នាព្រឹកថ្ងៃព្រហស្បតិ៍ ០១រោច ខែមាឃ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី ០១ ខែកុម្ភះ ឆ្នាំ២០១៨ ឯកឧត្តម ម៉ៅ ភិរុណ អភិបាលនៃគណៈអភិបាលខេត្តកណ្តាល បានអញ្ជើញចូលរួមជាអធិបតីក្នុងសន្និបាត បូកសរុបលទ្ធផលការងារសេដ្ឋកិច្ចនិងហិរញ្ញវត្ថុឆ្នាំ២០១៧ និងលើកទិសដៅការងារឆ្នាំ២០១៨ របស់មន្ទីរសេដ្ឋកិច្ចនិងហិរញ្ញវត្ថុ សាខាគយនិងរដ្ឋាករ សាខាពន្ធដារ និងរតនាគារខេត្តកណ្តាល។ សមាសភាពអញ្ជើញចូលរួមមាន អភិបាលរងខេត្ត លោក លោកស្រីនាយករងរដ្ឋបាលសាលាខេត្ត ប្រធាន អនុប្រធានមន្ទីរអង្គភាពជុំវិញខេត្ត អភិបាល អភិបាលរងក្រុង ស្រុក ថ្នាក់ដឹកនាំ និងមន្ត្រីមន្ទីរសេដ្ឋកិច្ចនិងហិរញ្ញវត្ថុ សាខាគយនិងរដ្ឋ សាខាពន្ធដារ និងរតនាគារខេត្ត ព្រមទាំងមន្ត្រីពាក់ព័ន្ធសរុប ១៥៦ នាក់។ *ក្រៅពីថ្លែងនូវការកោតសរសើរ និងវាយតម្លៃខ្ពស់ចំពោះមន្ទីរសេដ្ឋកិច្ចនិងហិរញ្ញវត្ថុ សាខាគយនិងរដ្ឋាករ សាខាពន្ធដារ និងរតនាគារ ដែលបានខិតខំបំពេញការងារប្រកបដោយស្មារតីទទួលខុសត្រូវខ្ពស់ស្របតាមភារកិច្ចនិងសមត្ថកិច្ចដែលក្រសួងនិងរដ្ឋបាលខេត្ដបានប្រគល់ជូន ឯ.ឧ អភិបាលខេត្តក៏បានយកឱកាសនោះផ្ដល់អនុសាសន៍មួយចំនួនដើម្បីបន្ដដោះស្រាយការងារដែលនៅសេសសល់ប្រកបដោយប្រសិទ្ធិភាពខ្ពស់ ដូចខាងក្រោម៖ - គ្រប់មន្ទីរជំនាញ អង្គភាព រដ្ឋបាលក្រុង ស្រុករបស់យើងត្រូវយកចិត្ដទុកដាក់ប្រើប្រាស់ធនធានកម្ររបស់ជាតិឱ្យមានប្រសិទ្ធភាពខ្ពស់ ដើម្បីធានាបាននូវវឌ្ឍន៍ភាពការងារក្នុងការកសាងសមត្ថភាពអង្គភាព និងការផ្ដល់សេវាប្រកបដោយការជឿទុកចិត្ដជូនប្រជាពលរដ្ឋព្រោះថាការងារគ្រប់គ្រងសេដ្ឋកិច្ចនិងហិរញ្ញវត្ថុគឺជាការងារស្នូលក្នុងការកសាងសមត្ថភាពអង្គភាព ប្រៀបបាននិងសសៃឈាមរបស់មនុស្សដែលទាមទារត្រូវមានយន្ដការគ្រប់គ្រងច្បាស់លាស់។ - គ្រប់មន្ទីរជំនាញ និងរដ្ឋបាលថ្នាក់ក្រោមជាតិ ត្រូវមានស្មារតីបុរេសកម្មចូលរួមអនុវត្ដកម្មវិធីកំណែទម្រង់ការគ្រប់គ្រងហិរញ្ញវត្ថុសាធារណៈរបស់រាជរដ្ឋាភិបាល ក្នុងបរិការណ៍ការប្រកួតប្រជែងសេដ្ឋកិច្ចក្នុងតំបន់និងពិភពលោកកាន់តែមានភាពខ្លាំងខ្លា ការវិវឌ្ឍន៍នៃសេដ្ឋកិច្ច សង្គម និងការបំពេញតម្រូវការរបស់ប្រជាពលរដ្ឋដែលមានកាន់តែច្រើនទ្បើងៗជារៀងរាល់ថ្ងៃ។ - សាខាគយនិងរដ្ឋាករខេត្ដកណ្ដាល