នៅថ្ងៃពុធ ទី២៦ ខែមេសា ឆ្នាំ២០២៣ រដ្ឋបាលខេត្តកោះកុង បានរៀបចំសិក្ខាសាលាផ្សព្វផ្សាយស្តីពី “សារៈប្រយោជន៍នៃការចុះបញ្ជីវិស្វករនៅគណៈវិស្វករកម្ពុជា” ក្រោមអធិបតីភាព ឯកឧត្តម សុខុម រិទ្ធីវុធ អគ្គលេខាធិការ និងជាសមាជិកអចិន្រ្តៃយ៍ក្រុមប្រឹក្សាគណៈវិស្វករកម្ពុជា លោក សុខ សុទ្ធី អភិបាលរង នៃគណៈអភិបាលខេត្តកោះកុង ព្រមទាំងអ្នកពាក់ព័ន្ធជាច្រើនរូបទៀត។

លោកអភិបាលរងខេត្ត បានអបអរសាទរនូវលទ្ធផលដ៏ត្រចះត្រចង់របស់វិស្វករជាតិយើង ដែលបានរួមចំណែកជាមួយរាជរដ្ឋាភិបាលបង្កើតឡើងនូវគណៈវិស្វករកម្ពុជាដ៏មានសារៈសំខាន់មួយនេះ ដើម្បីធានាបាននូវការអភិវឌ្ឍដោយចីរភាពក្នុងបរិបទកម្ពុជា រាជរដ្ឋាភិបាលក្រោមការដឹកនាំដ៏ឈ្លាសវៃ និងទទួលខុសត្រូវខ្ពស់ របស់សម្តេចអគ្គមហាសេនាបតីតេជោ នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានកិត្តិយសគណៈវិស្វករកម្ពុជាបានអនុវត្តជាជំហ៊ានៗ និងដោយជោគជ័យ។ ដោយឡែកការអភិវឌ្ឍជាតិ និងសមាហរណកម្មសេវាវិស្វកម្មតាមស្មារតី នៃកិច្ចព្រមព្រៀងទទួលស្គាល់គ្នាទៅវិញទៅមក លើសេវាវិស្វកម្មក្នុងតំបន់អាស៊ាន ដែលប្រព្រឹត្តទៅដោយរលូន និងទទួលបានជោគជ័យនោះ ចាំបាច់ត្រូវមានមូលដ្ឋានគតិយុត្ត និងធនធានបញ្ញវន្តវិស្វករជាតិប្រកបដោយគុណភាពស្តង់ដារមួយ ដែលអាចទទួលយកបាន។

លោកអភិបាលរងខេត្ត បានបន្ថែមថា នេះជាកិច្ចការមួយដ៏សំខាន់ព្រោះយើងអាចព្យាករណ៍ដឹងពីបរិមាណ និងគុណភាពធនធានបញ្ញវន្តវិស្វករជាតិយើង ថាតើអាចបំពេញតម្រូវការសេដ្ឋកិច្ចសង្គមបានត្រឹមកម្រិតណា ហើយត្រូវកែលំអរបំពេញបន្ថែមលើចំណុចខ្វះខាតបានយ៉ាងដូចម្តេច។ ការអភិវឌ្ឍន៍សមត្ថភាពជំនាញ ជាកាតព្វកិច្ចមួយទៀតដែលវិស្វករត្រូវបំពេញតាមនិយាមកំណត់ ព្រោះបច្ចេកវិទ្យាមានការវិវត្តរីកចម្រើនឥតឈប់ឈរ តម្រូវឱ្យស្ថាប័នគ្រប់គ្រងវិស្វករធ្វើផែនការបណ្តុះបណ្តាលបន្ត តាមរយៈសិក្ខាសាលា វគ្គបំប៉នខ្លី ឬវែងឱ្យបានសមស្រប និងទាន់សម័យ។ ការប្រព្រឹត្តទៅរបស់គណៈវិស្វករកម្ពុជា បានឆ្លុះបញ្ចាំងពីគុណប្រយោជន៍សាធារណៈសហគមន៍វិជ្ជាជីវៈ និងរូបវន្តបុគ្គលជាវិស្វករផ្ទាល់។

