ក្នុងពិធីប្រកាសចូលកាន់មុខតំណែងអភិបាល អភិបាលរង នៃគណៈអភិបាលក្រុង និងនាយក​រដ្ឋបាលសាលាក្រុងស្វាយរៀងនាព្រឹកថ្ងៃពុធ ០៦រោច ខែកត្ដិក ឆ្នាំច សំរឹទ្ធិស័ក ព.ស.២៥៦២ ត្រូវ​នឹងថ្ងៃទី២៨ ខែវិច្ឆិកា ឆ្នាំ២០១៨នេះនាសាលាខេត្ត ឯកឧត្ដម ម៉ែន វិបុល អភិបាល នៃគណៈ​អភិបាល​ខេត្តស្វាយរៀង បានមានប្រសាសន៍ទៅកាន់ មន្រ្តីដែលចូល​កាន់មុខ​តំណែងថ្មីនៅ​សាលា​ក្រុងស្វាយរៀងថា ត្រូវពង្រឹងការសាមគ្គីភាព ឯកភាពផ្ទៃក្នុង និងពង្រឹងរបៀបរបបធ្វើការងារ ដោយ​ត្រូវចៀសឲ្យបាននូវទំនាស់ផលប្រយោជន៍ និងទំនាស់ដែលកើតចេញពីការប្រើអំណាចមិនត្រឹមត្រូវ លើសពីនេះត្រូវបង្កើនការសហការក្នុងការថែរក្សាពង្រឹងសន្តិភាព ស្ថិរភាពនយោបាយ សន្តិសុខ​សណ្ដាប់​ធ្នាប់សាធារណៈ ការបង្ការទប់ស្កាត់ និងបង្រ្កាបបទល្មើសនានា ជាពិសេសបទល្មើស​គ្រឿង​ញៀន ចោរកម្ម និងល្បែងស៊ីសង។ ឯកឧត្ដមបន្តថា គណៈអភិបាលក្រុង ត្រូវរៀបចំធ្វើការបែង​ចែក​តួនាទី ភារកិច្ច និងការទទួលខុសត្រូវក្នុងជួរគណៈអភិបាលក្រុងឲ្យបានច្បាស់លាស់ និងត្រូវបន្ត​ពង្រឹង​ការ​គ្រប់គ្រងការិយាល័យច្រកចេញចូលតែមួយ ឲ្យបានល្អ ហើយត្រូវយក​ចិត្តទុកដាក់គ្រប់​គ្រង និងណែនាំស្មៀនសង្កាត់ដែលស្ថិតនៅក្រោមការគ្រប់គ្រងរបស់រដ្ឋបាលក្រុង ឲ្យអនុវត្តបានត្រឹម​ត្រូវ​តាមតួនាទី ភារកិច្ចរបស់ខ្លួន។ ឯកឧត្ដមបន្ថែមថា គណៈអភិបាលក្រុងត្រូវពង្រឹងការគ្រប់គ្រង និង​អភិវឌ្ឍន៍​សមត្ថភាពមន្ត្រីរាជការ ហើយត្រូវបង្កើនការរៀបចំសណ្ដាប់ធ្នាប់ របៀបរៀបរយ បរិស្ថាន អនាម័យនៅក្នុងក្រុង ជាពិសេសនៅខាងក្នុង និងជុំវិញផ្សារវាយយន្ត នៅតាមដងផ្លូវ និងសួន​ច្បារសាធារណៈ ដើម្បីលើកកម្ពស់សោភ័ណភាព ជំរុញចលនាប្រឡងប្រណាំងទីក្រុងស្អាត ជាពិសេស​ត្រូវបន្តជំរុញរឹតបន្តឹងការអនុវត្តច្បាប់ចរាចរណ៍ផ្លូវគោកឲ្យបានម៉ឺងម៉ាត់បំផុត និងខិតខំរួម​សហការគ្នាអភិវឌ្ឍន៍ក្រុងឲ្យកាន់តែមានការរីកចម្ររើនថែមទៀត ព្រមទាំងត្រូវចុះដោះស្រាយបញ្ហា ឆ្លើយតបនឹងសេចក្ដីត្រូវការពិតប្រាកដ និងជាក់ស្ដែងរបស់ប្រជាពលរដ្ឋឲ្យបានកាន់តែល្អជាងមុន ទូលាយជាងមុន ប្រសិទ្ធភាពជាងមុន និងទទួលបានផលច្រើនជាងមុន។

     សូមបញ្ជាក់ថា មន្រ្តីបីរូបត្រួវបានប្រកាសចូលកាន់តំណែងរួមមាន លោក ណុប ចំរើន ត្រូវបានតែងតាំងជាអភិបាលក្រុង លោក ជួន ចាន់ឫទ្ធី ជាអភិបាលរងក្រុង និងលោក ភឹម ថា ជានាយរដ្ឋបាលសាលាក្រុង៕គឹមអាន

ប្រភព៖រដ្ឋបាលខេត្តស្វាយរៀង