នៅថ្ងៃទី២៨ ខែវិច្ឆិកា ឆ្នាំ២០១៧ ឯកឧត្តម គិត ទ្រី អភិបាលរងខេត្ត តំណាងឯកឧត្តមអភិបាលខេត្ត បានអញ្ជើញបិទវគ្គបណ្តុះបណ្តាលស្តីពី ការប្រគល់មុខងារត្រួតពិនិត្យមណ្ឌលថែទាំកុមាររបស់អង្គការមិនមែនរដ្ឋាភិបាលឲ្យទៅរដ្ឋបាលរាជធានី ក្រុង ស្រុក និងការប្រគល់មុខងារគ្រប់គ្រងសេវាថែទាំកុមាររងគ្រោះ និងងាយរងគ្រោះនៅក្នុងសហគមន៍ទៅឲ្យរដ្ឋបាលរាជធានី រដ្ឋបាលក្រុង និងរដ្ឋបាលឃុំ នៅសាលាស្រុកលំផាត់ ខេត្តរតនគិរី ។ វគ្គនេះត្រូវបានធ្វើឡើងក្នុងគោលបំណង ផ្តល់នូវចំណេះដឹង និងជំនាញដល់សិក្ខាកាម អំពីនីតិវិធីអនុវត្តមុខងារគ្រប់គ្រងថែទាំកុមាររងគ្រោះ និងងាយរងគ្រោះនៅក្នុងសហគមន៍ និងមុខងារត្រួតពិនិត្យមណ្ឌលថែទាំកុមាររបស់អង្គការមិនមែនរដ្ឋាភិបាល ។ ឯកឧត្តម គិត ទ្រី ថ្លែងបញ្ជាក់ថា ក្នុងគោលបំណងធ្វើឲ្យប្រសើរឡើងនូវគុណភាពសេវាសុខុមាលភាពដល់កុមារ នៅក្នុងព្រះរាជាណាចក្រកម្ពុជា តាមរយៈការបង្ខិតការសម្រេចចិត្ត និងការទទួលខុសត្រូវលើការផ្តល់សេវាទាំងនេះមកឲ្យរដ្ឋបាលថ្នាក់ក្រោមជាតិដែលនៅជិតកុមាររងគ្រោះ និងងាយរងគ្រោះ រាជរដ្ឋាភិបាលកម្ពុជា បានប្រគល់មុខងារ ធនធាន និងហិរញ្ញវត្ថុ មកឲ្យរដ្ឋបាលថ្នាក់ក្រោមជាតិក្នុងនាមជាសេនាធិការ ដើម្បីអនុវត្ត ។ ឯកឧត្តមបន្តថា រាជរដ្ឋាភិបាលកម្ពុជា បានចាត់ទុកគោលនយោបាយកំណែទម្រង់វិមជ្ឈការ និងវិសហមជ្ឈការគឺជាយន្តការដ៏សំខាន់ ក្រោមគោលនយោបាយនេះមុខងារ ធនធាន និងហិរញ្ញវត្ថុត្រូវបានផ្ទេរមកជាបន្តបន្ទាប់ ទាំងនេះគឺជាការយកចិត្តទុកដាក់របស់រាជរដ្ឋាភិបាលកម្ពុជា ដើម្បីឲ្យរដ្ឋបាលថ្នាក់ក្រោមជាតិមានសិទ្ធិគ្រប់គ្រាន់លើការអនុវត្តមុខងារ និងអាចឆ្លើយតបបានទាន់ពេលវេលានូវតម្រូវការរបស់មូលដ្ឋាន ។ ដោយឡែករដ្ឋបាលថ្នាក់ស្រុក និងឃុំ ត្រូវរៀបចំផែនការបម្រុងទុកជាមុន ដូចជាទីតាំងជាដើម ជៀសវាងការផ្ទេរមុខងារមកហើយគ្មានលទ្ធភាពគ្រប់គ្រាន់ក្នុងការអនុវត្ត ។ ប្រភពព័ត៌មាន: រដ្ឋបាលខេត្តរតនគិរី( ថ្ងៃទី២៨ ខែវិច្ចិកា ឆ្នាំ២០១៧ )
