ព្រឹកថ្ងៃចន្ទ័ ៥រោច ខែមាឃ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី០៥ ខែកុម្ភៈ ឆ្នាំ២០១៨ ឯកឧត្តម គួច ចំរើន អភិបាល នៃគណៈអភិបាលខេត្ត កំពង់ចាម បានអញ្ជើញចូលរួមបុណ្យកាន់អង្គឆ្លង សមិទ្ធិផលនានាក្នុងវត្តរតនៈសន្សំកុសលកោះប្រាក់ ស្ថិត នៅភូមិកោះប្រាក់លើ ឃុំកោះទន្ទឹម ស្រុកកំពង់សៀម។ នាឱកាសនោះ ឯកឧត្តមអភិបាល បានណែនាំផ្សព្វផ្សាយ ដល់គ្រប់ក្រុងស្រុកក្នុងខេត្តកំពង់ចាម ឱ្យគោរពតាម អនុសាសន៍សម្តេចតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា ក្នុងការជំរុញលើកតម្កើងព្រះពុទ្ធ សាសនានៃយើង ដោយគ្រប់កម្មវិធីទាំងអស់ត្រូវរៀបចំឱ្យ ព្រះសង្ឃគង់ឱ្យបានខ្ពស់ជាងមន្ត្រីរាជការ និងប្រជាពលរដ្ឋ។ ជាថ្មីម្តងទៀត ឯកឧត្តម ក៏បានក្រើនរំលឹកឱ្យមេឃុំ ស្មៀន និងនគរបាលប៉ុស្តិ៍ធ្វើការរួមគ្នា ក្នុងការចុះសំបុត្រកំណើត សំបុត្រអាពាពិពាហ៍ សំបុត្រមរណៈ ចុះបញ្ជីគ្រួសារ (ក៣) និងចុះបញ្ជីស្នាក់នៅ(ក១) ដល់ខ្នងផ្ទះ រោងការ រោងបុណ្យ របស់ប្រជាពលរដ្ឋ ដើម្បីចូលរួមចលនាប្រលងប្រណាំង ឃុំសង្កាត់បម្រើសេវាល្អ ឱ្យបានផុសផុល ក្នុងគោលដៅ ផ្លាស់ប្តូរឥរិយាបថរបស់មន្ត្រីរាជការ ពីការគ្រប់គ្រង មក ជាមន្ត្រីបម្រើប្រជាពលរដ្ឋវិញ។ ប្រភពព័ត៌មាន:រដ្ឋបាលខេត្តកំពង់ចាម (ថ្ងៃទី០៥ ខែមករា ឆ្នាំ២០១៨)
