អភិបាលខេត្តកំពង់ចាមសុំការគាំទ្រពីរដ្ឋមន្ត្រីក្រសួងធនធានទឹកនិងឧតុនិយមលើគម្រោងដាំដើមត្នោតដែលជាដើមឈើបញ្ជាក់ពីអត្តសញ្ញាណជាតិចំនួន៥.២៥២គ្រាប់នៅតាមជើងទំនប់បឹងវាម ដែលក្រសួងបាននឹងកំពុងធ្វើការពង្រឹងឡើងវិញនៅក្នុងស្រុកស្រីសន្ធរខេត្តកំពង់ចាម ជាបឹងមានជាប់ពាក់ពន្ធ័នឹងរឿងប្រវត្តិសាស្ត្រស្តេចកន ដើម្បីឲ្យបឹងនេះក្លាយជាតំបន់ទេសចរណ៍នៅថ្ងៃអនាគត។ លោកលឹមគានហោរដ្ឋមន្ត្រីក្រសួងធនធានទឹកនិងឧតុនិយមកាលពីល្ងាចថ្ងៃទី១៥ខែមករាឆ្នាំ២០១៨បានអនុញ្ញាតឧ្យលោកគួច ចំរើន អភិបាលនៃគណៈអភិបាលខេត្តកំពង់ចាម និងសហការី ចូលជួបសំដែងការគួរសម និងពិភាក្សាការងារ។នៅក្នុងជំនួបខាងលើលោកអភិបាលខេត្តបានថ្លែងអំណរគុណដល់ក្រសួងធនធានទឹក និងឧតុនិយម ពិសេសចំពោះលោករដ្ឋមន្ត្រីផ្ទាល់ ដែលបានជួយអភិវឌ្ឍហេដ្ឋារចនាសម្ព័ន្ធធារាសាស្ត្រក្នុងខេត្តកំពង់ចាម ដែលតាមរយៈប្រព័ន្ធធារាសាស្ត្រទាំងនេះ បានជំរុញឱ្យការងារបង្កបង្កើនផលរបស់ប្រជាកសិករទទួលបានទិន្នផលល្អ ជួយលើកកំពស់កំរិតជីវភាពរស់នៅរបស់ប្រជាពលរដ្ឋ ។ ឆ្លៀតក្នុងឱកាសនេះលោកគួច ចំរើនបានស្នើសុំដល់លោករដ្ឋមន្ត្រីឧ្យជួយកសាងប្រព័ន្ធថ្មីៗបន្ថែមទៀត និងបានស្នើសុំនូវអនុសាសន៍មួយចំនួនពីលោករដ្ឋមន្ត្រីដើម្បីជាទុនបន្ថែមសម្រាប់ការរៀបចំផែនការអភិវឌ្ឍន៍ខេត្តកំពង់ចាមឧ្យ កាន់តែមានការរីកចម្រើន និង ក៏បានស្នើសុំការគាំទ្រពីលោករដ្ឋមន្ត្រីលើគម្រោង ដាំត្នោតប្រមាណជា៥.០០០ ដើម នៅអមសងខាងទំនប់បឹងវាមស្ថិតនៅក្នុងស្រុកស្រីសន្ធរដើម្បីប្រែក្លាយទំនប់នេះ ឱ្យទៅជាតំបន់ទេសចរណ៍នៅថ្ងៃអនាគត ។ លោកលឹម គានហោរដ្ឋមន្ត្រីក្រសួងធនធានទឹកនិងឧតុនិយមក្រៅពីបានផ្តល់នូវអនុសាសន៍ល្អៗមួយចំនួន ពាក់ព័ន្ធនឹងការរៀបចំផែនការអភិវឌ្ឍន៍ខេត្តកំពង់ចាម លោកក៏បានកោតសរសើរចំពោះគំនិតផ្តួចផ្តើមដាំដើមត្នោត