លោកអភិបាលរងខេត្ត បានបន្តថា យើងមានធនធានបញ្ញវន្តជាតិ ជាវិស្វករមានកម្រិតវិជ្ជាជីវៈស្តង់ដារ ព្រមទាំងសមត្ថភាពជំនាញ និងមានក្រមសីលធម៌វិជ្ជាជីវៈ គឺជាសក្តានុពលមួយផ្នែកដ៏មានប្រសិទ្ធភាពក្នុងការអភិវឌ្ឍសង្គមសេដ្ឋកិច្ចតាមរយៈលទ្ធផលការងារល្អ និងការទទួលខុសត្រូវចំពោះភារកិច្ចដែលប្រទេសជាតិផ្តល់ឱ្យ។

ឆ្លៀតក្នុងឱកាសនោះ​ លោកអភិបាលរងខេត្ត បានមានប្រសាសន៍បន្ថែមថា ក្នុងន័យដ៏សំខាន់នេះ លោកយល់ឃើញថា គណៈវិស្វករកម្ពុជាត្រូវមានគោលបំណងចម្បង២ ទី១. គឺធ្វើឱ្យគុណភាពប្រតិបត្តិជំនាញរបស់វិស្វករជាតិមានស្តង់ដារ ដើម្បីឱ្យមានការទទួលស្គាល់គ្នាទៅវិញទៅមករវាងបណ្តាប្រទេសជាសមាជិកអាស៊ានស្របទៅតាមកិច្ចព្រមព្រៀង ដែលបានចុះហត្ថលេខាជាមួយគ្នានៅថ្ងៃទី០៩ ខែធ្នូ ឆ្នាំ២០០៥ នៅទីក្រុងកូឡាឡាំពួរ ប្រទេសម៉ាឡេស៊ី។ ទី២. គឺមានក្រមសីលធម៌វិជ្ជាជីវៈល្អ ដើម្បីទទួលឱកាសការងារទូលំទូលាយ និងចុះសម្រុងក្នុងសង្គម។ លក្ខណៈសម្បត្តិទាំងពីរនេះ គឺជាសេចក្តីត្រួវការធន ធានវិស្វករពិតប្រាកដ ដើម្បីការអភិវឌ្ឍន៍ជាតិ និងការទុកចិត្តរបស់អតិថិជន ដែលត្រូវការសេវាវិស្វកម្ម។វិធានការដូចបានលើកឡើងខាងលើគឺត្រូវបន្តធ្វើជាប្រចាំឈរលើមូលដ្ឋាននៃគោលការណ៍ និងនីតិវិធី ដែលកំណត់ដោយច្បាប់ និងដោយឆន្ទៈមោះមុត សមត្ថភាព ការព្យាយាម និងការទទួលខុសត្រូវ។ នេះមិនសម្រាប់តែគណៈវិស្វករកម្ពុជាប៉ុណ្ណោះទេ ប៉ុន្តែវាទាមទារឱ្យមានការចូលរួមគាំទ្រពីគ្រប់ផ្នែកដែលពាក់ព័ន្ធពិសេសវិស្វករទាំងអស់ដែលជាអ្នកទទួលផលផ្ទាល់ទើបអាចប្រព្រឹត្តទៅបានរលូនប្រកបដោយប្រសិទ្ធភាព។ ទន្ទឹមនឹងនេះ រាជរដ្ឋាភិបាលក៏ដូចជាអាជ្ញាធរខេត្ត-ក្រុងនានា ក្នុងព្រះរាជាណាចក្រកម្ពុជា និងក្នុងនាមខ្លួនលោកផ្ទាល់ លោកសូមប្រកាសជម្រាបជូនឯកឧត្តម លោកជំទាវ លោក លោកស្រី ភ្ញៀវកិត្តិយសទាំងអស់ឱ្យបានជ្រាបថា វិស្វករគ្រប់រូបដែលកំពុង ដែលមានបំណងប្រកបវិជ្ជាជីវៈវិស្វកម្មនៅក្នុងព្រះរាជាណាចក្រកម្ពុជា ត្រូវមកចុះបញ្ជីនៅគណៈវិស្វករកម្ពុជា ឬក៏ចុះបញ្ជីនៅក្រុមប្រឹក្សាគណៈវិស្វករខេត្ត ជាចាំបាច់នៅពេលដែលក្រុមប្រឹក្សានេះបង្កើតបានជាផ្លូវការ៕

ប្រភព៖ រដ្ឋបាលខេត្តកោះកុង