នៅថ្ងៃសុក្រ ៩កើត ខែកត្តិក ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៦ ខែវិច្ឆិកា ឆ្នាំ២០១៨ លោក អន ភារៈ អភិបាលរងខេត្តកោះកុង បានអញ្ជើញស្វាគមន៍ ឯកឧត្តម រិន វីរៈ រដ្ឋលេខាធិការ​ប្រចាំការ ក្រសួងផែនការ និងឯកឧត្តម កាយ សំរួម ប្រធានក្រុមប្រឹក្សាខេត្តកោះកុង ក្នុងពិធីផ្សព្វ​ផ្សាយលទ្ធផល ផលិតផលក្នុងស្រុកសរុប(GDP) ឆ្នាំ២០១៧។

      លោកអភិបាលរង បានលើកឡើងជូនអង្គពិធីទាំងមូលបានជ្រាប អំពីស្ថានភាពភូមិសាស្ត្រ និង​ប្រជាសាស្ត្រក្នុងខេត្តកោះកុង កន្លងមករដ្ឋបាលខេត្ត មានទិន្នន័យមួយចំនួនដូចជា ឯកសារ​ព័ត៌មាន​ស្ថានភាពស្តីពីសេដ្ឋកិច្ច សង្គមកិច្ចខេត្ត តារាងព័ត៌មានពិន្ទុវិស័យរបស់ខេត្ត ដែលផលិតដោយ​មន្ទីរ​ផែនការខេត្ត និងបានធ្វើបច្ចុប្បន្នភាពជារៀងរាល់ឆ្នាំ និងព័ត៌មានផ្សេងៗទៀតរបស់មន្ទីរ អង្គភាព​ជំនាញសម្រាប់ប្រើប្រាស់ ធ្វើជាមូលដ្ឋានក្នុងការរៀបចំផែនការអភិវឌ្ឍន៍ ការរៀបចំកម្មវិធីវិនិយោគ​បីឆ្នាំរំកិល និងសម្រាប់ធ្វើសេចក្តីសម្រេចចិត្តរបស់ថ្នាក់ដឹកនាំខេត្ត ដើម្បីអភិវឌ្ឍខេត្តឲ្យកាន់មាន​ប្រសិទ្ធភាព។ លោកអភិបាលរង បានបន្តទៀតថា ទិន្នន័យដែលប្រមូលបានពីបណ្តាមន្ទីរ អង្គភាព និងវិស័យឯកជនមួយចំនួន ផ្ដល់តាមរយៈមន្ទីរផែនការខេត្ត ជូននាយកដ្ឋានគណនេយ្យជាតិ វិទ្យា​ស្ថានជាតិស្ថិតិ នៃក្រសួងផែនការ ដើម្បីធ្វើការគណនា និងវិភាគចេញជាលទ្ធផល​សម្រាប់​ថ្ងៃ​នេះ គឺពិតជាមានសារៈសំខាន់យ៉ាងខ្លាំង សម្រាប់ការបំពេញបន្ថែមនូវព័ត៌មានជាក់លាក់​ក្នុងការ​អភិវឌ្ឍ​ខេត្ត​។ លើសពីនេះទៅទៀត លទ្ធផលនៃការគណនានេះ ពិតជាបានធ្វើឲ្យខេត្ត ដឹងអំពីចំណូល ចំណាយ​របស់ខេត្ត ចំណូល ចំណាយសម្រាប់មនុស្សម្នាក់ៗក្នុងខេត្ត ការវាស់វែងអតិផរណាក្នុងខេត្ត និងជា​ព័ត៌មានដែលមិនអាចខ្វះបានសម្រាប់ខេត្តដើម្បីធ្វើការទាក់ទាញអ្នកវិនិយោគគិន និងការរៀប​ចំគោលនយោបាយផ្សេងៗទៅថ្ងៃអនាគត។ សម្រាប់ខេត្តកោះកុង ទាំងថ្នាក់ដឹកនាំខេត្ត មន្ទីរ អង្គភាព​ក្រោម​ឱវាទ និងអាជ្ញាធរមូលដ្ឋានគ្រប់លំដាប់ថ្នាក់ បានខិតខំយកចិត្តទុកដាក់ធ្វើ​ការអភិវឌ្ឍ​ខេត្ត ឲ្យទទួលបាននូវភាពរីកចម្រើនជាបន្តបន្ទាប់ ជាក់ស្ដែងផ្អែកតាមទិន្នន័យមូលដ្ឋាន​ប្រចាំឆ្នាំបាន​បង្ហាញ​​ថា អត្រាភាពក្រីក្ររបស់ប្រជាពលរដ្ឋក្នុ​ងខេត្ត មានការថយចុះជាលំដាប់គឺពី១៤,១២%នៅ​ឆ្នាំ​​២០១៥ ចុះមក១៣,១៨% នៅឆ្នាំ២០១៧ និងរំពឹងថា អត្រានេះនឹងចុះជាបន្តបន្ទាប់ នៅឆ្នាំ​ក្រោយ​ៗ​​ទៀត។ លោកអភិបាលរង សូមអោយប្រធាន មន្ទីរ អង្គភាព និងអ្នកពាក់ព័ន្ធទាំងអស់ ត្រូវផ្តល់ទិន្នន័យ ជារៀងរាលចុងឆ្នាំ មកមន្ទីរផែនការ សម្រាប់ផលិតចេញជា លទ្ធផល GDP នៅឆ្នាំ២០១៨ និង ឆ្នាំបន្តបន្ទាប់ទៀត៕សិដ្ឋ

ប្រភព៖ រដ្ឋបាលខេត្តកោះកុង