នាព្រឹកថ្ងៃសៅរ៍ ០៣រោច ខែមាឃ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី០៣ ខែកុម្ភៈ ឆ្នាំ២០១៨នេះ ឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង បានចូលរួមជាមួយឯកឧត្ដមបណ្ឌិត ហ៊ុន ម៉ាណែត នាយរងសេនាធិការចម្រុះ នៃកងយោធពលខេមរភូមិន្ទ មេបញ្ជាការរងកងទ័ពជើងគោក និងជាមេបញ្ជាការបញ្ជាការដ្ឋានជាតិកម្លាំងពិសេសប្រឆាំងភេរវកម្ម អញ្ជើញទស្សនាប្រភេទរថយន្តដែលផលិតដោយក្រុមហ៊ុន DAEHAN AUTO (CAMBODIA) CO.,LTD ដែលបានដាក់តាំងបង្ហាញនៅអាកាសយានដ្ឋានអន្តរជាតិភ្នំពេញ ។ បន្ទាប់ពីទស្សនាប្រភេទរថយន្តរួច តបតាមការអញ្ជើញរបស់ KOLAO GROUP គណៈប្រតិភួដែលដឹកនាំដោយឯកឧត្ដមបណ្ឌិត ហ៊ុន ម៉ាណែត នាយរងសេនាធិការចម្រុះ នៃកងយោធពលខេមរភូមិន្ទ មេបញ្ជាការរងកងទ័ពជើងគោក និងជាមេបញ្ជាការបញ្ជាការដ្ឋានជាតិកម្លាំងពិសេសប្រឆាំងភេរវកម្ម ដោយមានការចូលរួមពីឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង ឯកឧត្ដម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា ឯកឧត្ដមបណ្ឌិត គុណ ញឹម ប្រតិភូរាជរដ្ឋាភិបាល និងជាអគ្គនាយក នៃអគ្គនាយកដ្ឋានគយ និងរដ្ឋាករ ព្រមទាំងមន្ត្រីពាក់ព័ន្ធមួយចំនួន នឹងធ្វើដំណើរតាមរយៈយន្តហោះពិសេស អញ្ជើញទៅធ្វើទស្សនកិច្ចទីតាំងរោងចក្រ និងខ្សែសង្វាក់ផលិតកម្មដំឡើងរថយន្តធំរបស់ក្រុមហ៊ុន ដែលមានមូលដ្ឋាននៅទីក្រុងវៀងចន្ទន៍ នៃសាធារណរដ្ឋប្រជាធិបតេយ្យប្រជាមានិតឡាវ ។ សូមបញ្ជាក់ថា ក្រុមហ៊ុនដំឡើងរថយន្តខ្នាតធំមួយដែលមានទីតាំងស្ថិតនៅក្នុងតំបន់សេដ្ឋកិច្ចពិសេសអ៊ិនធើវៀ អូតូម៉ូបាល អ៊ិនដាសស្ទ្រី ខមផ្លេកស៍ ក្នុងភូមិព្រៃផ្ដៅ សង្កាត់ច្រកម្ទេស ក្រុងបាវិត ខេត្តស្វាយរៀង នឹងបើកឲ្យដំណើរការនៅពេលឆាប់ខាងមុខនេះ ដោយមានលទ្ធភាពដំឡើងរថយន្តបានប្រមាណ ២០.០០០គ្រឿង ក្នុងមួយឆ្នាំ និងផ្ដល់ឱកាសការងារជូនប្រជាពលរដ្ឋនៅខេត្តស្វាយរៀងប្រមាណ ១០.០០០កន្លែងបន្ថែមទៀត ៕ ប្រភពព័ត៌មាន: រដ្ឋបាលខេត្តស្វាយរៀង (ថ្ងៃទី ០៣ ខែកុម្ភះ ឆ្នាំ២០១៨)