នៅស្នងការដ្ឋាននគរបាលខេត្តស្វាយរៀង មានរៀបចំពិធីបិទសន្និបាតបូកសរុបសភាពការណ៍ កិច្ចប្រតិបត្តិការរក្សាសន្តិសុខ សណ្ដាប់ធ្នាប់សង្គមប្រចាំឆ្នាំ២០១៨ និងទិសដៅការងារឆ្នាំ២០១៩ របស់ស្នងការដ្ឋាននគរបាលខេត្តស្វាយរៀង និងផ្សព្វផ្សាយទិសដៅការងារ ឆ្នាំ២០១៩ របស់អគ្គស្នងការដ្ឋាននគរបាលជាតិ ក្រោមអធិបតីភាព ឯកឧត្តម ឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ តំណាងឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងលោក ហែម ពិសិដ្ឋ អភិបាលរងខេត្ត តំណាងឯកឧត្តម ម៉ែន វិបុល អភិបាល នៃគណៈអភិបាលខេត្តស្វាយរៀង និងមានការអញ្ជើញចូលរួមពីលោកឧត្តមសេនីយ៍ទោស្នងការនគរបាលខេត្ត លោកមេបញ្ជាការតំបន់ប្រតិបត្តិការសឹករងស្វាយរៀង លោកមេបញ្ជាការកងរាជអាវុធហត្ថខេត្ត លោកតំណាងប្រធានសាលាដំបូងខេត្ត លោកព្រះរាជអាជ្ញាខេត្ត លោកប្រធានមន្ទីរ-អង្គភាព លោកអភិបាលក្រុង ស្រុក លោក លោកស្រី ស្នងការរង លោកអនុប្រធានសេនាធិការ លោកអនុប្រធានការិយាល័យកណ្តាល លោក លោកស្រី នាយ នាយរងការិយាល័យ លោកមេបញ្ជាការ លោកមេបញ្ជាការរងវរសេនាតូច នគរបាលការពារព្រំដែនគោកទាំងពីរ លោកអធិការ អធិការរងនគរបាលក្រុង ស្រុក នាយប៉ុស្តិ៍នគរបាលរដ្ឋបាលឃុំ សង្កាត់ លោកនាយប៉ុស្តិ៍នគរបាលការពារព្រំដែន និងកងកម្លាំង សរុបវត្តមានប្រមាណ ២៨៨នាក់។
មានប្រសាសន៍បិទសន្និបាទ ក្នុងឱកាសនោះ ឯកឧត្តម ឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ និងលោក ហែម ពិសិដ្ឋ អភិបាលរងខេត្ត នារសៀលថ្ងៃសុក្រ ១០រោច ខែមាឃ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០១ ខែមីនា ឆ្នាំ២០១៩នេះ បានសម្ដែងនូវការកោតសរសើរចំពោះថ្នាក់ដឹកនាំស្នងការដ្ឋាននគរបាលខេត្តស្វាយរៀង ដែលបានដឹកនាំកងកម្លាំង ក្នុងការងាររក្សាការពារសន្តិសុខ សណ្តាប់ធ្នាប់សង្គមបានយ៉ាងល្អប្រសើរ ជូនប្រជាពលរដ្ឋ និងវិនិយោគទុនជាតិ អន្តរជាតិ ជាពិសេសបានអភិវឌ្ឍន៍អង្គភាព ចាប់តាំងពីថ្នាក់ស្នងការដ្ឋាននគរបាលខេត្ត រហូតដល់ប៉ុស្តិ៍រដ្ឋបាលឃុំសង្កាត់ ។
ក្នុងឱកាសនោះផងដែរ គណៈអធិបតី បានសំណូមពរដល់កងកម្លាំងទាំងអស់ត្រូវបន្តការងារឲ្យបានល្អបន្ថែមទៀត ជាពិសេសការអនុវត្តគោលនយោបាយភូមិឃុំ មានសុវត្ថិភាព ការចូលរួមបង្ក្រាបបទល្មើសគ្រឿងញៀន និងអនុវត្តច្បាប់ចរាចរណ៍ផ្លូវគោក ដើម្បីកាត់បន្ថយគ្រោះថ្នាក់ចរាចរណ៍ឲ្យបានជាអតិបរិមា ។
បន្ទាប់មកឯកឧត្តមគណៈអធិបតី ក៏បានអញ្ជើញកាត់ខ្សែបូរ សម្ពោធដាក់ឲ្យប្រើប្រាស់ជាផ្លូវការក្លឹបហាត់ក្បាច់គុន របស់ស្នងការដ្ឋាននគរបាលខេត្ត ដែលមានទំហំ ២០x១៦ម៉ែត្រ និងកំពស់ ៦ ម៉ែត្រ ដែលចំណាយថវិកា អស់ប្រមាណ ៥ ម៉ឺនដុល្លារ ព្រមទាំងបានធ្វើពិធីប្រគល់ប្រកាសតែងតាំងមុខតំណែងស្នងការរងនគរបាលខេត្ត ១ រូប និងបំពាក់ឋានន្តរស័កិ្ត ៧ រូប និងគ្រឿងឥស្សរយសជូនមន្ត្រីចំនួន២៤រូប ៕មុនីរម្យ
ប្រភព៖ រដ្ឋបាលខេត្តស្វាយរៀង
