រដ្ឋបាលខេត្តស្វាយរៀង បើកកិច្ចប្រជុំលើកទី១ ដើម្បីផ្សព្វផ្សាយសេចក្ដីណែនាំ និងសេចក្ដីសម្រេច របស់ក្រុមការងារថ្នាក់ជាតិចុះមូលដ្ឋាន
April 22, 2019 អ្នកទស្សនា :

     ​នាព្រឹកថ្ងៃចន្ទ ៣រោច ខែចេត្រ ឆ្នាំកុរ ឯកស័ក ព.ស.២៥៦២ ត្រូវនឹងថ្ងៃទី២២ ខែមេសា ឆ្នាំ​២០១៩​​នេះ នៅសាលាខេត្តស្វាយរៀង ឯកឧត្ដម ម៉ែន វិបុល អភិបាល នៃគណៈអភិបាល​ខេត្ត​ស្វាយរៀង និងឯកឧត្ដម ជុំ ហាត ប្រធានក្រុមប្រឹក្សាខេត្ត បានអញ្ជើញចូលរួមក្នុងកិច្ចប្រជុំលើកទី១​ ដើម្បីចុះមូលដ្ឋាននៅខេត្តស្វាយរៀង ដើម្បីគាំទ្រការអនុវត្តកម្មវិធីនយោបាយ និងយុទ្ធសា​ស្ត្រចតុ​កោណដំណាក់កាលទី៤ របស់រាជរដ្ឋាភិបាលកម្ពុជា ក្រោមអធិបតីភាពលោក​ជំទាវកិត្តិសង្គហ​បណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការ​កិច្ច និងជាប្រធានក្រុមការងារថ្នាក់ជាតិចុះមូលដ្ឋាននៅខេត្តស្វាយរៀង។ កិច្ចប្រជុំនេះ​មានការអញ្ជើញចូលរួមពីថ្នាក់ដឹកនាំ សមាជិក សមាជិកាក្រុមការងារ​ថ្នាក់ជាតិចុះមូលដ្ឋាន​ក្រុង-ស្រុក នៃខេត្តស្វាយរៀង សរុបប្រមាណជិត ១.០០០នាក់។

     ឯកឧត្ដម ម៉ែន វិបុល អភិបាល នៃគណៈអភិបាលខេត្ត និងជាអនុប្រធានអចិន្ត្រៃយ៍ នៃក្រុមការ​ងារ​​ថ្នាក់ជាតិចុះមូលដ្ឋាននៅខេត្តស្វាយរៀង បានរាយការណ៍អំពីលទ្ធផលការងារ​សំខាន់ៗដែល​ក្រុមការងារសម្រេចបានរយៈពេលកន្លងមក រួមមានការចុះធ្វើវេទិកាសាធារណៈ ២៧៧លើក មាន​ប្រជាពលរដ្ឋចូលរួមសរុប ៦៥.៥២០នាក់ ស្រី ៣២.១៣៥នាក់ ទទួលបានសំណើ សំណូមពរ ចំនួន ៧៦៩ ដោយបានដោះស្រាយរួច ៥៦២សំណូមពរ ស្មើនឹង ៧៣% ដែលភាគច្រើនជាការកសាង​ហេដ្ឋា​​រចនាសម្ព័ន្ធ ដូចជាផ្លូវថ្នល់ លូទឹក ប្រឡាយទឹក ទំនប់បង្ហៀរទឹក ទំនប់សណ្ដរ ការសាង​សង់អគារសិក្សា ពុទ្ធិកបឋមសិក្សា ឧបដ្ឋានសាលា ព្រះវិហារ កុដិ មណ្ឌលសុខភាព មន្ទីរពេទ្យ​បង្អែក អគារសាលាឃុំ និងស្ពានជាដើម ហើយក្រៅពីនេះ បានធ្វើការឆ្លើយបំភ្លឺ និងទទួលយកនូវ​សំណូមពរផ្សេងៗទៀតទៅធ្វើការដោះស្រាយ តាមសមត្ថកិច្ចរបស់ក្រសួង ស្ថាប័នពាក់ព័ន្ធ ។

