នៅព្រឹកថ្ងៃចន្ទ ទី១៩ ខែកញ្ញា ឆ្នាំ២០២២នេះ ដោយអនុវត្តតាមអនុសាសន៍របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ឯកឧត្តម ស្វាយ សំអ៊ាង អភិបាល នៃគណៈអភិបាលខេត្តស្ទឹងត្រែង និងជាប្រធានគណៈបញ្ជាការឯកភាពរដ្ឋបាលខេត្ត បានដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្ត ដើម្បីអនុវត្តឱ្យមានប្រសិទ្ធភាពលើការការរក្សាសន្តិសុខ សណ្តាប់ធ្នាប់ និងការបង្ក្រាបការលេងល្បែងស៊ីសងខុសច្បាប់គ្រប់ប្រភេទនៅក្នុងមូលដ្ឋានខេត្តស្ទឹងត្រែង។
កិច្ចប្រជុំនេះមានការចូលរួមពីអភិបាលរងខេត្ត នាយករដ្ឋបាលសាលាខេត្ត អភិបាលក្រុង ស្រុក កងកម្លាំងប្រដាប់អាវុធទាំងបីប្រភេទអធិការនៃអធិការដ្ឋាននគរបាលក្រុង ស្រុក ព្រមទាំងមន្រ្តីពាក់ព័ន្ធមួយចំនួនទៀត។
ឯកឧត្តម ស្វាយ សំអ៊ាង មានប្រសាសន៍ថាក្រោយកិច្ចប្រជុំនេះបានបញ្ចប់ គណៈបញ្ជាការឯកភាពរដ្ឋបាលក្រុង ស្រុកអាជ្ញាធរមូលដ្ឋានគ្រប់លំដាប់ថ្នាក់ត្រូវសហការជាមួយព្រះរាជអាជ្ញា និងកងកម្លាំងប្រដាប់អាវុធ ដើម្បីចុះបង្ក្រាបភ្លាមៗ ការលេងល្បែងស៊ីសងខុសច្បាប់គ្រប់ប្រភេទពោលគឺ ត្រូវអនុវត្តឱ្យបានម៉ឺងម៉ាត់បំផុតចាប់ពីពេលនេះតទៅពោលគឺត្រូវតែធ្វើឡើងឱ្យដូចភ្លៀងរលឹម។
ក្នុងឱកាសនោះដែរ ឯកឧត្តម ស្វាយ សំអ៊ាងក៏បានជំរុញដល់អាជ្ញាធរមូលដ្ឋាន និងកងកម្លាំងសមត្ថកិច្ចគ្រប់លំដាប់ថ្នាក់ទាំងអស់ត្រូវបង្កើនការខិតខំយកចិត្តទុកដាក់បន្តទៀតលើការរក្សាសន្តិសុខសណ្តាប់ធ្នាប់ និងពង្រឹងការអនុវត្តគោលនយោបាយ“ភូមិ ឃុំ សង្កាត់ មានសុវត្ថិភាព” នៅតាមក្រុង/ស្រុក នានាក្នុងភូមិសាស្រ្តខេត្តស្ទឹងត្រែង៕
ប្រភព៖ រដ្ឋបាលខេត្តស្ទឹងត្រែង