នាថ្ងៃព្រហស្បតិ៍ ងៃទី១៥ ខែកញ្ញា ឆ្នាំ២០២២ រដ្ឋបាលខេត្តកោះកុង បើកកិច្ចប្រជុំករណីទំនាស់ដីធ្លី រវាងប្រជាពលរដ្ឋ និងប្រជាពលរដ្ឋ នៅស្រុកមណ្ឌលសីមា ខេត្តកោះកុង ដោយមានការដឹកនាំកិច្ចប្រជុំពីសំណាក់ លោក សុខ សុទ្ធី អភិបាលរងខេត្តកោះកុង។

លោក អភិបាលរងខេត្តកោះកុង ដោយមានការអនុញ្ញាតពីលោកជំទាវ មិថុនា ភូថង អភិបាល នៃគណៈអភិបាលខេត្តកោះកុង បានអញ្ជើញដឹកនាំកិច្ចប្រជុំ ដើម្បីបន្តដោះស្រាយករណីទំនាស់ដីធ្លី រវាងឈ្មោះ ថង ធិប ជាមួយឈ្មោះ នាង អ៊ឹងមួយ ដែលមានទីតាំងស្ថិតនៅភូមិនាងកុក ឃុំប៉ាក់ខ្លង ស្រុកមណ្ឌលសីមា ខេត្តកោះកុង។

បន្ទាប់ពីកិច្ចប្រជុំពិភាក្សា លោក សុខ សុទ្ធី អភិបាលរងខេត្ត បានណែនាំ ឱ្យលោកប្រធានការិយាល័យរៀបចំដែនដី នគរូបនីយកម្ម សំណង់ និងភូមិបាលស្រុក និងមន្ទីររៀបចំដែនដី នគរូបនីយកម្ម សំណង់ និងសុរិយោដី រកឯកសារបន្ថែមទៀតមកបំពេញបន្ថែមដើម្បីឈានទៅរកការធ្វើសេចក្តីសន្និដ្ឋានបញ្ចប់ករណីទំនាស់ដីធ្លីនេះ៕

ប្រភព៖ រដ្ឋបាលខេត្តកោះកុង