នាថ្ងៃអង្គារ ៣រោច ខែមិគសិរ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៥ ខែធ្នូ ឆ្នាំ២០១៨ រដ្ឋបាលខេត្តកោះកុង បានរៀបចំពិធីអបអរសាទរទិវាលប់បំបាត់ការជួញដូរមនុស្ស ១២ ធ្នូ ឆ្នាំ២០១៨ ក្រោមអធិបតី លោកស្រី ឈុន រ៉ាវុធ អភិបាលរងខេត្តកោះកុង ដោយមានការចូលរួមពី ប្រធាន អនុប្រធាន មន្ត្រីរាជការជាច្រើនរូបទៀត។

       ថ្លែងនៅក្នុងឱកាសនោះ លោកស្រីអភិបាលរងខេត្ត បានគូសបញ្ជាក់ថា អំពើជួញដូរមនុស្ស គឺជាឧក្រិដ្ឋកម្មដ៏រ៉ាំរ៉ៃមួយដែលអាចកើតមានឡើងនៅគ្រប់បណ្ដាប្រទេសក្នុងពិភពលោក ក្នុងចំណោមឧក្រិដ្ឋកម្មដទៃទៀត ដែលកំពុងធ្វើឲ្យប៉ះពាល់សន្តិសុខមនុស្ស និងប្រទេសជាតិ។ ប្រជាពលរដ្ឋមួយចំនួន បាននិងកំពុងទទួលរងគ្រោះយ៉ាងធ្ងន់ធ្ងរ អំពើជួញដូរមនុស្សតាមរយៈ ការកេងប្រវ័ញ្ចគ្រប់រូបភាព ការរំលោភបំពានសិទ្ធិ សេរីភាព កិត្តិយស និងសេចក្តីថ្លៃថ្នូររបស់មនុស្ស ដោយបានបំផ្លាញដល់រាងកាយ និងបញ្ញា ស្មារតីជនរងគ្រោះ ដែលបញ្ហាទាំងនេះអាចនឹងធ្វើឲ្យមានវិបត្តិ ក្នុងសង្គមកាន់តែធ្ងន់ធ្ងរ ប្រសិនបើមិនមានការទប់ស្កាត់ និងបង្ក្រាបទាន់ពេលវេលានោះទេ។

      ជាពិសេស ការប្រារព្ធទិវាប្រយុទ្ធប្រឆាំងអំពើជួញដូរមនុស្សនាថ្ងៃនេះ គឺជាយុទ្ធនាការដ៏ធំមួយ ដើម្បីបំផុសការចូលរួមពីថ្នាក់ដឹកនាំ ក្នុងជួរមន្ត្រីរាជការ អង្គការសង្គមស៊ីវិល និងផ្នែកឯកជន ក៏ដូចជាបងប្អូនប្រជាពលរដ្ឋគ្រប់រូប អោយមានឆន្ទៈមោះមុត និងការប្ដេជ្ញាចិត្តខ្ពស់ ដើម្បីចូលរួមទាំងអស់គ្នាក្នុងការបង្ការ ទប់ស្កាត់ ការពារប្រជាពលរដ្ឋ និងប្រទេសជាតិយើងឲ្យរស់នៅដោយសុខដុមរមនា និង គ្មានការជួញដូរមនុស្ស ៕ មុនីរម្យ

ប្រភពៈ រដ្ឋបាលខេត្តកោះកុង