នៅថ្ងៃទី៣០ ខែមីនា ឆ្នាំ២០២៣នេះ រដ្ឋបាលរាជធានីភ្នំពេញ រៀបចំពិធីសំណេះសំណាលចែកប័ណ្ណបេឡាជាតិសន្តិសុខ (ប.ស.ស) និងអំណោយមនុស្សធម៌ ជូនដល់ពលរដ្ឋក្រីក្រក្នុងអង្គការមូលនិធិកុមារកម្ពុជា ស្ថិតក្នុងសង្កាត់ស្ទឹងមានជ័យទី២ ខណ្ឌមានជ័យ ក្រោមអធិបតីភាព លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត តំណាងដ៏ខ្ពង់ខ្ពស់របស់សម្តេចតេជោ នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដោយមានការអញ្ជើញចូលរួមពី ឯកឧត្ដម ឃួង ស្រេង អភិបាល នៃគណៈអភិបាលរាជធានីភ្នំពេញ និងលោកជំទាវ ជា ស៊ីណា ឃួងស្រេង ព្រមទាំងលោក ហែម ដារិទ្ធ អភិបាលខណ្ឌមានជ័យ។

លោកជំទាវបណ្ឌិត បានមានប្រសាសន៍លើកឡើងថា ការចុះចែកអំណោយ និងផ្តល់ប័ណ្ណបេទ្បាជាតិសន្តិសុខសង្គមចំនួន ៨៤០សន្លឹក ជូនពលរដ្ឋក្រីក្រក្នុងអង្គការមូលនិធិកុមារកម្ពុជានេះ ធ្វើឡើងទៅតាមការចង្អុលបង្ហាញពី សម្តេចតេជោ នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ហើយនេះក៏មិនមែនជាលើកទី១ដែរ ដែលលោកជំទាវ និងក្រុមការងារចុះមកជួយរំលែកការលំបាកបងប្អូនប្រជាពលរដ្ឋ នៅអង្គការមូលនិធិកុមារកម្ពុជានេះ។ ជាក់ស្តែងកាលពីសម័យនៃការរីករាលដាលជម្ងឺកូវីដ-១៩ អង្គការមូលនិធិកុមារកម្ពុជា ត្រូវបានយកចិត្តទុកដាក់ មិនត្រឹមតែផ្តល់ជូននូវឧបករណ៍ការពារកូវីដ-១៩ ប៉ុណ្ណោះទេ បងប្អូនប្រជាពលរដ្ឋដែលមានជម្ងឺកូវីដ-១៩ ក៏ត្រូវបានដឹកបញ្ជូនទៅព្យាបាលដោយមិនអស់លុយថែមទៀតផងដែរ។

លោកជំទាវបណ្ឌិត បានបញ្ជាក់ថា ប្រជាពលរដ្ឋដែលទទួលបានប័ណ្ណបេទ្បាជាតិសន្តិសុខសង្គមនេះមានចំនួន ៥៥៥គ្រួសារ ស្មើនឹង ៨៤០សន្លឹក ហើយក្រៅពីទទួលបានប័ណ្ណបេទ្បាជាតិសន្តិសុខសង្គមហើយ គឺបានទទួលអំណោយដ៏ថ្លៃថ្លារបស់សម្តេចអគ្គមហាសេនាបតីតេជោហ៊ុន សែន និងសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ថែមទៀតផង ដោយក្នុងមួយគ្រួសារទទួលបានអង្ករ ២៥គីឡូក្រាម មី ត្រីខ ទឹកត្រី ទឹកស៊ីអ៊ីវផងដែរ៕

ប្រភព៖ រដ្ឋបាលរាជធានីភ្នំពេញ