មុងជ្រលក់ថ្នាំ១.៤៦៣មុងត្រូវបាន ឯកឧត្តមឈួរ ច័ន្ទឌឿន ដែលជាអភិបាលខេត្ត នាំយកទៅចែកជូនដល់ប្រជាពលរដ្ឋ រស់នៅតំបន់ជើងភ្នំឱរាល់ ក្នុងឃុំក្តុលសែនជ័យ ស្រុកទឹកផុស នៅព្រឹកថ្ងៃទី២៣ ខែឧសភា ឆ្នាំ២០១៨ ។ លោកវេជ្ជៈបណ្ឌិត ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំងបានអោយដឹងថា មុងជ្រលក់ថ្នាំដែលនាំយកទៅចែកជូនប្រជាពលរដ្ឋនាពេលនេះមានចំនួន១. ៤៦៣មុង ក្នុងនោះមានមុងអង្រឹងចំនួន៤៦៨មុង និង មុងគ្រែចំនួន៩៩៥មុង សម្រាប់ប្រជាពលរដ្ឋចំនួន៤៦៨គ្រួសារ មកពីភូមិក្តុលនិង ភូមិអូរល្ពៅ ក្នុងឃុំក្តុលសែនជ័យ ស្រុកទឹកផុស។ ឯកឧត្តមឈួរ ច័ន្ទឌឿន អភិបាលខេត្តកំពង់ឆ្នាំង បានអំពាវនាវទៅកាន់់ប្រជាពលរដ្ឋ ដែលរស់នៅក្នុងភូមិក្តុលសែនជ័យ អោយរស់នៅត្រូវមានអនាម័យនិងត្រូវដេកក្នុងមុងជានិច្ច ដើម្បីការពារកុំអោយកើតមានជំងឹគ្រុនចាញ់។ ឯកឧត្តមឈួរ ច័ន្ទឌឿនបញ្ជាក់ថា ថ្វីត្បិតតែជំងឺដ៏កាចសាហាវនេះ បានសម្លាប់ប្រជាពលរដ្ឋរៀងរាល់ឆ្នាំ តែយើងអាចការពារបាន ដោយធ្វើយ៉ាងណាកុំអោយមូសខាំ ដែលជាវិធីពិសេសមានប្រសិទ្ធភាពនោះ គឺយើងត្រូវដេកក្នុងមុងជានិច្ចទោះនៅផ្ទះឬនៅក្នុងព្រៃក៏ដោយ។ ករណីមានការសង្ស័យថាខ្លួនមានជំងឺគ្រុនចាញ់ត្រូវរួសរាន់ទៅមណ្ឌលសុខភាពឬមន្ទីរពេទ្យដែលនៅជិតបំផុត ដើម្បីទទួលបានការពិនិត្យព្យាបាលបានត្រឹមត្រូវនិងទាន់ពេលវេលា។