ដែលជាអង្គភាពផ្ដល់សេវាផ្ទាល់ជាមួយប្រជាពលរដ្ឋត្រូវផ្លាស់ប្ដូរឥរិយាបទពីអ្នកគ្រប់គ្រងទៅជាអ្នកបម្រើក្នុងពេលផ្ដល់សេវាជូនប្រជាពលរដ្ឋ និងត្រូវត្រួតពិនិត្យអំពីនីតិវិធីបំពេញបែបបទក្នុងការផ្ដល់សេវា ពិនិត្យមើលអំពីបញ្ហាប្រឈមនានាដែលបានកើតទ្បើងដើម្បីស្វែងរកដំណោះស្រាយឱ្យបានទាន់ពេលវេលា។ - សាខាពន្ធដារខេត្ដកណ្ដាល ដែលជាអង្គភាពផ្ដល់សេវាផ្ទាល់ជាមួយប្រជាពលរដ្ឋត្រូវផ្លាស់ប្ដូរឥរិយាបទពីអ្នកគ្រប់គ្រងទៅជាអ្នកបម្រើក្នុងពេលផ្ដល់សេវាជូនប្រជាពលរដ្ឋ និងត្រូវត្រួតពិនិត្យអំពីនីតិវិធីបំពេញបែបបទក្នុងការផ្ដល់សេវា ពិនិត្យមើលអំពីបញ្ហាប្រឈមនានាដែលបានកើតទ្បើងដើម្បីស្វែងរកដំណោះស្រាយឱ្យបានទាន់ពេលវេលា។ - មន្ទីរសេដ្ឋកិច្ចនិងហិរញ្ញវត្ថុក្នុងនាមជាអភិបាលហិរញ្ញវត្ថុត្រូវមានស្មារតីបុរេសកម្មដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈនៅថ្នាក់ក្រោមជាតិឱ្យទទួលបានប្រសិទ្ធភាពខ្ពស់។ - គ្រប់មន្ទីរជំនាញ អង្គភាព រដ្ឋបាលក្រុង ស្រុក ដែលពុំទាន់បានអនុវត្ដពេញលេញនូវសារាចរណែនាំលេខ០៧ សរ ចុះថ្ងៃទី៣០ ខែមិថុនា ឆ្នាំ២០១៤របស់រាជរដ្ឋាភិបាលស្ដីពីការរៀបចំបញ្ជីសារពើភ័ណ្ឌទ្រព្យសម្បត្ដិរដ្ឋ ត្រូវប្រញាប់រៀបចំធ្វើប័ណ្ណសំគាល់កម្មសិទ្ធិដីរដ្ឋចំនួន៥៧៧ កន្លែងឱ្យបានរួចរាល់នៅបំណាច់ឆ្នាំ២០១៨។ - ស្នើអង្គភាពពាក់ព័ន្ធពិនិត្យមើល និងធ្វើបច្ចុប្បន្នភាពលើការកំណត់តម្លៃដីនៅតំបន់មួយចំនួនឡើងវិញ ព្រោះការកំណត់តម្លៃនូវទីតាំងមួយចំនួននៅក្នុងខេត្តហាក់មិនឆ្លុះបញ្ចាំងទៅនឹងតម្លៃនៃការប្រែប្រួលជាក់ស្តែង។ - ស្នើអង្គភាពទាំងអស់ត្រូវពង្រឹងនូវសាមគ្គីភាព ឯកភាពផ្ទៃក្នុងការអនុវត្តការងារគោរពទៅតាមតួនាទី ភារកិច្ច និងច្បាប់។ - រតនាគារខេត្ដកណ្ដាល ក្នុងនាមជាគណនេយ្យករសាធារណៈត្រូវធ្វើការពិនិត្យនិងធ្វើការទូទាត់ការចំណាយថវិការដ្ឋដល់មន្ទីរជំនាញ រដ្ឋបាលថ្នាក់ក្រោមជាតិ ដែលមានឯកសារគ្រប់គ្រាន់ ច្បាស់លាស់ ត្រឹមត្រូវ ស្របតាមបទបញ្ញត្ដិស្ដីពីការគ្រប់គ្រងហិរញ្ញវត្ថុសាធារណៈ។ - គ្រប់មន្ទីរជំនាញ និងរដ្ឋបាលថ្នាក់ក្រោមជាតិ ត្រូវមានស្មារតីបុរេសកម្ម ក្នុងការផ្ដល់សេវាល្អប្រកបដោយការជឿទុកចិត្ដជូនប្រជាពលរដ្ឋក្នុងគោលបំណងធានាឱ្យមានកិច្ចសហការពីប្រជាពលរដ្ឋក្នុងដំណើរការអភិវឌ្ឍន៍សេដ្ឋកិច្ចនិងសង្គម៕ ប្រភពព័ត៌មាន: រដ្ឋបាលខេត្តកណ្តាល (ថ្ងៃទី០១ ខែកុម្ភៈ ឆ្នាំ២០១៨)
