នៅព្រឹកថ្ងៃអង្គារ ០៨កើត ខែជេស្ឋ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី ២២ ខែ ឧសភា ឆ្នាំ ២០១៨ សាខាកាកបាទក្រហមកម្ពុជា ខេត្តបាត់ដំបង បានប្រារព្ធទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ឆ្នាំ ២០១៨ ខួបលើកទី ១៥៥ ក្រោមប្រធានបទ “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល” ក្រោមអធិបតីភាព ឯកឧត្តម ងួន រតនៈអភិបាល នៃគណៈអភិបាលខេត្តបាត់ដំបង និងជា ប្រធានកិត្តិយសសាខា កាកបាទក្រហមកម្ពុជា ខេត្តបាត់ដំបង ឯកឧត្តម អ៊ុយ រី អនុប្រធានកិត្តិយសសាខាឯកឧត្តម ចន្ទ័ សុផលទីប្រឹក្សារាជរដ្ឋាភិបាល និងឯកឧត្តមបណ្ឌិត ប៊ុតគឹមស៊ានប្រធានគណៈកម្មាធិការសាខា ដោយមានការអញ្ជើញចូលរួមពី ឯកឧត្តម លោកជំទាវ លោកឧកញ៉ា លោក លោកស្រី ជាសមាជិក សមាជិកាគណៈកម្មាធិការសាខា អនុសាខា ក្រុមប្រតិបត្តិសាខា មន្រ្តីរាជការ អង្គភាពជុំវិញខេត្ត យុវជនកាយរិទ្ធិ សសយក យុវជនកាកបាទក្រហមកម្ពុជា សប្បុរសជនសរុបចំនួន ៧០០នាក់ ដែលប្រារព្ធឡើងនៅសាលមហោស្រពស្ទឹងសង្កែក្រុងបាត់ដំបង។ ទិវានេះប្រព្រឹត្តទៅនៅក្នុងគោលបំណង៖ -រំលឹកដល់ថ្ងៃកំណើតរបស់លោក ហង់រី ឌុយណង់ ដែលជាស្ថាបនិករបស់កាកបាទក្រហម -យល់ដឹងអំពីប្រវត្តិចលនារបស់កាកបាទក្រហម អឌ្ឍចន្ទក្រហម និងច្បាប់មនុស្សធម៌អន្តរជាតិ -កៀរគររកមូលនិធិពីសប្បុរសជនទាំងអស់ និងឆ្លើយតបឲ្យបានទាន់ពេលវេលាក្នុងការជួយសង្រ្គោះ និងជនងាយរងគ្រោះផងដែរ។ សូមបញ្ជាក់ថា៖ ក្នុងទិវានេះដែរ សាខាកាកបាទក្រហមកម្ពុជា ខេត្តបាត់ដំបងបានទទួលថវិកាបណ្តោះអាសន្នពីសប្បុរសជនទាំងអស់បានចំនួន ១២២,២១៦ដុល្លា (ដប់ពីម៉ឺនពីរពាន់២រយដប់ប្រាំមួយដុល្លារ) សម្រាប់បន្តបំពេញបេសកកម្មមនុស្សធម៌ក្នុងខេត្តបាត់ដំបងបន្តទៀត៕
ប្រភពព័ត៌មាន: រដ្ឋបាលខេត្តបាត់ដំបង (ថ្ងៃទី២២ ខែឧសភា ឆ្នាំ២០១៨)
