នារសៀលថ្ងៃពុធ ទី០៣ ខែឧសភា  ឆ្នាំ២០២៣ ឯកឧត្តម ស្វាយ សំអ៊ាង អភិបាលនៃគណៈអភិបាល​ខេត្ត បានអញ្ជើញដឹកនាំកិច្ចប្រជុំស្តីពីការត្រួតពិនិត្យវឌ្ឍនភាពការ​ងាររដ្ឋ​បាល​ខេត្តប្រចាំខែមេសា ឆ្នាំ​២០២៣ និងលើកទិសដៅការងារអនុវត្តឆ្នាំ២០២៣ដោយ​មានការអ​ញ្ជើញ​ចូលរួមដោយ អភិបាល​រងខេត្ត នាយក នាយករងរដ្ឋបាលសាលាខេត្ត អភិបាល អភិបាលរងក្រុង ស្រុក កម្លាំងប្រដាប់អាវុ​​ធទាំងបីប្រភេទ លោក លោកស្រីប្រធាន អនុប្រធានមន្ទីរជំនាញ នាយក នាយករង​ទីចាត់ អង្គភាព ចំណុះសាលាខេត្តនិងមន្រ្តីពាក់ព័ន្ធ​មួយចំនួនទៀត។

របៀបវារៈសំខាន់ៗនៃកិច្ចប្រជុំរួមមាន៖ ១)-មតិបើកកិច្ចប្រជុំរបស់ឯកឧត្តមអធិបតីអង្គប្រជុំ, ២)-ការចូលរួមពិនិត្យ និងផ្តល់យោបល់លើសេចក្តីព្រាងរបាយការណ៍ប្រចាំខែមេសា ឆ្នាំ២០២៣ របស់រដ្ឋបាលខេត្ត និងលើកទិសដៅការងារខែបន្ទាប់,  ៣)-មតិយោបល់របស់លោក លោកស្រី សមាជិក  សមាជិការអង្គប្រជុំ, ៤)-ផ្សេងៗ, ៥)- មតិបូកសរុប និងបិទកិច្ចប្រជុំ។

ឯកឧត្តម ស្វាយ សំអ៊ាង បានបន្តថ្លែងអំណរគុណដល់អាជ្ញាក្រុង  ស្រុក  ឃុំ  សង្កាត់ នៅក្នុងពិធីដង្ហែព្រះអគ្គីជ័យ ដែលបានដឹកនាំប្រជាពលរដ្ឋមកចូលរួមអបអរសាទ ដែលជាព្រឹត្តិការជាប្រវត្តិសាស្រ្ត នៃពិធី ដង្ហែភ្លើងគុប យ៉ាងអធិកអធម៌ ធ្វើឱ្យខេត្តស្ទឹងត្រែងទទួលបានជោគជ័យនៃការដង្ហែព្រះអគ្គីជ័យរហូតដល់ព្រំប្រទល់ខេត្តក្រចេះ។

នាឱកាសនោះ ឯកឧត្តម ស្វាយ សំអ៊ាង មានប្រសាសន៍ថា «កិច្ចប្រជុំនេះ មានសារៈសំខាន់ណាស់ ដើម្បីរួមគ្នាពិនិត្យ ពិភាក្សា និងវាយតម្លៃទៅលើវឌ្ឍនភាពនៃការអនុវត្តការងារ កាលពីខែមេសា ឆ្នាំ២០២៣ កន្លងមក ដើម្បីរួមគ្នាស្វែងរកដំណោះស្រាយលើបញ្ហាប្រឈមនានា ដែលបានជួបប្រទះ សំដៅធ្វើយ៉ាងណាឱ្យការអនុវត្តការងារនៅខែថ្មី ទទួលបានលទ្ធផលកាន់តែល្អប្រសើរថែមទៀត»។

ឯកឧត្តមអភិបាលខេត្ត  មានប្រសាសន៍គ្រើនរំលឹក ដល់កំលាំងប្រដាប់អាវុធមានសមត្ថកិច្ចត្រូវសហការគ្នាឱ្យល្អ ត្រូវពិនិត្យ លើបទល្មើសព្រៃឈើដែលកើតឡើងនៅខេត្តស្ទឹងត្រែង ម្យ៉ាងទៀតឱ្យកងកំលាំងប្រដាប់អាវុធទាំង៣ ប្រភេទត្រូវរក្សាឱ្យបាននូវសន្តិសុខសណ្តាប់ធ្នាប់ នៅក្នុងរដូវ ឃោសនាបោះឆ្នោត និងការបោះឆ្នោតជាតិ ជ្រើសរើសតំណាងរាស្រ្តអាណត្តិទី៧ ដែលនឹងឈានចូលមកដល់ខាងមុខនេះ៕

ប្រភព៖ រដ្ឋបាលខេត្តស្ទឹងត្រែង