លោកស្រី ឯក សុវណ្ណភារៈ អភិបាលរង តំណាងឯកឧត្តម ម៉ែន វិបុល អភិបាលខេត្ត និងឯកឧត្តមជុក មុន្នី រដ្ឋលេខាធិការក្រសួងមុខងារសាធារណៈ បានអញ្ជើញជាគណៈអធិបតីក្នុងកិច្ចប្រជំុការអនុវត្តអនុសញ្ញា CEDAW  អនុសាសន៍សម្តេចតេជោនាយករដ្ឋមន្ត្រី និងច្បាប់ជាតិពាក់ព័ន្ធទៅនឹងការលុបបំបាត់រាល់ទម្រង់ នៃការរើសអើងនារីភេទ នៅសាលប្រជុំសាលាខេត្ត នៅស្នងការដ្ឋាននគរបាលខេត្ត និងនៅសាលាដំបូងខេត្តស្វាយរៀង។

      កិច្ចប្រជុំនេះបានផ្ដោតសំខាន់ទៅលើស្រ្តី ពិសេសបញ្ហាពេស្យាចារ ការជួញដូរមនុស្សអំពើហិង្សាក្នុងគ្រួសារ និងការប្រើប្រាស់គ្រឿងញៀន ដែលជាហេតុ នាំឲ្យមានអសន្តិសុខ សង្គម បញ្ហាកិច្ចប្រតិបត្តិការណ៍ បង្ការបង្ក្រាបបទល្មើស របស់កងកម្លាំងយើងកន្លងមក និងបញ្ហាប្រឈមមួយចំនួនផងដែរ។ 

      នៅថ្ងៃអង្គារ ១៤រោច ខែផល្គុន ឆ្នាំច សំរឹទ្ធិស័ក ព.ស២៥៦២ត្រូវនឹងថ្ងៃទី១៩ មីនា ២០១៩នេះ គណៈអធិបតីបានធ្វើការកោតសសើរ ដល់កងកម្លាំងប្រដាប់អាវុធទាំងពីរប្រភេទ ដែលបានខិតខំ ពុះពាររាល់ឧបសគ្គ ក្នុងការការពារថែរក្សា សន្តិសុខ សុវត្ថិភាព និងសណ្ដាប់ធ្នាប់ជូនប្រជាពលរដ្ឋក្នុងខេត្ត ក៏ដូចជាថ្នាក់ដឹកនាំជាន់ខ្ពស់ជាតិ អន្តរជាតិ បានយ៉ាងល្អប្រសើរនាពេលកន្លងមក និងបានផ្ដាំផ្ញើរ ដល់កងកម្លាំងទាំងអស់ បន្តធ្វើការផ្សព្វផ្សាយបន្ថែមទៀត អំពីគោលនយោបាយភូមិឃុំមានសុវត្ថិភាព ជូនដល់ប្រជាពលរដ្ឋ និងសិស្សានុសិស្ស ដើម្បីទប់ស្កាត់រាល់បទល្មើស ពិសេសការជួញដូរមនុស្ស និងចែកចាយ ប្រើប្រាស់គ្រឿងញៀន ហើយសូមជូនពរ ឯកឧត្តម អស់លោក លោកស្រី ឲ្យជួបតែសេចក្តីសុខ សេចក្តីចំរើន និងបំពេញភារកិច្ចការងារទទួលបានជោគជ័យ ៕​មុនីរម្យ

ប្រភព៖ រដ្ឋបាលខេត្តស្វាយរៀង