នារសៀលថ្ងៃសុក្រ ០២ រោច ខែមាឃ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី០២ ខែកុម្ភៈ ឆ្នាំ ២០១៨ រដ្ឋបាលខេត្តរតនគិរី បានរៀបចំពិធីប្រកាសចូលកាន់មុខតំណែង នាយករដ្ឋបាលសាលាខេត្ត ក្រោមអធិបតីភាពឯកឧត្តម ណាប់ ប៊ុនហេង សមាជិកក្រុមប្រឹក្សាខេត្ត និងឯកឧត្តម ថង សាវុន អភិបាលខេត្តរតនគិរី ដែលពិធីនេះបានប្រារព្ធធ្វើឡើងនៅសាលប្រជុំសាលាខេត្តរតនគិរី ។ លោក នាង សំអាត ត្រូវបានតែងតាំងជានាយករដ្ឋបាលសាលាខេត្ត ជំនួសលោក សេក ហៃ ដែលត្រូវបានតែងតាំងជាអភិបាលស្រុកកូនមុំ ។ ឯកឧត្តម ថង សាវុន អភិបាលខេត្តរតនគិរី មានប្រសាសន៍ណែនាំដល់នាយករដ្ឋបាលដែលទើបតែតែងតាំងថ្មី ក៏ដូចជាមន្ត្រីរាជការត្រូវយកចិត្តទុកដាក់លើកកម្ពស់របៀបរបបការងារ និងការបែងចែកភារកិច្ចដែលបានកំណត់ដោយច្បាប់ ព្រមទាំងខិតខំពង្រឹងសាមគ្គីភាព ឯកភាពផ្ទៃក្នុងឲ្យបានល្អ ។ ព្រមជាមួយគ្នានេះក្នុងនាមជាមន្ត្រីរាជការត្រូវមានស្មារតីគិតគូរពីផលប្រយោជន៍ជាតិ និងប្រជាជនជាធំ តាមរយៈការចូលរួមលើកកម្ពស់ការផ្តល់សេវាសាធារណៈ ទាំងសេវាសំណូមពរ និងសេវាតម្រូវការឲ្យបានល្អប្រសើរ និងមានប្រសិទ្ធភាព ជាងនេះទៀតសោតមន្ត្រីរាជការត្រូវពង្រឹងសមត្ថភាព ចំណេះដឹង និងស្វ័យសិក្សាលើច្បាប់ បទដ្ឋានគតិយុត្ត បទពិសោធន៍ជំនាញនានាស្របទៅតាមបរិបទ និងនិន្នាការសកលភាវូបនីយកម្ម ។ ប្រភពព័ត៌មាន: រដ្ឋបាលខេត្តរតនគិរី (ថ្ងៃទី០២ ខែមករា ឆ្នាំ២០១៨)