នៅអមសងខាងទំនប់បឹងវាម។លោករដ្ឋមន្ត្រីបានបញ្ជាក់ថាគំនិតផ្តួចផ្តើមរបស់លោកអភិបាលខេត្តក្នុងការដាំត្នោតនៅតាមជើងទំនប់។ លោកបានបញ្ជាឱ្យមន្ត្រីជាន់ខ្ពស់របស់ក្រសួងចុះសិក្សានិងរៀបចំប្លង់ដាំដុះជូនហើយព្រោះថាទន្ទឹមនឹងការបង្ហាញពីអត្តសញ្ញាណជាតិ ការបង្កើននូវភាពទាក់ទាញរបស់បឹងការងារបច្ចេកទេសក៏ត្រូវគិតគូរផងដែរ ដើម្បីចៀសវាងនូវការប៉ះពាល់ពេលដែលយើងត្រូវធ្វើការថែទាំ ឬជួសជុលទំនប់នាពេលខាងមុខ ។ នៅក្នុងឱកាសដដែលនេះលោកលឹមគានហោ បានលើកឡើងផងដែរថាខេត្តកំពង់ចាមគួររៀបចំតំបន់មួយដែលបង្ហាញពីការផ្សារភ្ជាប់ជីវភាពរស់នៅរបស់ប្រជាពលរដ្ឋទៅនឹងដើមត្នោតពោលគឺចាប់តាំងពីចំណុច ឡើងយកទឹកត្នោត រហូតទៅដល់ការផលិតចេញជាស្ករត្នោតនំត្នោតនិងសម្ភារៈប្រើប្រាស់ផ្សេងៗដែលផលិតពីត្នោត ។ គួររំលឹកឲ្យដឹងថាលោកគួចចំរើន មានគំនិតចង់ដាំដើមត្នោតនៅទំនប់បឹងវាមនេះ គឺតាំងពីមុនពេលលោកមិនទាន់បានមកធ្វើជាអភិបាលខេត្តកំពង់ចាមម្ល៉េះ ពោលគឺបន្ទាប់ពីលោកបានទៅដល់ការដ្ឋានធារាសាស្ត្រនេះ ក្នុងពេលលោកនៅជាអនុប្រធានក្រុមការងារថ្នាក់កណ្តាលចុះជួយខេត្តកំពង់ចាមហើយបានធ្វើដំណើរឆ្លងកាត់ការដ្ឋាននេះ ដោយមើលទៅលើផ្ទៃបឹងឃើញមានដំណាំឈូកនិងស្រូវប្រាំង។ បឹងវាមស្ថិតនៅក្នុងស្រុកស្រីសន្ធរខេត្តកំពង់ចាមនេះត្រូវបានគេនិយាយថាមានជាប់ពាក់ពន្ធ័ទៅនឹងរឿងរ៉ាវប្រវត្តិសាស្ត្ររបស់ស្តេចកន ដែលត្រូវបានសត្រូវចាប់ខ្លួនក្នុងពេលមកបង់(សំណាញ់)ត្រីនៅក្នុងបឹងនេះ។បឹងវាមស្ថិតនៅមានឆ្ងាយប៉ុន្មានពីប្រាសាទបុរាណមួយដែលគេហៅថាប្រាសាទទួលបាសាន។ចំពោះគម្រោងដាំ(កប់)គ្រាប់ត្នោតនៅតាមជើងទំនប់បឹងវាមនេះត្រូវបានគេគ្រោងធ្វើនៅអំឡុងពាក់កណ្តាលខែមីនា។គ្រាប់ត្នោតដែលត្រូវកប់នៅតាមជើងទំនប់នេះ មានចំនួនប្រមាណជា ៥.២៥២គ្រាប់៕ ប្រភពព័ត៌មាន: រដ្ឋបាលខេត្តកំពង់ចាម (ថ្ងៃទី១៦ ខែមករា ឆ្នាំ២០១៨)