រសៀលថ្ងៃព្រហស្បតិ៍ ៥កើត ខែបុស្ស ឆ្នាំច សំរិទ្ធស័ក ព.ស២៥៦២ ត្រូវនឹងថ្ងៃទី១០ ខែមករា ឆ្នាំ២០១៨ ឯកឧត្តម វ៉ី សំណាង អភិបាល នៃគណៈអភិបាលខេត្តកំពង់ស្ពឺ បានអញ្ជើញជាអធិបតីក្នុងពិធីចុះហត្ថលេខាលើអនុស្សារណៈយោគយល់គ្នារវាង រដ្ឋបាលខេត្តកំពង់ស្ពឺ នៃព្រះរាជាណាចក្រកម្ពុជា ជាមួយនឹង សមាគមអ្នកវិនិយោគចិន-កម្ពុជា ។

        មានប្រសាសន៍នៅក្នុងឱកាសនោះ ឯកឧត្ដម វ៉ី សំណាង អភិបាលខេត្ត បានសម្ដែងនូវការគាំទ្រ និងចាត់ទុកពិធីចុះហត្ថលេខាលើអនុស្សរណៈយោគយល់គ្នានាថ្ងៃនេះ គឺជាព្រឹត្តិការណ៍ដ៏សំខាន់មួយ ដែលតំណាងឲ្យកិច្ចសហប្រតិបត្តិការយូរអង្វែងរវាងស្ថាប័នទាំងពីរ ក្នុងការជួយគាំទ្រ និងសហការ លើការបង្កើតឱកាសការងារដែលជាវិភាគទានដ៏សំខាន់ក្នុងការចូលរួមចំណែកអភិវឌ្ឍន៍ប្រទេសជាតិ ឲ្យកាន់តែមានការរីកចម្រើនបន្ថែមទៀត ហើយក្នុងនាមអាជ្ញាធរខេត្ត ឯកឧត្ដមអភិបាលខេត្ត បានលើកទឹកចិត្ត គាំទ្រ និងផ្ដល់នូវកិច្ចសហការជានិច្ចជាមួយក្រុមហ៊ុននូវរាល់គម្រោងវិនិយោគនានាក្នុងខេត្តកំពង់ស្ពឺ ដើម្បីបង្កើតការងារធ្វើ កាត់បន្ថយចំណាកស្រុក បង្កើនចំណូល និងជួយលើកកម្ពស់ជីវភាពរស់នៅរបស់ប្រជាពលរដ្ឋ។

      គួរបញ្ជាក់ផងដែរថា គោលបំណងក្នុងពិធីចុះហត្ថលេខាលើអនុស្សារណៈយោគយល់គ្នារវាង រដ្ឋបាលខេត្តកំពង់ស្ពឺ នៃព្រះរាជាណាចក្រកម្ពុជា ជាមួយនឹង សមាគមអ្នកវិនិយោគចិន-កម្ពុជា គឺផ្ដោតសំខាន់លើការវិនិយោគលើគ្រប់វិស័យដែលរួមមានអគារស្នាក់នៅ ផ្សារទំនើប កន្លែងកំសាន្ត និងតំបន់អេកូទេសចរណ៍ផងដែរ ។ អែមមី

ប្រភពៈ រដ្ឋបាលខេត្តកំពង់ស្ពឺ