នៅព្រឹកថ្ងៃអង្គារ១៤ កើត ខែផល្គុន ឆ្នាំច សំរឹទ្ធិស័ក ព.ស២៥៦២ត្រូវនឹងថ្ងៃទី១៩ ខែមីនា ឆ្នាំ២០១៩ លោក ហែម ពិសិដ្ឋ អភិបាលរងខេត្តស្វាយរៀង តំណាងឯកឧត្តម ម៉ែន វិបុល អភិបាលខេត្តបានដឹកនាំក្រុមការងាររួមមានលោកស្នងការរងនគរបាលខេត្ដ លោកប្រធានមន្ទីររៀបចំដែនដី លោកប្រធានមន្ទីរកសិកម្ម តំណាងកងរាជអាវុធហត្ថខេត្ដ តំណាងតំបន់ប្រតិបត្ដិការសឹករងស្វាយរៀង លោកអភិបាលស្ដីទី ស្រុករមាសហែក  លោកនាយកទីចាត់ការអន្ដរវិស័យ លោកនាយករងទីចាត់ការហិរញ្ញវត្ថុ ព្រមទាំងមន្រ្ដីសាលាខេត្ដ ស្រុក មេឃុំ មេភូមិ បានអញ្ជើញអមដំណើរប្រតិភូឯកឧត្តម ប៉េង ហុងសុជាតិខេមរ៉ូ អគ្គនាយក នៃអគ្គនាយកដ្ឋានលំនៅដ្ឋាន ក្រសួងរៀបចំដែនដី នគរូបនីយកម្ម និងសំណង់ ចុះពិនិត្យទីតាំងស្នើសុំអនុយោគ ស្ថិតនៅភូមិជីកដី ឃុំអណ្ដូងត្របែក ស្រុករមាសហែក ខេត្ដស្វាយរៀង សម្រាប់អនុវត្ដគម្រោងសាងសង់សម្បទានដីសង្គមកិច្ច ចែកជូនគ្រួសារយោធិន នគរបាល និវត្ដជន គ្រួសារពលី មរណៈ និងគ្រួសារទីទល់ក្រ ជំហានទី២ ។
 
      ក្នុងឱកាសនេះដែរ ឯកឧត្តម អគ្គនាយកលំនៅដ្ឋាន ក្រសួងរៀបចំដែនដី បានដឹកនាំក្រុមហ៊ុនសាងសង់ មកពិនិត្យទីតាំងសាងសង់ជំហានទី២ ចំនួន ២០០ខ្នងផ្ទះ នៅភូមិជីកដី ឃុំអណ្ដូងត្របែក ហើយនឹងគ្រោងដឹកជញ្ជូនសម្ភារសំណង់ផ្សេងៗ មកដំណើរការសាងសង់ផ្ទះ នាចុងខែមីនា ឆ្នាំ២០១៩ខាងមុខនេះ ព្រមស្នើសុំឲ្យមានកម្លាំងសមត្ថកិច្ចសហការការពារសន្តិសុខ ដល់ក្រុមហ៊ុនសាងសង់ផងដែរ ។

      ជាមួយគ្នានេះលោក ហែម ពិសិដ្ឋ អភិបាលរងខេត្ដ បានសំណូមពរដល់ក្រសួង និងក្រុមហ៊ុន ស្នើសុំធ្វើការបោះពុម្ពប៉ាណូអំពីប្លង់សាងសង់ និងសជណ ដែលបានអនុប្បយោគដីសម្បទានសង្គមកិច្ចគម្រោងសាងសង់ជំហាន២ នៅខាងមុខផ្លូវចូល ឲ្យបានរួចរាល់ មុននឹងដំណើរការសាងសង់ ហើយក្រុមការងារខេត្ដ នឹងរៀបចំវេទិការសាធារណៈ ដើម្បីផ្សព្វផ្សាយឲ្យអំពីគោលនយោបាយរបស់រាជរដ្ឋាភិបាល ដើម្បីចៀសវាងកាតវ៉ាពីសំណាក់ប្រជា ពលរដ្ឋ ។ ចំពោះការការពារសន្ដិសុខដល់ក្រុមហ៊ុន កម្លាំងសមត្ថកិច្ចត្រៀមសហការការពារនៅពេលដែលក្រុមហ៊ុនសាងសាង់ នឹងដាក់កម្លាំងពេលក្រុមជាងមកដល់៕ មុនីរម្យ

ប្រភព៖ រដ្ឋបាលខេត្តស្វាយរៀង