នាព្រឹកថ្ងៃព្រហស្បតិ៍ ០១រោច ខែអស្សុជ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៥ ខែតុលា ឆ្នាំ២០១៨នេះ នៅសាលប្រជុំសណ្ឋាគារវ៉ៃគោ ឯកឧត្ដម រស់ ផារិទ្ធ អភិបាលរង ខេត្តស្វាយរៀង តំណាងឯកឧត្ដមអភិបាលខេត្ត បានអញ្ជើញចូលរួមក្នុងពិធីបើកសិក្ខាសាលាផ្សព្វផ្សាយស្តីពី «គោលនយោបាយលើកទឹកចិត្ត និងឯកសារបច្ចេកទេសដែលគាំទ្រការងារគ្រប់គ្រងលំនៅឋានដែលមានតំលៃសមរម្យ» ក្រោមអធិបតីភាពឯកឧត្ដម ឆាន់ សាផាន រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ តំណាងឯកឧត្ដម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ។ សិក្ខាសាលានេះ មានការអញ្ជើញចូលរួមពីមន្ត្រីជំនាញនៃក្រសួងរៀបចំដែនដី នគរូបនីយកម្ម និងសំណង់ និងមន្ត្រីពាក់ព័ន្ធ នៃមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ប្រធានមន្ទីរ-អង្គភាព និងតំណាងក្រុមហ៊ុនសាងសង់ក្នុងខេត្តជាច្រើនផងដែរ ។
ឯកឧត្ដម រស់ ផារិទ្ធ អភិបាលរង នៃគណៈអភិបាលខេត្ត បានជម្រាបជូនអំពីស្ថានភាពទូទៅ ការអភិវឌ្ឍរីកចម្រើនរបស់ខេត្ត ស្ថានភាពនៃមុខរបរ និងជីវភាពរស់នៅរបស់ប្រជាពលរដ្ឋក្នុងខេត្តដែលមានការកើនឡើងជាលំដាប់ពីមួយថ្ងៃទៅមួយថ្ងៃនៅក្នុងបរិបទដែលកំពុងមានសុខសន្តិភាព និងការអភិវឌ្ឍរីកចម្រើនលើគ្រប់វិស័យក្រោមការដឹកនាំប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ។ ក្នុងនាមឯកឧត្ដមអភភិបាលខេត្ត ឯកឧត្ដមក៏បានថ្លែងអំណរគុណចំពោះក្រសួងរៀបចំដែនដី នគរូបនីយកម្ម និងសំណង់ ដែលបានសហការរៀបចំសិក្ខាសាលាដ៏មានសារៈសំខាន់នេះឡើង ព្រមទាំងបានបង្ហាញពីជំនឿជឿជាក់យ៉ាងមុតមាំថា គោលនយោបាយស្ដីការលើកទឹកចិត្ត និងការបង្កើតកម្មវិធីជាតិសម្រាប់ការអភិវឌ្ឍលំនៅឋានតម្លៃសមរម្យ និងឯកសារបច្ចេកទេសគាំទ្រ ដែលត្រូវលើកយកមកផ្សព្វផ្សាយនៅក្នុងអង្គសិក្ខាសាលានៅថ្ងៃនេះ នឹងរួមចំណែកយ៉ាងសំខាន់ ក្នុងកិច្ចលើកកម្ពស់សុខុមាលភាព និងសេចក្តីថ្លៃថ្នូររបស់ប្រជាជនកម្ពុជាទូទៅ ជាពិសេសក្រុមគ្រួសារដែលមានប្រាក់ចំណូលទាប និងមធ្យម ព្រមទាំងគ្រួសារងាយរងគ្រោះ នៅទូទាំងប្រទេសផងដែរ។ ដោយប្រជាពលរដ្ឋក្នុងខេត្តស្វាយរៀងក៏ នឹងមានកាលានុវត្តភាព និងលទ្ធភាពខ្ពស់ជាងមុន ក្នុងការទទួលបានលំនៅឋានសមរម្យ ជាមួយតម្លៃដែលអាចឆ្លើយតបលទ្ធភាពចំណូលរបស់ពួកគាត់ ។
ឯកឧត្ដម ឆាន់ សាផាន រដ្ឋលេខាធិការ ក្រសួងរៀបចំដែនដី នគរូបនីយកម្ម និងសំណង់ បានបញ្ជាក់ជូនអំពីគោលបំណងនៃការរៀបចំសិក្ខាសាលានៅថ្ងៃនេះ គឺដើម្បីផ្សព្វផ្សាយអំពីឯកសារគតិយុត្តមួយចំនួន ដែលនាយកដ្ឋានមូលនិធិ និងឥណទានលំនៅឋាន នៃអគ្គនាយដ្ឋានលំនៅឋាន បានរៀបចំឡើងដែលមានលក្ខណៈសម្បត្តិអតិថិជន និងគោលដៅដែលអាចទទួលបានសិទ្ធិ ក្នុងការទិញលំនៅឋានតម្លៃសមរម្យ លក្ខខណ្ឌកំណត់ក្រោយការទិញលំនៅឋានតម្លៃសមរម្យ និងនិតិវិធី នៃការដាក់ពាក្យស្នើសុំទិញ ឬជួលលំនៅឋានតម្លៃសមរម្យ ។ ជាមួយនេះ ឯកឧត្ដមក៏បានបញ្ជាក់បន្ថែមថា អាស្រ័យដោយកំណើនតម្រូវការលំនៅឋាន និងការតាំងទីលំនៅថ្មី មានការកើនឡើងយ៉ាងឆាប់រហ័ស ដែលបានជះឥទ្ធិពលដល់សណ្តាប់ធ្នាប់របៀបរៀបរយ សន្តិសុខ សុវត្ថិភាព និងសោភ័ណភាពទីក្រុង ជាពិសេសដោយមើលឃើញថាលទ្ធភាពទទួលបានលំនៅឋានសមរម្យ មានសភាពកាន់តែទាបទៅៗ ទើបរាជរដ្ឋាភិបាល បានដាក់ចេញនូវគោលនយោបាយស្ដីការលើកទឹកចិត្ត និងការបង្កើតកម្មវិធីជាតិសម្រាប់ការអភិវឌ្ឍលំនៅឋានតម្លៃសមរម្យ និងឯកសារបច្ចេកទេសគាំទ្រមួយចំនួន ដើម្បីធានាសិទ្ធទទួលបានលំនៅឋានសមរម្យ ជូនប្រជាជនផង និងសម្រាប់គាំទ្រដល់ការរៀបចំអភិវឌ្ឍន៍នគរូបនីយកម្មមួយប្រកបដោយប្រសិទ្ធភាព ដែលអាចទ្រទ្រង់សុខមាលភាព និងវិបុលភាព សេដ្ឋកិច្ច និងសង្គមផង៕ គឹមអាន
ប្រភព៖ រដ្ឋបាលខេត្តស្វាយរៀង