(ខេត្តកំពង់ចាម)៖ នៅព្រឹកថ្ងៃទី ២៤ ខែវិច្ឆិកា ឆ្នាំ២០២២នេះ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានអញ្ជើញជួបសំណេះសំណាល និងចែកអំណោយដល់ប្រជាពលរដ្ឋ ដែលមានជីវភាពខ្វះខាតរងផលប៉ះពាល់ដោយជំនន់ទឹកភ្លៀង និងជំននទន្លេមេគង្គ ចំនួនសរុប ៨០០ គ្រួសារ ក្នុងនោះមកពីក្រុងកំពង់ចាម ៤០០ គ្រួសារ និងស្រុកកំពង់សៀម ៤០០ គ្រួសារ។ ពិធីនេះក៏មានការអញ្ជើញចូលរួមពីឯកឧត្តម លោកជំទាវ អភិបាលរងខេត្ត ប្រធានមន្ទីរអង្គភាពជុំវិញខេត្ត អាជ្ញាធរស្រុកកំពង់សៀម និងក្រុងកំពង់ចាម និងបងប្អូនប្រជាពលរដ្ឋជាច្រើនរូប។

ក្នុងឱកាសនោះ ឯកឧត្តម អ៊ុន ចាន់ដា អភិបាលខេត្តកំពង់ចាម បានមានប្រសាសន៍ថា ការចែកស្បៀងអាហាររបស់រដ្ឋាភិបាលកម្ពុជា ដល់បងប្អូនប្រជាពលរដ្ឋយើង នាពេលនេះ គឺជាការចូលរួមសុខទុក្ខ ជាមួយបងប្អូនប្រជាពលរដ្ឋ ពោលគឺ បើទោះបីជាស្ថិតក្នុងកាលៈទេសៈណាក៏ដោយ គឺយើងមិនរត់ចោលគ្នា។ ជាក់ស្ដែងដូចជាក្នុងបរិបទជម្ងឺកូវីដ១៩ អស់រយៈពេល ២ឆ្នាំនាំ ដែលយើងពិតជាលំបាកណាស់ ទាំងអាជ្ញាធរក៏ដូចជាប្រជាពលរដ្ឋ គឺបានរួមគ្នាទប់ស្កាត់កុំឲ្យជំងឺនោះឆ្លងរីករាលដាល ចូលក្នុងសហគមន៍ ហើយពេលនោះក្រុមអាជ្ញាធរក៏បានខិតខំដោះស្រាយស្បៀងអាហារនានា ដើម្បីចែកជូនដល់បងប្អូន នៅពេលដែលមានការបិទខ្ទប់ ឬសម្រាប់អ្នកដែលបានឆ្លងជំងឺនោះ។ ប៉ុន្តែជាគ្រោះអកុសល បន្ទាប់ពីប្រជាពលរដ្ឋយើងបានធូរស្រាលពីជំងឺកូវីដ១៩ ក៏មកជួបប្រទះនិងគ្រោះទឹកជំនន់ ដូច្នេះហើយ ទើបអាជ្ញាធរនៅតែបន្តធ្វើការដោះស្រាយនូវបញ្ហានេះ ជូនបងប្អូនប្រជាពលរដ្ឋយើង ដោយមិនទុកបងប្អូនប្រជាពលរដ្ឋយើងចោលនោះទេ។

ឯកឧត្តម អភិបាលខេត្ត បានបន្តថា ចំពោះបងប្អូនប្រជាពលរដ្ឋប្រភេទ ក្រ១ ក្រ២ ត្រូវបានទទួលការឧបត្ថម្ភជាថវិកាពីរាជរដ្ឋាភិបាល ជាប្រចាំខែផងដែរ ដោយកិច្ចការនេះរដ្ឋាភិបាលមិនទាន់បញ្ចប់នៅឡើយទេបើទោះបីជាជំងឺកូវីដ១៩ បានធូស្រាលទៅហើយក្តី។

ទន្ទឹមនឹងនេះដែររដ្ឋាភិបាល បានគិតគូរបន្តលើកម្មវិធីគាំពារសង្គម ដោយថ្មីៗនេះ មានកម្មវិធីថ្មី ២ បន្ថែមទៀត នៃផ្នែកសង្គមកិច្ច និងផែនការ គឺ៖ទី១៖ ដោះស្រាយដល់ប្រជាពលរដ្ឋ ក្រ១ ក្រ២ ដោយទឹកជំនន់ និងទី២ ៖ ដោះស្រាយដល់ប្រជាពលរដ្ឋដែលទទួលរងនូវអតិផរណា ដោយសារមានសង្គ្រាមនៅក្រៅប្រទេស ដែលធ្វើឲ្យប៉ះពាល់ដល់សេដ្ឋកិច្ចពិភពលោក ក៏ដូចជាប៉ះពាល់ដល់ជីវភាពរបស់បងប្អូនប្រជាពលរដ្ឋ ៕

ប្រភព៖ រដ្ឋបាលខេត្តកំពង់ចាម