សមត្ថកិច្ចប្រចាំការនៅអាកាសយានដ្ឋានអន្តរជាតិភ្នំពេញបានឃាត់ខ្លួននារីវ័យក្មេងស្រស់ស្អាតជនជាតិវេណេហ៊្សុយអេឡាម្នាក់ពីបទជួញដូរគ្រឿងញៀនឆ្លងដែនពីប្រទេសថៃចូលមកកាន់ប្រទេសកម្ពុជា ដោយប្រើវិធីសាស្ត្របង្កប់នៅក្នុងឡេវអាវជាច្រើនគ្រាប់ កាលពីវេលាម៉ោង៦ និង៣៥នាទីយប់ ថ្ងៃទី០៦ ខែកុម្ភៈ ឆ្នាំ២០១៧ ។ ប្រភពព័ត៌មានពីសមត្ថកិច្ចម្នាក់បានប្រាប់ឱ្យដឹងថា ស្ត្រីជនបរទេសដែលបានឃាត់ខ្លួនមានឈ្មោះ MEJIAS NEILIN COROMOTO អាយុ២៨ឆ្នាំ ជនជាតិវេណេហ៊្សុយអេឡា ជាអ្នកទេសចរណ៍ កាន់លិខិតឆ្លងដែនលេខ 121100315 ។
ប្រភពបានប្រាប់បន្តទៀតថា ក្នុងការបង្ក្រាបករណីជួញដូរគ្រឿងញៀនឆ្លងដែននេះ មានការចូលរួមអំពីសំណាក់កម្លាំងនគរបាលអន្តោប្រវរសន៍ គយ និងកម្លាំងពាក់ព័ន្ធមួយចំនួនទៀត ដោយបានរកឃើញនារីជាជនជាតិវេណេហ្ស៊ុយអេឡាម្នាក់បានប្រើវិធីសាស្ត្របង្កប់គ្រឿងញៀនប្រភេទកូកាអ៊ីនរហូតទៅដល់ចំនួន១៧៩,១២៣ក្រាមឯណ្ណោះនៅក្នុងឡេវអាវរាប់រយគ្រាប់ក្នុងកាបូបដាក់ខោអាវធំមួយ ។ នារីជនជាតិវេណេហ៊្សុយអេឡាខាងលើនេះធ្វើដំណើរតាមជើងយន្តហោះ PG935 ពីទីក្រុងបាងកកប្រទេសថៃចូលមកកាន់រាជធានីភ្នំពេញប្រទេសកម្ពុជា ហើយក៏ត្រូវកម្លាំងមានសមត្ថកិច្ចចម្រុះប្រចាំការនៅអាកាសយានដ្ឋានអន្តរជាតិភ្នំពេញធ្វើការឆែកឆេររកឃើញ និងឃាត់ខ្លួនតែម្តង ៕
