លោក រស់ ផារិទ្ធ អភិបាលរងខេត្តស្វាយរៀង និងជាប្រធានមណ្ឌលប្រឡង កាលពីថ្ងៃអាទិត្យ ១​១កើត ខែកត្ដិក ឆ្នាំច សំរឹទ្ធិស័ក ព.ស.២៥៦២ ត្រូវនឹងទី១៨ ខែវិច្ឆិកា ឆ្នាំ២០១៨ម្សិលមិញនេះ បានអញ្ជើញបើកវិញ្ញាសាប្រឡងក្របខ័ណ្ឌមន្ត្រីពន្ធនាគារ ក្រសួងមហាផ្ទៃ នៅវិទ្យាល័យស្វាយរៀង ក្រុងស្វាយរៀង ខេត្តស្វាយរៀង។

     ក្នុងពិធីនោះផងដែរក៏មានការអញ្ជើញចូលរួមពីតំណាងក្រសួងមហាផ្ទៃ លោកនាយរដ្ឋបាលសា​លាខេត្ត លោកនាយកទីចាត់ការសាលាខេត្ត លោកប្រធានពន្ធនាគារខេត្ត ព្រមទាំងមន្ត្រីរាជការពាក់ព័ន្ធមួយចំនួនទៀត ។

     មានប្រសាសន៍ក្នុងឱកាសនោះ លោកអភិបាលរង បានលើកទឹកចិត្តដល់បេក្ខជនទាំងអស់ត្រូវខិត​ខំប្រឹងប្រែងឲ្យអស់ពីសមត្ថភាព ធ្វើឲ្យបានរួចរាល់លើគ្រប់វិញ្ញាសារដែលបានដាក់ក្នុងការប្រឡង គោរពឲ្យបានខ្ជាប់ខ្ជួននូវបទបញ្ញត្តិ និងបទបញ្ជាផ្ទៃក្នុងនៃការប្រឡង ដោយមិនត្រូវលួចចម្លងគ្នា មើ​លគ្នា ពិភាក្សាគ្នា មិនត្រូវគូសសញ្ញាសម្គាល់លើក្រដាសវិញ្ញាសារ និងលួចលាក់ប្រើប្រាស់ឧបករណ៍អេឡិចត្រូនិកនោះឡើយ។

សូមបញ្ជាក់ផងដែរថា វិញ្ញាសារក្នុងការប្រឡងក្របខ័ណ្ឌមន្ត្រីពន្ធនាគារនេះមានចំនួន ០២គឺចំណេះដឹងទូទៅ ចំណេះដឹងលើវិស័យពន្ធនាគារ និងគណិតវិទ្យា រយៈពេល១ម៉ោង៣០នាទី តែងសេចក្ដី ឬការសរសេរលិខិតរដ្ឋបាល រយៈពេល១ម៉ោង៣០នាទី និងមានបេក្ខជនដាក់ពាក្យប្រឡង ១១១នាក់ មកប្រឡង ចំនួន ១០៧នាក់ ៕សិដ្ឋ

ប្រភព៖ រដ្ឋបាលខេត្តស្វាយរៀង