ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ  អនុញ្ញាតិឲ្យលោក វណ្ណ សុខហេង ប្រធានសភាពាណិជ្ជកម្មខេត្តព្រះ សីហនុ និងសហការីអញ្ជើញចូលជួបសម្ដែងការគួរសម កាលពីថ្ងៃទី០១ ខែកក្កដា ឆ្នាំ២០១៩។

     ឯកឧត្តម គួច ចំរើន អភិបាលខេត្តព្រះ សីហនុ បានស្វាគមន៍ប្រតិភូសភាពាណិជ្ជកម្មខេត្តព្រះសីហនុ ដោយគូសបញ្ជាក់ថា ការផ្លាស់ប្តូរចូលកាន់តំណែងអភិបាលខេត្តព្រះសីហនុនាពេលនេះ ជាបន្ទុកមួយដោយសារតែបច្ចុប្បន្ន ហេដ្ឋារចនាសម្ព័ន្ធផ្លូវ លូ និងបរិស្ថានកំពុងប្រឈម ទាមទារដោះស្រាយបន្ទាន់។  ជំហានដំបូងសិក្សាប្រព័ន្ធលូទឹកភ្លៀង និងលូទឹកស្អុយ  ហើយបានឲ្យក្រុមការងារបច្ចេកទេសសិក្សាពីប្រពន្ធលូទឹកភ្លៀង និងប្រពន្ធលូទឹកកខ្វក់មានដូចជា ទី១.ប្រវែងលូ, ទី២.តម្លៃនៃការសាងសង់, ទី៣.ប្រើរយៈពេលនៃការសាងសង់ និងទី៤.ការវិនិយោគប្រពន្ធលូទឹកកខ្វក់ និងលូរទឹកភ្លៀង។

     ឯកឧត្តម ក៍មានគម្រោងបង្វែរឡានធំដឹក ទូរកុងតឺន័រឲ្យទៅតាមផ្លូវស្ទឹងហាវវិញផងដែរ កាត់បន្ថយការកកស្ទះចរាចរណ៍។ ទន្ទឹមនោះបញ្ហាខ្សាច់សមុទ្រយកមកឆារលាយជាមួយខ្សាច់កំពង់ស្ពី ក៍ជាបញ្ហាប្រឈមដល់ការដ្ឋានសំណង់នានាក្នុងក្រុងព្រះសីហនុ តម្រូវឲ្យក្រុមការងារសិក្សាផលប៉ះពាល់ដល់ការដ្ឋានសំណង់នានាក្នុងក្រុងព្រះសីហនុ។

     លោក វណ្ណ សុខហេង ប្រធានសភា ពាណិជ្ជកម្មខេត្តព្រះសីហនុ មានប្រ សាសន៍ជំរាបជូនថា សភាពាណិជ្ជកម្មខេត្ត មានតួនាទីក្នុងការសម្របសម្រួលជាមួយសមាជិក និងលើកកម្ពស់ក្នុងការទាក់ទាញវិនិយោគ លើវិស័យពាណិជ្ជកម្ម ឧស្សាហកម្ម កសិកម្ម និងទេសចរណ៍ មកកាន់ខេត្តព្រះសីហនុ។ សូមថ្លែងអំណរគុណដល់ឯកឧត្តមអភិបាលខេត្តថ្មី ព្រមទាំងសុំការជួយគាំទ្រដល់សភាពាណិជ្ជកម្មខេត្ត ឲ្យដំណើរការកាន់តែរលូនបន្តទៀត ក្នុងការចូលរួមចំណែកអភិវឌ្ឍន៍ខេត្តព្រះសីហនុ៕ រតនា

ប្រភព៖ រដ្ឋបាលខេត្តព្រះសីហនុ