នាព្រឹកថ្ងៃទី១១ ខែមករា ឆ្នាំ២០១៩នេះ ឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម អមដំណើរដោយមន្ត្រីជំនាញពាក់ព័ន្ធ បានអញ្ជើញចុះពិនិត្យការជួសជុល សាងសង់ផ្លូវចំនួន៣ខ្សែ នៅក្នុងក្រុងកំពង់ចាម និងស្រុកកំពង់សៀម ដែលប្រជាពលរដ្ឋមានការត្រេកអរសាទរជាខ្លាំង ។
ឆ្លៀតក្នុងឱកាស ចុះពិនិត្យគម្រោងស្ថាបនាផ្លូវខាងលើនេះ ឯកឧត្តម គួច ចំរើន អភិបាលខេត្តកំពង់ចាម ក៏បានជួបសំណេះសំណាលសាកសួរសុខទុក្ខ បងប្អូនប្រជាពលរដ្ឋ ដែលរស់នៅ អមតាមដងផ្លូវជាហូរហែ ដោយឯកឧត្តមអភិបាលខេត្ត បានស្នើសុំ និងលើកទឹកចិត្ត សូមឲ្យប្រជាពលរដ្ឋ ចូលរួមសហការជាមួយអាជ្ញាធរមូលដ្ឋាន ដើម្បីបង្កលក្ខណៈងាយស្រួលដល់ដំណើរការសាងសង់ ផងដែរ។
សូមបញ្ជាក់ថា ផ្លូវចំនួន៣ខ្សែ ដែលគ្រោងធ្វើការស្ថាបនានេះរួមមាន៖ ទី១-ផ្លូវចាក់កៅស៊ូ DBST ចាប់ពីកែងផ្លូវលេខ៤៧-៥ ទន្លេអ៊ុ ដល់រង្វង់មូលនាគព័ន្ធ តភ្ជាប់ផ្លូវជាតិលេខ៧ ស្របតាមផ្លូវទន្លេអ៊ុ ប្រវែង ១,២២០ម៉ែត្រ និងទទឹង៧ម៉ែត្រ ទី២- ការជួសជុល សាងសង់ផ្លូវបេតុងអាមេ ប្រវែង ៩០០ម៉ែត្រ និងទទឹង៦ម៉ែត្រ កំរាស់ ០,១៥ម៉ែត្រ ស្ថិតក្នុងភូមិអំពិល ឃុំអំពិល ស្រុកកំពង់សៀម និងទី៣- ការជួសជុល សាងសង់ផ្លូវបេតុងអាមេដែលបំបែកចូលពីផ្លូវជាតិលេខ៧ ទៅសាលាបឋមសិក្សា ហ៊ុន សែន រោងចក្រ ប្រវែង១,២៣០ម៉ែត្រ និងទទឹង៦ម៉ែត្រ កំរាស់ ០,១៥ម៉ែត្រ ស្ថិតក្នុងភូមិអំពិល ឃុំអំពិល ស្រុកកំពង់សៀម៕ មុនីរម្យ
ប្រភព៖ រដ្ឋបាលខេត្តកំពង់ចាម