នៅថ្ងៃទី៣០ ខែវិច្ឆិកា ឆ្នាំ២០២២ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ អមដំណើរដោយ លោក ឃ្លោក នួយ អភិបាលរងខេត្ត មន្ត្រីជំនាញ អាជ្ញាធរស្រុកឃុំ បានអញ្ជើញចុះពិនិត្យមើលស្ថានភាពស្រូវប្រាំងរបស់ប្រជាកសិករ ដែលបានទទួលស្រូវពូជជាអំណោយដ៏ថ្លៃថ្លារបស់ សម្តេចតេជោ ហ៊ុន សែន នាយករដ្ឋមន្ដ្រីនៃកម្ពុជា សម្រាប់ស្តារឡើងវិញ មានដើមដងល្អណាស់ ស្ថានភាពទឹកគ្រប់គ្រាន់ ដើម្បីស្រោចស្របស្រូវឱ្យបានតាមផែនការ នៅវាលស្រែឃុំចំណោម ស្រុកមង្គលបូរី ខេត្តបន្ទាយមានជ័យ។
នាឱកាសនោះ លោក ប៉ាង វណ្ណាសេដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត បានគូសបញ្ជាក់ថា ក្រោយពេល សម្តេចតេជោ ហ៊ុន សែន បានប្រគល់ពូជស្រូវ ក្នុងនាមមន្ត្រីជំនាញបាន ចុះណែនាំបង្ហាត់បង្ហាញពីនិតីវិធីបច្ចេកទេសនៃការដាំដុះស្រូវឱ្យបានល្អ ដើម្បីបានទិន្នផលខ្ពស់ កាត់បន្ថយការចំណាយថ្លៃដើមខ្ពស់ប្រកបដោយប្រសិទ្ធិភាព។
លោក បន្ដថា ប្រជាពលរដ្ឋដែលទទួលបានស្រូវពូជប្រមាណ ៥០០០គ្រួសារ ស្មើនឹង ៥០០តោន បូករួមនឹងស្រូវពូជបម្រុងរបស់គាត់ផងនោះ រហូតមកទល់ពេលនេះ ការបង្ករបង្កើនផលឡើង បានប្រមាណជាង ៩០%ហើយ នៅសប្តាហ៍ក្រោយនឹងគ្រប់តាមផែនការនៃផ្ទៃដីស្រុក ក្រុង ដែលមានការបង្កបង្កើនផលស្រូវរដូវទឹកស្រកចុះនេះ។
ឯកឧត្តម អ៊ុំ រាត្រី បានសម្តែងការពេញចិត្តចំពោះប្រជាកសិករទាំងអស់ ដែលបានចេះកែច្នៃដើម្បីលទ្ធភាពធ្វើស្រែឡើងវិញ។ ជាមួយគ្នានោះ ឯកឧត្តមអភិបាលខេត្ត បានជម្រាបជូនប្រជាកសិករថា ឆ្នាំនេះស្ថានភាពទឹកនៅមានច្រើនទាំងក្នុងស្ទឹង និងប្រឡាយមេ រង ដែលមិនបង្កការព្រួយបារម្ភនោះទេ សូមបងប្អូនមិនទាន់បានធ្វើសូមប្រញាប់ប្រញាល់ ដើម្បីទាន់ពេលវេលាជាមួយគេ កុំទុកដីឲ្យនូវទំនេរចោល ខិតខំដើម្បីសេដ្ឋកិច្ចគ្រួសារ៕
ប្រភព៖ រដ្ឋបាលខេត្តបន្ទាយមានជ័យ