ត្បូងឃ្មុំ៖ អាជ្ញាធរខេត្តត្បូងឃ្មុំ នៅថ្ងៃទី១៣ ខែមករា ឆ្នាំ២០២១ បានសហការជាមួយអង្គការ GIZ រៀបចំទិវាលាងសម្អាតដៃនៅតាមគ្រឹះស្ថានសិក្សា ក្រោមប្រធានបទ <<លាងសម្អាតដៃសម្រាប់ទាំងអស់គ្នា>>។
ពិធីនេះធ្វើឡើងនៅក្នុងបរិវេណសាលាបឋមសិក្សាកណ្តោលជ្រុំ ក្នុងឃុំកណ្តោលជ្រុំ ស្រុកពញាក្រែក ក្រោមអធិបតីភាពឯកឧត្តមបណ្ឌិត ជាម ច័ន្ទសោភ័ណ អភិបាលខេត្តត្បូងឃ្មុំ ក្នុងគោលបំណងលើកទឹកចិត្តឲ្យមនុស្សគ្រប់រូប មានទម្លាប់ក្នុងការលាងសម្អាតដៃជាមួយសាប៊ូជាប្រចាំ ដោយមានការចូលរួមពីគ្រប់អ្នកពាក់ព័ន្ធក្នុងការជួយគាំទ្រលើផ្នែកទឹកស្អាត និងអនាម័យ នៅតាមសាលារៀន និងផ្តល់អត្ថប្រយោជន៍ នៃការលាងសម្អាតដៃជាមួយសាប៊ូ និងការដុះសម្អាតធ្មេញ សម្រាប់លោកគ្រូ អ្នកគ្រូ និងក្មួយៗសិស្សានុសិស្ស ក្នុងការជួយថែរក្សាសុខភាព។
ឯកឧត្តមបណ្ឌិត ជាម ច័ន្ទសោភ័ណ មានប្រសាសន៍លើកឡើងថា ការប្រារពទិវានេះពិតជាមានសារៈសំខាន់ណាស់ ព្រោះវាបានជួយជម្រុញ និងលើកទឹកចិត្តបន្ថែមដល់បងប្អូនប្រជាពលរដ្ឋ និងប្អូនសិស្សានុសិស្សឲ្យចូលរួមរស់នៅមានអនាម័យជានិច្ច ដើម្បីសុខភាពល្អទាំងអស់គ្នា ។ ការរស់នៅមានអនាម័យ និងលាងសម្អាតដៃជាមួយសាប៊ូ គឺជាមធ្យោបាយដ៏មានប្រសិទ្ធិភាព និងមិនត្រូវការចំណាយច្រើន ក្នុងការបង្ការ និងទប់ស្កាត់ជំងឺផ្សេងៗ ពិសេសក្នុងពេលថ្មីៗនេះ គឺជម្ងឺកូវីដ១៩ ពោលគឺ <<ឧស្សាហ៍លាងសម្អាតដៃជាមួយសាប៊ូឬអាល់កុល ពាក់ម៉ាស់ និងរក្សាគម្លាតសង្គម ទាំងនៅសាលា និងទីសាធារណៈ>>។
ជាមួយនឹងកាលើកឡើងបែបនេះឯកឧត្តមបណ្ឌិត អភិបាលខេត្ត ក៏បានអំពាវនាវផងដែរដល់ប្រជាពលរដ្ឋទាំងអស់ ពិសេសប្អូនសិស្សានុសិស្សត្រូវចូលរួមទប់ស្កាត់ការរីករាលដាលជំងឺកូវីដ១៩ ឲ្យបានដាច់ខាតព្រោះវាកំពុងធ្វើឲ្យប៉ះពាល់ដល់សង្គមជាតិ និងប្រជាជនយ៉ាងខ្លាំង។
ឯកឧត្តមបណ្ឌិត បញ្ជាក់ថា ក្រោមការដឹកនាំ និងយកចិត្តទុកដាក់ខ្ពស់ពីសំណាក់សម្តេចតេជោ ហ៊ុន សែន ក្នុងកាលៈទេសៈបែបនេះក្តី បានខិតខំយកចិត្តទុកដាក់សម្រួលជួយឧបត្ថម្ភទាំងថវិការ និងការប្រកបរបរនានារបស់ប្រជាពលរដ្ឋ ធ្វើអោយកម្រិតជីវភាព នៅតែល្អប្រសើរជាធម្មតា។
ដូចអ្វីដែលសម្តេចបានលើកឡើងនោះគឺ សម្តេចមិនដែលរត់ចោលប្រជាពលរដ្ឋក្នុងគ្រាលំបាកនោះឡើយ ពោលគឺនៅពេលប្រជាពលរដ្ឋមានទុក្ខលំបាក សម្តេចលំបាកជាងយើងទៅទៀត ក្នុងនាមជាមេគ្រួសារប្រជាជនកម្ពុជាទាំងមូល៕
ប្រភព៖ រដ្ឋបាលខេត្តត្បូងឃ្មុំ