ខេត្តបន្ទាយមានជ័យ៖ ឯកឧត្តម អ៊ុំ រាត្រី អភិបាល នៃគណៈអភិបាលខេត្ត និងឯកឧត្តម ប្លែក វ៉ារី ប្រធានក្រុមប្រឹក្សាខេត្ត បានអញ្ជើញជួបសំណេះសំណាលជាមួយនឹងមន្ត្រីរាជការ នៃរដ្ឋបាលខេត្តបន្ទាយមានជ័យ មន្ត្រី រាជការ កងកម្លាំង លោកគ្រូ -អ្នក គ្រូ ក្រុមគ្រូពេទ្យ មេភូមិ ចៅសង្កាត់ លោកគ្រូ-អ្នកគ្រូ រដ្ឋបាល ក្រុងសិរីសោភ័ណ និងបន្តសំណេះសំណាលជាមួយមន្ត្រីរាជការ មេភូមិ មេឃុំ យុវជន លោកគ្រូ-អ្នកគ្រូ គ្រូពេទ្យ នៅស្រុកមង្គលបូរី សរុបទាំង២ទីតាំង ប្រមាណជាង១០០០នាក់ នាថ្ងៃទី២៣ ខែកញ្ញា ឆ្នាំ២០២៤កន្លងទៅ។

នាឱកាសនោះឯកឧត្តម អ៊ុំ រាត្រី អភិបាលខេត្តបន្ទាយមានជ័យ ក៏បានពន្យល់ពីមូលហេតុចំពោះការសម្រេចរបស់សម្តេចតេជោ ហ៊ុន សែន ប្រមុខរដ្ឋស្តីទីកាត់ផ្តាច់ និងបិទបញ្ចប់អាវុធនយោបាយដ៏ពិសពុលរបស់ក្រុមជ្រុលនិយម។ និងបានគាំទ្រយ៉ាងពេញទំហឹងចំពោះការសម្រេចចិត្តប្រកបដោយទស្សនវិស័យវែងឆ្ងាយរបស់ សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី ក្នុងការដកព្រះរាជាណាចក្រកម្ពុជាចេញពីកិច្ចសហប្រតិបត្តិការតំបន់ត្រីកោណអភិវឌ្ឍន៍ (CLV-DTA)។ 

ឯកឧត្ដម ក៏បានបញ្ជាក់ថា សម្តេចតេជោ ហ៊ុន សែន និងសម្តេចធិបតីនាយករដ្ឋមន្ត្រី ហ៊ុន ម៉ាណែត ព្រមទាំងថ្នាក់ដឹកនាំកំពូលៗផ្សេងទៀត បានប្រកាសពីការសម្រេចរបស់កម្ពុជា ក្នុងការបញ្ចប់ការចូលរួមក្នុងតំបន់ត្រីកោណអភិវឌ្ឍន៍ កម្ពុជា ឡាវ វៀតណាម (CLV-DTA) ចាប់ពីថ្ងៃ២០ ខែកញ្ញា ឆ្នាំ២០២៤នេះតទៅ។ ហេីយការដកខ្លួនចេញតំបន់ត្រីកោណអភិវឌ្ឍន៍ កម្ពុជា ឡាវ វៀតណាម (CLV-DTA) មិនមែនបញ្ឈប់នូវការអភិវឌ្ឍនៅតាមបន្ទាត់ព្រំដែននោះទេផ្ទុយទៅវិញ គឺនៅតែបន្តកិច្ចសហប្រតិបត្តិការរវាងខេត្តជាប់ព្រំដែនទាំងអស់ នឹងបន្តនូវការអភិវឌ្ឍហេដ្ឋារចនាសម្ព័ន្ធនៅតាមបន្ទាត់ព្រំដែនដដែល៕

ប្រភព​៖ រដ្ឋបាលខេត្តបន្ទាយមានជ័យ