      លោកជំទាវកិត្តិសង្គហបណ្ឌិត ម៉ែន សំអន បានថ្លែងនូវការកោតសរសើរចំពោះឯកឧត្តម លោក​ជំទាវ លោក លោកស្រី ដែលបានចុះជួយផ្ទាល់តាមមូលដ្ឋាន និងបានយកអស់ពីស្មារតី កម្លាំងកាយ​ចិត្តក្នុងការបំពេញភារកិច្ច និងជួយគាំទ្រយ៉ាងសកម្មគ្រប់សកម្មភាពរួមចំណែក​តាមដានការអនុ​វត្ត​កម្មវិធីនយោបាយ  និងយុទ្ធសាស្ត្រចតុកោណ របស់រាជរដ្ឋាភិបាល ដោយបានរួមចំណែក ជួយ​ខេត្តស្វាយរៀងទទួលបានជោគជ័យរាល់ភារកិច្ចជាបន្តបន្ទាប់ ពិសេស ការធានាស្ថិរភាពនយោបាយ សន្តិសុខ និង សណ្តាប់ធ្នាប់សាធារណៈ ដែលបានបង្កលក្ខណៈងាយស្រួល ដល់ការអភិវឌ្ឍ​លើគ្រប់​វិស័យ។ លោកជំទាវ ក៏បានផ្ដាំផ្ញើដល់ក្រុមការងារត្រូវទាក់ទងដោយផ្ទាល់​ជាមួយប្រជាជន​នៅមូល​ដ្ឋាន ដោយក្តាប់ឲ្យបានច្បាស់លាស់រាល់សំណូមពរ ឬសគល់នៃបញ្ហា ការប្រឈម និងការលំ​បាក​របស់​ប្រជាជនទូទៅ និងរិះរកគ្រប់មធ្យោបាយ ជួយសម្រួល និងដោះស្រាយ ឲ្យបានទាន់​ពេល​វេលា​ប្រកបដោយប្រសិទ្ធភាព  ដើម្បីផ្តល់ភាពកក់ក្តៅ និងការជឿរជាក់លើរាជរដ្ឋាភិបាល។ ក្តាប់ឲ្យបាន​ច្បាស់​លាស់រាល់សំណូមពរ បញ្ហា ប្រឈម និងការលំបាករបស់ប្រជាជនទូទៅ និងរិះរកគ្រប់​មធ្យោ​បាយ ជួយសម្រួល និងដោះស្រាយ ឲ្យបានទាន់ពេលវេលាប្រកបដោយប្រសិទ្ធភាព និងប្រសិទ្ធិផល ត្រូវបន្តអនុវត្តឲ្យជោគជ័យ នូវកម្មវិធីនយោបាយរបស់រាជរដ្ឋាភិបាល ពិសេសយុទ្ធសាស្រ្ត​ចតុកោណ​ដំណាក់កាលទី ៤ ធ្វើកំណែទម្រង់ស៊ីជម្រៅ កាត់បន្ថយភាពអសកម្មរបស់ថ្នាក់ដឹកនាំ និងមន្ត្រីដោយ​បន្ត​ការ​អនុវត្តតាមទិសស្លោក "ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់" និងត្រូវតាមដាន​នូវ​ប្រសាសន៍របស់សម្តេចអគ្គមហាសេនាបតីតេជោ ហ៊ុន សែន សម្រាប់យកមកផ្សព្វផ្សាយបន្ត ដើម្បីប្រសិទ្ធិភាពការងារ៕ គឹមអាន

ប្រភព៖ រដ្ឋបាលខេត្តស្វាយរៀង

ព័ត៌មានទាក់ទង
ច្បាប់នឹងឯកសារថ្មីៗ
MINISTRY OF INTERIOR

ក្រសួងមហាផ្ទៃមានសមត្ថកិច្ច ដឹកនាំគ្រប់គ្រងរដ្ឋបាលដែនដី គ្រប់ថ្នាក់ លើវិស័យ រដ្ឋបាលដឹកនាំគ្រប់គ្រង នគរបាលជាតិ ការពារសន្តិសុខសណ្តាប់ធ្នាប់សាធារណៈ និងការពារសុវត្ថិភាព ជូនប្រជាពលរដ្ឋ ក្នុងព្រះរាជាណាចក្រកម្ពុជា។

ទាញយកកម្មវិធី ក្រសួងមហាផ្ទៃ​ទៅ​ក្នុង​ទូរស័ព្ទអ្នក
App Store  Play Store
023721905 023726052 023721190
#275 ផ្លូវព្រះនរោត្តម, ក្រុងភ្នំពេញ
ឆ្នាំ២០១៧ © រក្សាសិទ្ធិគ្រប់យ៉ាងដោយ ក្រសួងមហាផ្ទៃ