍ឯក ស៊ិន ណារ៉ាក់ អធិការនគរបាល និងជាប្រធានសមាគមអតីតយុទ្ធជនស្រុកមង្គលបូរី បានលើកឡើងថា នេះជាលើកទី២ ហើយ ដែលអតីតយុទ្ធជនស្រុកទទួលការបំពាក់គ្រឿងឥស្សរិយយ ដោយលើកទី១ ក្នុងឆ្នាំ២០១៨ និងលើកទី២ ឆ្នាំ២០២៣ ចំនួន ៧៣៣នាក់។

នាឱកាសនោះ ឯកឧត្តម  អ៊ុំ រាត្រី អភិបាលខេត្តបន្ទាយមានជ័យ បានធ្វើការផ្ដាំផ្ញើ និងការសួរសុខទុក្ខពីសំណាក់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា ជាប្រធានកិត្តិយសសមាគម និងសម្តេចកិត្តិព្រឹទ្ធបណ្ឌិត ប៊ុន រ៉ានី ជូនដល់បងប្អូនអតីតយុទ្ធជនកម្ពុជា និងក្រុមគ្រួសារទាំឡាយ។

ឯកឧត្តម អភិបាលខេត្ត ក៏បានថ្លែងអំណរគុណដល់ក្រុមការងារសមាគមអតីតយុទ្ធជនកម្ពុជាខេត្តបន្ទាយមានជ័យ បានរួមចំណែកជួយចាត់ចែងការងារ មើលការខុសត្រូវ និងយកចិត្តទុកដាក់ចំពោះបងប្អូនអតីតយុទ្ធជន។

សូមបញ្ជាក់ថា ក្រៅពីបំពាក់គ្រឿងឥស្សរិយយស អតីតយុទ្ធជន ក៏ទទួលបានប្រាក់ឧបត្ថម្ភមួយចំនួនផងដែរ៕

ប្រភព ៖ រដ្ឋបាលខេត្តបន្ទាយមានជ័យ