ពីវេទិកាអធិបតីពិធីបិទសិក្ខាសាលាបូកសរុប និងផ្សព្វផ្សាយលទ្ធផលការងារ ឆ្នាំ២០២៤ និងលើកទិសដៅ ការងារ ឆ្នាំ២០២៥ របស់ក្រុមការងារ SOMTC-កម្ពុជា​ នារសៀលថ្ងៃព្រហស្បតិ៍ ទី៥ ខែមិថុនា ឆ្នាំ២០២៥​ ឯកឧត្ដម​ នាយឧត្តមសេនីយ៍​ ប៉ោ​ ភក្តិ​ រដ្ឋលេខាធិកា​រ​ ក្រសួង​មហាផ្ទៃ​ និងជាប្រធានSOMTC-កម្ពុជា​ បានមានប្រសាសន៍ថា ព្រះរាជាណាចក្រកម្ពុជា ជាពិសេសក្រសួងមហាផ្ទៃ ផ្ទាល់បានចូលរួមចំណែកយ៉ាងសកម្ម និងដើរតួនាទីយ៉ាងសំខាន់នៅក្នុងក្របខណ្ឌនៃកិច្ចសហប្រតិបត្តិការតំបន់លើវិស័យសន្តិសុខ ក្នុងគោលដៅរួមគ្នាកសាងសមាគមអាស៊ានប្រកបដោយភាពសុខដុម និងការអភិវឌ្ឍ។ 

ឯកឧត្ដម នាយឧត្តមសេនីយ៍​ បានរំលឹកថា កម្ពុជា គឺជាប្រទេសសមាជិកទី១០ របស់សមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន ដែលគិតត្រឹមថ្ងៃទី៣០ ខែមេសា ឆ្នាំ២០២៥នេះ មានរយៈពេល ២៦ឆ្នាំមកហើយ ដែលកម្ពុជាក្នុងនាមជាសមាជិកមួយតែងបានខិតខំប្រឹងប្រែង និងមានការប្តេជ្ញាចិត្តខ្ពស់ក្នុងការចូលរួមពង្រឹងសន្តិសុខ ស្ថិរភាព និងកិច្ចសហប្រតិបត្តិការរវាងបណ្តារដ្ឋសមាជិកអាស៊ាន។ ឯកឧត្ដម​ នាយឧត្តមសេនីយ៍ ក៏បានកោតសរសើរចំពោះកិច្ចខិតខំប្រឹងប្រែងរបស់ក្រុមការងារ SOMTC-កម្ពុជា ដែលបានចូលរួមសហការរហូតសម្រេចបានសមិទ្ធផលធំៗ ជាពិសេស ការអនុម័តលើ “សេចក្តីប្រកាសអាស៊ាន ស្តីពីការប្រយុទ្ធប្រឆាំងការរត់ពន្ធអាវុធ” ក្នុងនាមកម្ពុជា ជាប្រទេសដឹកនាំក្នុងវិស័យនៃការប្រយុទ្ធប្រឆាំងការរត់ពន្ធអាវុធ និងជោគជ័យក្នុងការរៀបចំធ្វើជាម្ចាស់ផ្ទះរៀបចំកិច្ចប្រជុំក្រុមការងារឧក្រិដ្ឋកម្មឆ្លងដែន ស្តីពីការរត់ពន្ធអាវុធ (SOMTC WG on AS) ប្រចាំឆ្នាំជាបន្តបន្ទាប់ បានចំនួន ៧លើកផងដែរ។ បន្ថែមលើសពីនេះ ឯកឧត្ដម​ ​នាយឧត្តមសេនីយ៍ បានផ្តល់ជាអនុសាសន៍មួយចំនួនដល់ក្រុមការងារ SOMTC-កម្ពុជា ដើម្បីបន្តអនុវត្តភារកិច្ចឱ្យកាន់តែមានប្រសិទ្ធភាពដូចខាងក្រោម៖ 

១. បន្តសហការរួមគ្នាតាមដាន និងចាត់វិធានការសមស្រប តាមច្បាប់ និងនីតិវិធីជាធរមាន ដើម្បីបង្ការ ទប់ស្កាត់ និងបង្ក្រាបបទល្មើសឆ្លងដែននានាឱ្យបានទាន់ពេលវេលា 

២. បន្តពង្រឹង និងពង្រីកការផ្សារភ្ជាប់ទំនាក់ទំនង និងកិច្ចសហការជាមួយដៃគូ ជាតិ អន្តរជាតិ និងអង្គការ/ស្ថាប័នពាក់ព័ន្ធ ដើម្បីជំរុញកិច្ចសហប្រតិបត្តិការដែលមានស្រាប់ និងខិតខំពង្រីកបន្ថែមទៀតឱ្យកាន់តែទូលំទូលាយ 

៣. ក្រុមការងារ SOMTC-កម្ពុជា ដែលទើបតែប្រកាសសមាសភាពថ្មី ត្រូវបន្តកិច្ចសហការកាន់តែជិតស្និទ្ធ ជាមួយបណ្តាអង្គភាពពាក់ព័ន្ធនៃផែនការងារអាទិ​ភាពស្ថិតក្រោមក្របខណ្ឌ SOMTC-កម្ពុជា ដើម្បីលើកកម្ពស់កិត្យានុភាពជាតិ ក្នុងតំបន់ និងអន្តរជាតិ ដើម្បីបុព្វហេតុរួមនៃសុខសន្តិភាព វិបុលភាព និងការអភិវឌ្ឍ 

៤. ក្រុមការងារ SOMTC-កម្ពុជា និងប្រតិបត្តិករពាក់ព័ន្ធទាំងអស់ បន្តយកចិត្តទុកដាក់​លើបទល្មើសឧក្រិដ្ឋកម្មទាំង១០ ក្រោមក្របខណ្ឌ SOMTC ជាពិសេស បទល្មើសសំខាន់ៗ ចំនួន ០៤ ដែលបានធ្វើបទអន្តរាគមន៍ក្នុងសិក្ខាសាលាថ្ងៃនេះ រួមមាន បទល្មើសរត់​ពន្ធអាវុធ បទល្មើសជួញដូរមនុស្ស បទល្មើសបច្ចេកវិទ្យា និងបទល្មើសគ្រឿងញៀន។

ដោយ៖ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