នារសៀលថ្ងៃអង្គារ ៥រោច ខែកត្តិក ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៧ ខែវិច្ឆិកា ឆ្នាំ២០១៨ លោក ពៅ ពិសិដ្ឋ អភិបាលរងខេត្ត និងជាតំណាងដ៏ខ្ពង់ខ្ពស់ ឯកឧត្តម បណ្ឌិត ឃឹម ប៊ុនសុង អភិបាល នៃគណៈអភិបាលខេត្តសៀមរាប បានទទួលជួបពិភាក្សាការងារ ជាមួយលោក Frederic Valletoux អភិបាលក្រុង Fontaine Bleau នៃសាធារណៈរដ្ឋបារាំង ដើម្បីចងសម្ព័ន្ធមេត្រីជាមួយគ្នា និងពង្រឹងទំនាក់ទំនង និងសហប្រតិបត្តិការអន្តរជាតិ ជាពិសេសដល់ភ្ញៀវ និងអ្នកវិនិយោគ ដែលបានអញ្ជើញមកខេត្តសៀមរាប។ លោកអភិបាលរងខេត្ត ក៏បានសំណូមពរដល់ប្រតិភូក្រុង Fontaine Bleau នៃសាធារណៈរដ្ឋបារាំង ជួយពង្រឹងដល់វិស័យសុខាភិបាល វិស័យអប់រំ យុវជន និងកីឡា វិស័យវប្បធម៌ និងវិចិត្រសិល្បៈ វិស័យទេសចរណ៍ និងជួយធ្វើការអភិវឌ្ឍក្រុងសៀមរាប អោយភ្ញៀវទេសចរណ៍ និងអ្នកវិនិយោគ មកទស្សនៈកិច្ច កាន់ប្រទេសកម្ពុជា ជាពិសេសខេត្តសៀមរាប អោយមានកំណើនឡើងច្រើនថែមទៀត។ ក្នុងនោះដែរ លោក Frederic Valletoux អភិបាលក្រុង Fontaine Bleau នៃសាធារណៈរដ្ឋបារាំង ក៏បានសន្យាថា នឹងជម្រុញអោយមានកិច្ចសហការល្អ និងជួយជម្រុញអ្នកវិនិយោគ និងអ្នកទេសចរណ៍ ទាំងអស់ មកប្រទេសកម្ពុជា ជាពិសេសគឺខេត្តសៀមរាប អោយមានកំណើនឡើងជាបន្តបន្ទាប់៕គឹមអាន
ប្រភព៖រដ្ឋបាលខេត្តសៀមរាប